Ува ёросысь Пекшур гурт: Пётр Блиновлэн дорез

Удмурт Дунне
By Удмурт Дунне Июнь 15, 2018 13:45

16-тӥ июне Ува ёросысь Пекшур гурт котырысь возь вылын удмуртъёслэн Гербер шулдыръяськонзы ортчоз. Та вакытэ отын куно пумитаны дасясько.

П. Блиновлы синпелетэз усьтыку.

Герберсяська но 7 воршуд

— Ува ёросын Гербер ортчытон сярысь тодэммы бере ик инты быръён сярысь малпаськыны кутскимы, — шуэ ёрос йырлэн воштӥсез, Гербер шулдыръяськонэз радъянъя оргкомитетэ пыртэм мурт Надежда Лохтина. — 3-4 инты шедьтӥмы вал, отысь бусыос гурт хозяйствоослэн лыдъясько, асфальт сюреслэсь кыдёке интыяськемын. Вань куронъёсты лыдэ басьтыса, Пекшур котырысь бусы вылэ дугдӥмы, асфальт сюреслы но матын, ёрос центрлэсь но кыдёкын ӧвӧл, вылаз ик, музъемез та интыын песокен суро — зориз ке, сокем дэри уз луы.

Пекшурозь ёрос центрысен ог 15 минут гинэ мынонэз. Ужрадэ мынӥсь калыкез Ува каргуртысен нимысьтыз автобусъёс нуллозы. Гербер шулдыръяськонлэн шорсюлмыз герӟаськемын луоз герберсяськаен но 7 воршуд нимъёсын.

Пекшур номырин уг висъяськы кадь мукет гуртъёслэсь. Увинское муниципал кылдытэтэ Ува каргурт, Подмой черкогурт, Удмурт Тукля, Чабишур но Пекшур гуртъёс пыро. Ваньмыз пӧлысь Пекшур тужгес пичиез луэ ке но, данъяськонзы вань.

Пекшурын ульчаоссы асфальтэн шобыртэмын ӧвӧл.

— Татын вордскемын дано удмурт писатель Пётр Блинов — «Улэм потэ» романлэн авторез, — шуэ муниципал кылдытэтэн кивалтӥсь Михаил Логинов. — 3 но ӝыны ар талэсь азьло та гуртэ, писательлы сӥзьыса, синпелет пуктӥмы. Ёросысь кивалтӥсьёс сяна, гуртын улӥсьёс, писательлэн ӵыжы-выжыосыз, библиотекаын ужасьёс но шаертодонэн тунсыкъяськисьёс люкаськылӥзы.

Выжыосты утись

Та гуртын улӥсь Василий Тратканов — туж аспӧртэмлыко адями. Удмурт йылол-сямъёсын тунсыкъяське, выжыосыз сярысь но трос тодэ.

— Гуртэз, пе, Траткановъёс кылдытӥзы 19-тӥ даурын, — шуэ Василий Михайлович. — Мынам малпамея со 1816-тӥ арын кылдэмын, документъёс но со сярысь верало. Отын пусъемын, 1859-тӥ арын, пе, 6 одворчаын 17 воргоронъёс но 21 нылкышноос улӥллям. Революцилэсь азьло гуртамы магазинмы но вылэм. Гуртмылэн тужгес шулдыр но узыр вакытэз вал, дыр, Быдӟым война кутскон азьын. Соку гуртамы 50 корка пала вылэм. 1937-тӥ арын вордскем дядяелы удалтэм. Таманлы начальной школа кылдылон вакытэ отын дышетскыны вуэм. Отӥяз улон мӧзмытгес луэм: магазин ӧй вал, школа пыраклы пытсаськиз. Колхоз ялан вошъяськылӥз.

Битеревъёс дӥне внукъёссы бертӥзы.

Шаерчи верамъя, 1930-тӥ аръёсы «Пекшурский» колхозын вал но ыж вордӥллям. Сокугес ик ог 2 иськемын Пекшурской лесоучасток кылдэм (али сое Пекшур-2 шуо). Вот отын ваньмыз вылэм: школа, контора, магазин. Со но, ог 5 ар ортчыса, гурт котырысь тэль быремен, калленэн пашмыны кутскем, 1960-тӥ аръёсы школазы пытсаськем.

— Колхозмес нырысь ик огазеязы Чабишурен но Удмурт Тукляен, луиз Чапаев нимо колхоз. Отӥяз огазеязы Ува-Тукляен, озьы «Новая сила» колхоз пӧрмиз. Огдырлы кылдылӥз на парсь вордонъя комплекс, сое но, пайдаез ӧвӧл шуыса, пытсазы. Табере тани 7-тӥ арзэ гурт котырысь бусыосмес нокин уг но гыры, уг но кизьы, уг но турна. Туэ толалтэ, ӝыны бусыез сельхозоборотысь басьтыса, юрт пуктыны мылкыд карисьёслы музъем люкылыны кутскизы, — шуэ В. Тратканов.

Ульчазы 5 луиз

«Пекшур» кыл сярысь но В. Тратканов тупен-тупен мадиз. Татӥ Пытсам шур бызе, отчы Можга выжыысь калык лыктэм вылэм. Гуртоосты шур висъям. Паллян палаз Чибыр выжыос улӥллям, соос Чибашур гурт кылдытӥллям. Нош шурлэн бур палаз интыяськиллям Пека выжыос — Пекшур кылдэм. «Пек» кылэн герӟаськем гуртъёс Ува ёросын 5 вал: Пек-Жикья, Пор-Пеки, Карашур-Пеки, Малые Пеки, Пекпочинка.

В. Тратканов но солэн мумиз-бубиз.

 

— Пекшурын трос аръёс ӵоже «Г» буква выллем 2 урам вал: Уллапал но Выллапал, — шуэ Василий Михайлович. — Отын удмуртъёс гинэ улӥзы. Табере гуртмы паськыта, 5 ураммы луэмын, выль корка пуктӥсьёс йыло. Нош ми асьмеды вуж деревняын улӥсьёс шуиськомы. Кылсярысь, кылем толэз 12 коркан улӥсьёс толйизы, со пӧлысь ӝыныезлэсь ичиезгес — вуж гуртын улӥсьёс.

Та вакытэ гуртын Траткановъёс 3 семья: Михаил Иванович но солэн Василий но Андрей пиосыз, Вячеслав Битерев, гужемзэ вуэ на Пётр Бурковлэн семьяез.

Гуртазы магазинзы но номырзы ӧвӧл, со понна котьку шыпыт, эркын, гуртоос туж ярато тылобурдо вордыны. Нош автолавка дорады уг ветлы-а шуыса юамысьтым, воргоронлэн серемез гинэ потӥз.

— Лыктӥз ке но, кин со доры потоз, Ува каргуртысь магазин дорозь шонер сюресмы ог 2-3 иськем гинэ луэ. Ма собере, Увае ветлӥсьёс но вань, кинлы мар кулэ, ваё. Сюресмы сярысь ке верано, со вольыт возиське толалтэ. Нош гужемзэ сюрес волятӥсьёс ӧвӧл ни. Таяз суббота нуналэ Герберез адӟыны ми но одно ик потомы. Со ортчоз Вышкалёг йылын. 1930-тӥ аръёсы отын геодезистъёс вышказэс возизы, со дырысен вырйыллэн нимыз озьы ик кылиз.

Ува ёросысь тодмо кибашлы Геннадий Сидоров сюлмаськемъя артысь Чибашур котырысь 4 дауръем пужым инкуазь синпелетэн нимамын. В. Траткановлэн дораз Корка, Гурт, Тукля мудоръёсыз, пе, вань. Арлы быдэ гужем пумитан вакытэ гуртын Гуждор юмшан ортчыто.

Валентина Емельянова
Туспуктэмъёс: Сергей Антонов но udmlib.ru

Удмурт Дунне
By Удмурт Дунне Июнь 15, 2018 13:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<