Тулыс вуэ феврале ик. Кавказ гурезьёслэн выжыысьтызы репортаж

Удмурт Дунне
By Удмурт Дунне Июнь 28, 2018 16:00

Тулыс вуэ феврале ик. Кавказ гурезьёслэн выжыысьтызы репортаж

Уйпал Кавказысь Кисловодскын тюльпанъёс бычыяны кутско ни феврале. Озьы туэ тулысэз пумитай туж вазь.

Национальной паркысь долинаын 80-лэсь ятыр сорт розаос будо.

Быгатэмзыя уло

Кисловодске поездэн 2 но ӝыны сутка мыноно. Вокзалысь потӥськод гинэ, шӧдӥськод: вырйыло-гурезё интые пуксем город трос тунсыкозэ сӥзе.

Син шоры соку ик йӧто вокзал котыре нориськем таксистъёс. Поездысь васькисьёсты соос нерад карыны кутско.

— Кытчы мынӥськоды? — уката тэбиниз сьӧд мыйыкоез таксист. — Санаторийды татысен ог 3 иськемын. Транспорт та вакытэ отчы уг ветлы ни. Мон, эсьма, 100 манет тыр келяло…

— Ма, путёвкаямы гожтэмын: санаторий вокзалысен ог 500 метр кемын гинэ…

— Пожалуйста, тани та гурезь вылын гинэ со, — возьматэ вокзал борды ланьырскем вырйыл шоры. — Но тӥ отчы пыдын шат тубоды, сюрес ӧвӧл…

Ми, дун тырытэк, ог 5 минутскын паськыт, вольыт сюрес кузя санаториямы вуимы.

Озьы нырысетӥ нуналысен ик валам: татын, кин кызьы быгатэ, озьы коньдон поттыны выре.

Таксистъёс сяна, Кисловодскын пичияк ке но уксё поттыны быгато на вуз карисьёс, туристъёслы улон интызэс ӵектӥсьёс. Вань на риелторъёс — таосыз но калыкез пырак вокзалысен ик пумитало.

— Куддыр ог-огенымы керетонозь но вуылӥськом, йырсияськон учыръёс но вал, — уг ваты риелтор Алина. — Улон инты дэмласьёс трос, но данакез шутэтскисьёс лыкто санаторие. Нимаз адямиос улон интызэс нуналаз 500 манетэн гинэ но ӵекто. Вань, конешно, нуналаз 1-2 сюрс манет курисьёсыз но. Квартирантъёс шедьтӥсько ке, 10 процентсэ коньдонзэс басьтӥсько. Кема аръёс ӵоже Бакуын, собере Киевын ӟуч кылъя урокъёс нуи. Кисловодске вуи ни, пенсие потыса. Лыдъяське, мурт кунын ужай шуыса, соин ик пенсие 8 сюрс манет гинэ…

Кар тусъёс.

Кисловодскын нокыӵе производство ӧвӧл. Чырткемъёсызгес ужаны интыясько санаторийёсы — сиён пӧрасе, выж миськисе…

Вамышлы быдэ — нарзан ошмесъёс

Санаторийёсын улон-вылон чылкак мукет — татын ваньмыз бусьтыр! Ӟеч мылкыд, выль тодмоос… Сиён пӧранэз, выж ӵужонэз ӧвӧл — берлозэ ку меда таӵе рае вуылӥ вал? Татын ик тонэ йӧнатыны выро — массаж, спелеокамера, лысэн ванна… Ваньмон дырдэ но радъялозы — кино, концерт, эктон ӝыт… Зэм, котькуд санаторийлэн аслаз программаез. со дунъёс бордысь потэ. Куд-ог санаторийёсын феврале нуналаз ог 2 сюрс манетэн гинэ но тырмыто — гужемлы, пе, дунъёссэс 3-4 сюрсозь будэтозы. Нош куд-огаз толалтэ но нуналаз 5-7 сюрс манетлэсь ӧжыт уг басьто. Тросэз Кисловодске лыкто путёвкая, кылсярысь, профсоюзъёс, эмъян учреждениос пыр. Эшшо тросэз — ас коньдонэнызы.

Но улонад одӥг пол ке но Уйпал Кавказэ одно вуылоно — тае мон табере тодӥсько! Укыр чебер инкуазь, укыр трос адӟымон интыос.

Кисловодск интыяськемын Кавказ гурезьёслэн выжыязы — Россиысь но Европаысь тужгес ӝужыт гурезёзь, Эльбрусозь, кылемын на ог 65 иськем гинэ.

Кылдэмын город-курорт 1803-тӥ арын ӟуч военной крепость бордысен. Нош нимыз потэмын минерал ву бордысь — чырсалэс сурет пырак музъем улысь потэ. Эсьма, город шорын ик сылэ бадӟым Нарзан галерея — готика стилен 1853-тӥ арын ӝутэм синпелет. Вылтусыз со дырысен воштымтэ, пушкыз гинэ туала шӧмъем каремын ни — шулдыртэмын статуяосын но мраморен. Татын минерал ву дунтэк юыны луэ. Шӧмтӥсько кезьытсэ но, веръясько шунытсэ но — огез но ческыт уг поты. Нош эше валэктэ: тазалыклы кыӵе пайдаё со, тӥни ук стенд вылын та сярысь пыр-поч гожтэмын. Городэтӥ поръянъямы тросэтӥ пумитам на минерал вуэн «ошмесъёсты» — пыр но ю. Но сьӧрад троссэ 1 литр гинэ басьтыны лэзё.

Котькуд турист Кисловодскен тодматсконзэ кутске, малпасько, Курорт бульварысен. Ортче со городысь тужгес чебересь интыос пыр. Бульварлэн мыд-мыд палтӥз сыло 19-тӥ-20-тӥ дауръёсы пуктэм особнякъёс. Соослы кутскон сётэ, шуыны луоз, филармония — архитектурая зэмос синпелет! Нырысетӥ люкетэз пуктэмын вылэм ай 1895-тӥ арын, со вакытэ сое Курортной зал шуылӥллям. Со арын ик кылдэм городысь симфонической оркестр, кудӥз Курортной залын ялан концертъёс сётъяны кутскем. Нош 1972-тӥ арын концертъёс возьматыны эшшо одӥг зал пуктӥллям. Туннэ отысь уг кошкыло Москваысь но бадӟым артистъёс — концерт вылысь концерт сёто.

Мукетыз синпелет — 1903-тӥ арын мавритан стилен ӝутэм Валтӥсь нарзан ваннаос. Ӵапак со аре город-курорт кылдэм дырысен 100 ар тырмиз, со вакытэ отчы шутэтскыны вуылӥсьёс туж трос вылӥллям ини. Озьы ӝутэмын вал Кисловодскысь тужгес чеберез юрт. Солэн башняосыз ик йӧспӧртэмесь, пичи балконъёсыз халифъёслэсь дворецъёссэс тодэ вайыто. Быдӟым ож вакытъёсы татын йӧнатылӥзы сӧсырмемъёсты. Али отын нарзанэн 89 ванна, нуналлы быдэ 2,5 сюрс адями тазалыксэ юнматыны быгатэ.

Мон понна Кисловодск уката вунонтэм кылиз Курорт паркен. Огнуналскын кутсконысеныз пумозяз сое ортчыса нокызьы уд вутты — 948 гектар вылын интыяськемын. 1998-тӥ арозь со Европаысь тужгес бадӟым паркен лыдъяськиз. Но собере ог 400 гектарез приватизация улэ шедиз.

Нош кутскон та парклы сётэмын ай 1923-тӥ арын, соку Кисловодск курортлы пӧрмыны кутскиз. Туннэ паркысь пумитаны луэ нюлэс коӵышез. Нош удалтӥз ке, адӟыны кылдоз беркутлэсь лобамзэ но — бурдъёсыз ог 3 метр пасьта. Паркын 250 пала пӧртэм писпуос, 880 пала турын-куаръёс будо. Нош ма быдӟа интые мерттэмын розаос! Ог 80 сортэз будэ татын. Жаль, ӧз кылды сяськаяськон вакытсэс адӟыны — вазьгес на вал. Розаослэн долиназы уката чеберске, пе, гужемлэн кыкетӥ ӝыныяз — тае адӟон понна гинэ но мон эшшо одӥг пол Кисловодске вуылыны дась!

Ваньмы огкадесь!

Кисловодск вунонтэм кылёз трос выль тодмоосын но. Россилэн пӧртэм сэрегъёсысьтыз шутэтскыны вуо татчы. Ӧжыт ӧй вал Алтайысь — поездэн 4 нуналлэсь кема лыктыны вырим, шуизы. Трос вал Москва котырысь. Эшшо тросгес — Уйпал Кавказ республикаосысь. Феликс — Владикавказысь пожарной. Ачиз верамъя, ужез секыт ӧвӧл, но луо сыӵе тылпу потонъёс — жадемед-куалектэмед быдэс арлы тырме. Ярано, Владикавказын гужем ӵем зоре, гурезьёс пилемъёслы кошкыны уг сёто.

Лиза но Мёлек — сузэръёс-кабардинкаос. Одӥгез нылпи садын, мукетыз школаын ужа. Ӵошатӥм: уждунъёссы асьме шаерысь дышетӥсьёслэнлэсь но воспитательёслэнлэсь уг висъясько. Мёлеклэн 3-ез ик пиналъёсыз школьникъёс ай. Лизалэн нылыз но, пиез но ас семьяосынызы Москваын уло ни — Кабардино-Балкариысь егитъёс Россиысь бадӟым городъёсы кошко, пе. Кузпалыз ӧвӧл ни.

— Монэ со транспорт дугдыллониысь лушказ вал, — тодаз вае нылкышно. — Одӥг-кык пол гинэ адӟылэме вал. Но туж умой улӥм…

Вераськонамы пыро ингушкаос: милям, пе, али нылэз лушканлы пум поныны выро. 200 сюрс манет штраф тупатэмын ни — сое мечете сётыто.

Индира — Грозныйысь. Шуэ: песянаез Индиысь премьер-министрлы Индира Гандилы туж синмаськемын вылэм, соин нунокезлы чебер ним понэм. Кык вылӥ образованиен. Нырысетӥез — педагог. Анаез Грозныйысь дышетонъя управлениын, сузэрез школаын ужало. Но Индиралэн соослэн кадь пичи уждунэн улэмез потымтэ. Экономистэ дышетскем на. Усьтэм аслэсьтыз салонзэ. Ушъя президентсэс Рамзан Кадыровез: благотворительностен туж трос выре, уката юрттӥське трос нылпиё семьяослы. Ачиз азе чурытэсь куронъёс пуктэ, калыклы но юскиськыны уг сёты…

Соку ортчымтэ на вал Россилы президентэ быръёнъёс. Кыӵе луоз кунмылэн ӵуказе нуналыз — та сярысь вераськонъёс ӧз чусомылэ. Озьы уката валай: странамы бадӟым, калыкъёс трос пӧртэм, но ваньмы одӥг кадь малпанъёсын, одӥг кадь осконъёсын улӥськом…

Элина Кумачёва

Удмурт Дунне
By Удмурт Дунне Июнь 28, 2018 16:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<