Ува ёросысь Комакгурт: Ляминъёслэн кӧкызы. Выжы тус-тас луиз — гурт быриз

Удмурт Дунне
By Удмурт Дунне Июнь 30, 2018 16:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Ува ёросысь Поршур-Тукля гурт поселение 6 гуртъёс пыро. Огез лулоез но со дыре ик лултэмез, шуыны луоз, Михаил Лямин писательлэн вордскем но будэм Комакгуртэз.

Комакгуртысь школаын дышетскисьёс. 1945-тӥ ар.

Етӥнэн узырмиллям

1861-тӥ арын, крепостной праволы пум понэм берегес ик, Поршур гуртысь етӥзгес удмуртъёс выжыяськыны кутскизы 2 иськемлы палэнэтӥ бызись Лудӟи шур кузя. Гуртсэс Комакгурт нимазы. 1871-тӥ арысь архивной документъёсъя тодмо: комакгуртъёслы 500 гектар музъем висъямын вал. В. Старостинлэн шаертодонъя «Книга Вятских родов» книгаяз пусъемын: 1891-тӥ арын Комакгуртын  23 семьяын 147 адями улӥз. 1920-тӥ арын 30 юртъёс пӧлысь 2-аз гинэ ӟучъёс улӥллям, кылемаз — удмуртъёс, ваньмыз-ӧвӧлэз 201 адями. Гырон-кизён бусыоссэс паськытатон вылысь нюлэс порылӥзы, вань ужез котьку дэмен лэсьтылӥзы. Выжызы но угось одӥг вал — Ляминъёс.

—  Гуртоос етӥн будэтонэн ляльӟиллям (узырмилям). Татын угось музъемзы туж ӟеч, — шуэ Михаил Лямин писательлэн («Четыре года в шинелях» роман гожтӥз) ӵыжы-выжыез, Комакгуртын вордскем но солэсь историзэ утись Маргарита Шубина. — 1900-тӥ аръёслэн кутсконазы ик татын 3 улыно-вылыно коркаос сылӥзы. Улӥяз магазин возьылӥзы, вылӥяз асьсэос улӥзы. Арлыдо родняосмылэн верамъёссыя, Комакгуртын ыж, парсь, скал, вал  вордылӥзы. Котькуд бакчаын муш возизы. Нылпиоссылы но шудыны маза ӧз сётъялэ — ялан ужатъязы. Дурем коньдонзэс люкаса ӧз возе — гуртэ гидъёс пуктыны юрттылӥзы, школаос, черкъёс ӝутонлы уксёзэс висъязы.

Тыметын карп но чипей будэто.

Революция бере «Андан» колхоз кылдытӥзы. Сое ӝутыны юрттэм адямиос пӧлысь огез — Иван Лямин, Михаил Лямин писательлэн ӵужмуртэз. Ас вакытаз Иван Иванович, «Вуж Мултан» ужъя удмуртъёсты янгыше уськытыкузы, адвокатъёслы уксё тырыны юрттэм. Зэм, ассэ Иван Ляминэз 1930-тӥ арын 3-тӥ мае Мултан ёроскомлэн решениезъя   колхозникъёслэн радазы кутыны но ӧз лэзе ни. Сое угось кулак радэ пыртӥзы. Ваньбурзэ тус-тас каризы. Огзэ юртсэ Увае выжтӥзы, отчы нылпи библиотека усьтӥзы. Мукетсэ юртсэ сэрттыса Поршуре нуизы: таяз контора но, почта но вал. кыкез но та юртъёсыз али ке но йыг-йыг сыло.

— Комакгуртысь Ляминэн ӝутэм 2 школаосты гинэ кесяны жалязы соку, — вера Поршур-Тукля гурт поселениен кивалтӥсь Надежда Конышева. — Огаз 7 ар визьнодазы. Татын ик быдэс Ува ёросысь егитъёсты тракторен ворттылыны дышетъязы. 1945-тӥ арын со юртэз Поршуре выжтӥзы. 2-тӥез школа покчиослы чакламын вал. Таиз Комакгуртын 1950-тӥ арозь возиськиз на. Отӥяз сое но Поршуре выжтӥзы. Поршурын со ог 10 ар сылӥз на. Поршурын кирпичлэсь выль школа пуктэмзы бӧрсьы Комакгуртысь ваем начальной шолалэн юртаз интернат каризы. Отӥяз воксё сэрттӥзы, зӧк коръёсты пулы вандӥзы.

Кулакъёс, пе…

Кулакъёс радэ Комакгуртысь 29 Ляминъёс пыртэмын вал. Озьы быдэс выжы тус-тас луиз. Кылсярысь, 1874-тӥ арын вордӥськем Фёдор Андреевич Ляминэз 1937-тӥ арын арестовать каризы но 10 арлы Сибире каторгае келязы, антисовесткой агитация нуэ шуыса, татын ик быдтӥзы. 1989-тӥ арын реабилитировать каремын шуыса пусъемын. Со дыре ик семьязэ но нылпиоссэ Комакгуртэ ик кельтӥзы. Архивъёсын солэн вань выжыез но нылпиосыз кулаклэн семьяез шуыса пусъемын, нош реабилитация пумысен графаын татчыозь прочерк сылэ. Мария нылызлэн Полина Пашаева нылыз али ке но Поршурын улэ, пересьмыса пельтэм но сукыр кылемын ни.

— Мынэсьтым  прадедушкаме Антон Ляминэз но кулак каризы, — шуэ Маргарита Шубина. — Сибире ӧз келялэ. Но ваньбурзэ талазы. Кулакъёс радэ пыртэмъёслы бератаз компенсация тыризы. Антон Ляминлэн внукез Семён Петрович, архивъёсын бугыръяськыса, ёрос администрацие компенсацилы вазиськиз ик вал. Но солы шуизы: районын уксё уз тырмы ваньбурдэс берыктыны. Собере нокытчы но ӧз ветлы ни. Родняосмы пӧлысь мукетъёсыз но ӧз бызьылэ, ӧз утчаське ни. Огзэ тодӥсько: ас вакытаз кулак каремъёс сярысь нокинлы поттылыны ӧз лэзьылэ. Комакгуртысь пегӟыны кутскемзы но та ик пумен луиз кадь. Туж кышкатэмын вал угось.

Михаил Лямин писатель гинэ но ноку нокинлы выжыез сярысь ӧз поттылы. 1970-тӥ аръёсы гинэ со гуртаз возьматъяськыны, родняосыз дорын кӧланы кутскиз. Жаль, соку гурт быре ни вал. Ми асьмеос но 1970-тӥ арын гуртысь кошкимы. Ноку уг вунэтӥськы ни: атае бубизлэсь огпол юаз: коммунистъёс радазы пырыны отё, мар каром? Песятае шуиз: коть куинь партие пыр, но Инмарез эн вунэты — со асьмемыз быронлэсь утиз.

Выль улон

Кин тодэ, Комакгуртысь калык, оло, кошкыны но сокем ӧй дыртысалыз. Но 1950-тӥ аръёсы «Андан» колхозэз огязеязы Поршурысь «Выль улон» колхозэн. Ужасьёслы разнарядка сётъяны гуртэ радио кыскизы ик. Сюрес кузя юбоос но пуктылӥзы электролы шуыса. Но тыл таки ӧз кыске.

Комакгуртын 1 гинэ корка сылэ.

— 1972-тӥ арын татысь берпуметӥ адямиос кошкизы, — шуэ  Надежда Конышева. Но туннэ гурт выльысь улӟе. Ог 8 арзэ ни лудъёсыз гырисько-кизисько. Лудӟи шуре тымет лэсьтӥзы. Табере отын карп, чипей будэто. Артэ ӝутӥзы бадӟым корка. Кузёез — Ринат Латыпов, «Рико-Агро» хозяйствоен кивалтӥсь. Выль техника гуртэ вуттыны кутскемезлы синъёс ик нырысь-валысь ӧз оске кадь. Табере ӵукналы быдэ гуретэм куараез кылыса, шумпотоно. Хозяйство бакча сиён будэтонэн выре, ӵужкушман, куар (кубиста) мерттэ. Лудӟи кузя скалъёсты но пастуханы кутскизы ни. Латыповлэн Комакгуртэ шутэтскон база лэсьтыны мылкыдыз вань. Сюрессэ ӝутӥз, табере толэн-гужемен гуртэ пырыны луэ. Тыл вань. Газ гинэ ӧвӧл. Кин тодэ, оло, мукет фермеръёс но, та гуртысь потэмъёс, пумен бордаз итӥськозы.

Поршуре выжем комакгуртъёс шумпотыса учко гуртсылэн выльдӥськемезлы. Асьсэос гужем шуныт вакытэ Комакгуртэ арлы быдэ люкаськыло. Туэ гурт поселениен грант утӥмы. Бырем гуртъёслы сӥзем аллея лэсьтомы. 2016-тӥ арын Поршурысь школа борды пул шуккимы, та юртын ас вакытаз Михаил Лямин дышетскиз шуыса. Писатель вордскем дырысен 110 ар тырмонлы сӥзем ужрад вал со.

Елена Сараматова

 

Удмурт Дунне
By Удмурт Дунне Июнь 30, 2018 16:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<