«Удмурт шаер» клубын — Можга ёросысь Сибы гуртын вордӥськем писательёс

Удмурт Дунне
By Удмурт Дунне Июнь 22, 2018 17:30

Йӧскалык библиотекаысь «Удмурт шаер» клубын Можга ёросысь Сибы гуртын вордӥськем писательёслы сӥзем ӝыт ортчиз. Со радъяськиз Можга ёрос литературалэсь арзэ пусъён улсын.

unatlib.ru

Можга ёросысь сибы кенакъёс.

Сибыын вордскемын гожъяськисьёс Игнатий но Василий Гавриловъёс, Михаил Покчи-Петров, Анатолий Петров, Анатолий Григорьев; экономика наукаосъя доктор Михаил Шишкин, филология наукаосъя доктор Александр Шутов, филология наукаосъя кандидат Лидия Долганова…

Ужрадын «гуртлэн феноменэз» сярысь вераськон ортчиз. Данъяськымон адямиоссы но «Святой источник» турмаршрутсы сярысь мадиз Сибыысь культура юртэн кивалтӥсь Елена Сергеева. Солэн верамезъя, гуртазы, гожъяськисьёс, дышетӥсьёс, тодосчиос сяна, спортъя 10 мастеръёс но 13 кандидатъёс будэмын. Соос ас уженызы, быгатонлыкенызы ӝутскыны юртто быдэс Удмуртилы.

Игнатий но Василий Гавриловъёс но Михаил Покчи-Петров сярысь трос тунсыкозэ вераз Удмурт Элькунысь культура удысысь дано ужась Анна Евсеева. Гавриловъёслэн ӵужанайзы Псковской губерниысь вылэм, одӥгез вынзы — Михаил — Оренбург областьысь Бузулук карын улэм. Кемалась ӧвӧл Сибыын улӥсьёс солэсь суредъёссэ шедьтӥзы.

Удмурт театрысь валтӥсь драматург, Правительстволэн литературая премиезлэн лауреатэз Анатолий Григорьев пусйиз:

— Мынам малпамея, Сибы люконтэм герӟаськемын Вера Васильевна Толстаялэн нимыныз. Вашкала дворян выжыысь потэм ӟуч нылкышно, Лев Толстойлэн ӵыжы-выжыез, гуртысь пиналъёсты 25 ар ӵоже дышетӥз. Удмурт кылын вераськыны дышетскиз. Сибыос али но тау каро тодон-валан сётэмез понна. Гуртысь музей нуллэ солэсь нимзэ.

Удмурт Элькунысь дано артистка Оксана Гаврилова но мылкыдзэ усьтӥз. Солэн пересь песянаез Гаврилов агай-вынъёслэн сузэрзы вылэм. «Ӟеч-а, бур-а, удмурт кыл!» учебникъёслэн авторзы Надежда Боталова но вордскем гуртэныз данъяськемез сярысь вераз. Учебникъёсы И. Гавриловлэн, М. Покчи-Петровлэн, А. Григорьевлэн ужъёссы пыризы шуыса пусйиз.

Ужрадлы задор но шуныт мылкыд пыӵатӥзы Сибы палъёсысь кырӟанъёс. Соосты быдэстӥз «Марӟан» фольклор ансамбль (кивалтӥсез Алексей Спиридонов).

Светлана Вордакова
Туспуктэм: unatlib.ru

Удмурт Дунне
By Удмурт Дунне Июнь 22, 2018 17:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<