Тӧр шорын: Висёнэз кылэ лор Галина Ушакова

Удмурт Дунне
By Удмурт Дунне Июнь 19, 2018 14:15
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Ижысь 6-тӥ поликлиникаысь лор ёзэтэн 20 ар пала кивалтэ ини удмурт врач Галина Николаевна Ушакова. Со эм удысын 40 ар пала тырше ини. Сюлмысь ужамез понна пусъемын Удмуртиысь Правительстволэн, Удмуртиысь Тазалыкез утёнъя министерстволэн Данъян грамотаосыныз, кылем арын луиз Удмуртиысь дано врач. Галина Николаевна верамъя, яратоно ужез сое шудо кариз. Эмчиослэн удыс праздниксы азьын вераськиськом врачлэн данэз пумысен.

Галина Николаевна Ушакова эм удысын 40 ар пала тырше ини.

Врач луо!

— Нырысетӥ классын дышетскыкум ик, врач луо шуисько вылэм, — вера Г. Ушакова. — Та ужлы синмаськон ӵужапаелэсь но апаелэсь, оло, паласькиз. Мемее-дядяе эмъяськон удысэн нокызьы герӟаськымтэ.

Вордӥськи мон Можга ёросысь Изошур гуртын. Мемее но дядяе, Наталья Семёновна но Николай Григорьевич Григорьевъёс, 6 нылпи вордӥзы, одӥгез 5 аресказ скарлатиналэсь кулӥз — мон берпуметӥез, шумес пыдэс.

Мемей 18 аресказ ик Акаршур гуртын бригадир луыса ужаны кутскиз. Дядяелы быземез бере Изошурын скал кыскись вал, сомында нылпи вордыса, дышетскыны ӧз быгаты ни. Мемее туж ужась, син азям котьку пуксе солэн муш сямен тыршемез, сиськыны гинэ но гань-гань ӧз пуксьылы, вань ужзэ бызьылыса лэсьтылӥз. 3-тӥ классын дышетскыкум ик, мемейлы скал кыскыны юрттылӥ. Али со 91 аресаз мынэ ни. Изошурын бадӟым нылыныз улэ.

Дядяе Быдӟым оже ветлэмын, 3 пол сӧсырмылэмын. Война бырытозь, сое гуртаз келязы, инвалид луыса берытскиз. Со нюлэскась но, колхозын бригадир но вал, нюлэс дасяны ветлылӥз, берло пенсие потытозяз, сторожын ужаз. Дядяй лэсьтӥськонэз зол тодэ вал, сое ӧтьылӥзы коркалы инъет дасяны. Киыз зол сӧсырмемын вал ке но, весь тӥрен ужалляз.

Ӵужапае Людмила Пояркова фельдшер вал. Бадӟымез апае Надежда эмсузэрлы дышетскиз. Со монэ индылэ вал, школа бере враче дышетскыны мед мыно шуыса. Семьяямы туж тупаса улӥмы, куинь агайёсы, монэ школае мынэмлэсь азьло ик, лыдӟиськыны, гожъяськыны дышетӥзы.

Пичи дыр.

3-тӥ классэз быдтӥ Изошурын. Вылын Юриысь 8 классъем школаез «5»-лы гинэ йылпумъяй. Классной руководителе Анатолий Анисимович Афанасьев дышетӥсь луыны дэмла вал, но мон аслэсьтым удысме азьло ик бырйи вал ини ук. Одӥг пол вуоно профессия сярысь сочинение гожтыны куризы. Котырам медаз ере шуыса, киномеханик луо шуыса гожтӥ. Ма, бен, со уж но туж кельше вал. Гуртамы азьло кино возьматъязы. Калык яратыса отчы ветлылӥз, но огвакытэ кино адӟытэмысь дугдӥзы. Дышетскыса, оло, гуртоосме киноен шумпотто шуыса но малпалляй. Малпасько вал 10-тӥ классэз быдтэме бере медицинской институтэ пырыны. Но мемей шуиз: оло, экзамен сётэмед уз луы, ойдо медучилищеын дышетскондэ азинты. Можгаысь медучилищее документъёсме сётӥ. Мыным соку ик ивортӥзы, экзаменъёстэк дышетскыны кутозы шуыса. Угось аттестатам «5»-ёс гинэ вал.

Роддоме — тракторен

— Эшъёсыным яратӥськомы вал арган шудэм улсын кырӟалляны, но мынам куарае туж ӝог пуксьылӥз. Пичи дырысеным курадӟылӥ ялан куарае быремысь. Училищеын милемыз дышетӥз лор врач. Одӥг пол практикае нуиз, больницае лыктэм адямиослэсь кылэмзэс эскерыны куриз. Шыпыртыса лыдпусъёсты верано вал. Дышетӥсе паймиз но шуиз: тынад туж умой пӧрме, лор врач луод, дыр. Нош эшъёсы шыпыртыса вераны ӧз быгатылэ — соослэн шара верам кадь пӧрмылӥз. Мон шуисько: пичи дыръям ньылоны ӵемысь висьылӥз, шыпыртыса вераськыны дыши. Соку йырам ӧй но вал ай лор врач луыны, малпасько вал фельдшерын ужаны.

Мукетъят практикае Пычас больницае ыстӥзы. Отын Агафонов фамилиен лор врач ужаз — йӧно, сэзь. Йыраз рефлектор (пелез учкон арбери), ньылонын, пельын сыӵе секыт операциос лэсьтылӥз, ну сокем со мыным чебер, визьмо потэ вал. Соку мон малпай, кыӵе умой лор врач луыны. Медучилищеез быдтыса, 3 ар ужаса гинэ, институтэ пырыны луэ вал.

Озьы Дэри ёросысь Макарово гуртэ распределениея келязы. Дядяй монэ чемоданэн Дэрие вуттӥз, отысен Макаровое сюрес ӧй вал. Гольянысь валтӥсь врач милемыз «скороен» пумитаз — гуртэ вайиз. Сыӵе уг поты вал тодмотэм азе кылеме. Но Кам дурысь гуртын улонэ туж шулдыр ортчиз. 3 ар отын фельдшер луыса ужай.

Макаровое лыктэме бере 1-2 арня ортчиз гинэ, гурезь йылын егитъёсын ӟечыраса пукыкумы, кесяськем куараез кылӥмы: «Врача! Врача!» Пинал йырсазьзэ ыштэм. Семьяосыз, мар луиз шуыса, номыр вераны уг тодо. Вирзӥбетсэ мертай, ваньмыз умой, нош температураез ӝутӥськемын. Кынманы шедьтэм, малпай, температураез зӥбломытӥсь эмъюм пуктӥ. Кӧня ке дыр ортчиз, нош ик ӧтисьёс луизы: нылпимы, пе, борддор кузя тубыны турттэ. Таизлэн давлениез бадӟым, укол пуктӥ. Соос дорысь потыса вуттӥ гинэ, мукетъёсыз лыктыны курыса вазиськизы. Пиналмы, пе, ас понназ мар ке вераське, шырез, кыез адӟе, соосты кутыны турттэ. Ньылетӥез пиналлы но урод луэм, таиз ӧскыса улэ. Пайми ини, мар ваньзылы огдыре луэм. Нош соос пичиесь ай — быдэн 4-5 арес. Гуртын машина ӧвӧл, трактор шедьтыса, ваньзэс отчы пуктӥ но Гольянэ нуи. Озьы уйпал 11 часын кутскыса, пиналъёс котыртӥ уйбыт бергай, ӵуказеяз ӵукна 6 часын гинэ Макаровое пыдын бертыны потӥ. Нош пумитам тракторен 5-тӥ пиналэз Гольянэ ваё. Таиз сазьтӥськемез бере верам ни, эшъёсыныз урмонтурынлэсь (белена) выжызэ сииллям шуыса. Вань нылпиосты Дэрие нуизы но кӧт пушсэс чылкытатӥзы.

Макаровоысь егит фельдшер.

Пияны вуэм нылкышноосын но трос сюлмаськонъёс кылдылӥзы. Зор-кот дыръя гуртысь машинаен потыны уг луы вал, сюрес вылын бадӟым гопъёс. Пияно нылкышноез, бадӟым питранэн «Кировец» тракторе пуктыса, Иже нуисько вал. Ижевскетӥ уйин со тракторен ворттылӥськом вал ини: одӥгаз роддоме вуиськом — интыос ӧвӧл, мукетаз но уг куто, озьы быдэс городэтӥ ортчылӥмы.

Пуртэн бышкалтэм муртэз поттоно луиз мотоциклэн. 2 воргоронъёс юиллям, ваче вуиллям, огез мукетсэ пуртэн ӵогъялтэм. Нош больницае нуыны машина но, трактор но ӧвол. Таӵе секыт трос тодэмез кулэ карись учыръёс юнматӥзы враче дышетскон мылкыдме.

Висисьёслэсь мӧзмон

— Макаровоын ужакум ик, нялтас Гольянын терапиын дежурить карылӥ на. Гуртысь комсомольской организацилэн ужаз пыриськылӥ, гурт кенешлэн депутатэз но луылӥ. Туж куро вал партие пырыны но «Камский» совхозысь комсомольской организацилэн секретарез луыны. Но мынам йырам институтэ пырон сярысь малпан ялан бергалляз, но фельдшерын ужакум, экзаменъёслы дасяськыны дыры уг тырмы вал. Дядяен вераським но, со шуиз: секретарь луид ке, институтэ уз лэзе ни. Врач луэмед потэ ке, дышетскыны мын.

Озьы Дэри ёрос больницае куриськи, институтэ дасяськыны малпаса. Монэ медицинской статистика лэсьтыны басьтӥзы. Кулэ вал быдэс ёросысь висисьёслэсь лыдзэс гожъяны, больницая отчётъёс лэсьтылыны. Но бумага уже 2-3 арнялы выйыса, азьвыл ужелэсь мӧзмыны кутски. Сыӵе берлань фельдшере мынэме потэ! Больница бордысь ик «скорое» ужаны куриськи. Озьы мон нуназе кабинетын пуки, ӝытазе «скороен» висисьёс доры поталляй. Пересьёслы, лек пыктосэн висисьёслы укол пуктылӥ, вина юисьёслэсь кӧт пушсэс чылкытатылӥ. Висисьёс доры шумпотыса мынӥсько, малпасько, кыӵе умой ук фельдшерын ик ужаны. Сыӵе мӧзмисько вал висисьёсылэсь, ваньзэсты сыӵе йӧнатэме потэ вал. Одӥг пол «скорое» жингыртӥзы — Изгурт вадьсын машинаос шуккиськиллям. Одӥгезлэн пыдъюмылъёсыз (голень) шори чигиськиллям, лыосыз ик кыре потэмын вал. Нырысьсэ соку таӵе секыт шуккиськонэз адӟи. Со адямиез Нырысетӥ элькун больницае вуттӥ. Озьы быдэс, гужем интитутэ пырытозь, «скоройын» ужай, нялтас экзаменъёслы дасяськи.

Дышетсконо!

Пычас больницаын практика дыръя.

— Пыри Ижысь мединститутысь эмъянъя факультетэ. 1-тӥ курсын ик тодматски вуоно кузпалыным — со пожарной вал. Гужемаз сюан лэсьтӥмы ни, нош 2-тӥ курсын нылпимы вордӥськиз. Туж секыт вал дышетскыны но нылпиез утьыны. Мемей зол юрттӥськылӥз. Нылыным одӥг толэзь гинэ пуки но дышетскыны потӥ. Угось азям ужпум пуктӥ — дышетсконме нокызьы но куштыны уг яра. Кузпалы но мылкыдме туж бурдъялляз. Гужемзэ нылмы мемей-дядяй дорын улӥз. Отын ик удмурт кылэз дышетӥз.

5 ар дышетскыса, специализация быръёно луиз. Мынам сюлэмы хирургия борды кыскылӥз, лор врач луо шуыса малпалляй. Ма, фельдшер дыръям ай ки улам басьтыны сюриз отоларингологлэн справочникез — со вал медициная нырысетӥ книгае, нош со вакытэ книга шедьтыны шуг вал.

Лоръёс хирургия ёзэт пыр потылӥзы. Субординатураын дышетскыкум, милемыз юнматӥзы Аркадий Мальчиков профессор, хирург борды. Милемыз операциосы кыкетӥ ассистентэ шуыса басьтылӥзы. Ми тӥрлыкъёс сётъямы, курикъёс возимы, вурылэм интыысь сӥньыссэ утялтылӥмы, висисьёсты эскерылӥмы. Озьы дышетским киын ужаны, пичиесь операциос лэсьтыны, секыт висисьёсты утялтыны.

Госэкзаменмес 6-тӥ курс бере сётӥмы огъя хирургияя, нош 7-тӥ курсын интернатура бере — отоларингологияя. Отын кивалтӥсьмы вал Нырысетӥ элькун больницаысь та ёзэтэн кивалтӥсь Владимир Торопов. Быдэс арлы милемыз, студентъёсты, со больницаын врачлэн уженыз тодматӥз. Быгатӥмы ини асьмеос нырын, пельын, ньылонын куд-ог операциос лэсьтыны. Интернатураын кивалтӥсе вал хирург Майя Александровна Ворончихина. Та врачъёслэн визьнодамзы быдэс улонам ужаны юрттӥз, ужме яратыны дышетӥз.

Янгышаны уг яра

— Интернатураез быдтэме бере Ижысь 4-тӥ больницаын лор врач луыса 5 ар ужай. Нялтас кутскылӥ дежурной врач луыса ужаны 8-тӥ номеро больницаысь лор отделениын. «Скорой» пелен, нырен, ньылонэн герӟаськем секыт учыръёсы йӧнатыны вайылӥз. Озьы нуназе 4-тӥ больницаын ужай, уйзэ — 8-тӥ больницаын, семьяме рос-прос ӧй адӟылы. Койкаын кыллись висисьёсты эскереме, хирурглэсь ужзэ быдэсъяме туж потылӥз. Но нылы пичи вал ай, соку гинэ школае мынӥз. Уй ужме куштоно луи.

Врачлы янгышаны уг яра, солэн кияз — адямилэн улонэз. Одӥг пол «скороен» кышномуртэз вайизы — куараез бырем. Учкисько — солэн гульымвыжыяз (гортань) дифтерия луэм, туж зол ни. Нош та висён али туж но туж шер пумиськылэ. Сое учкытозям, ки вылам ик кулӥз, номыр кареме ӧз луы. Нокин уг оскы вал таӵе диагноз пуктэмелы. Бӧрысь эскпертиза но мынам верамам ик вуиз. Валтӥсь врачмы монэ, соку ай егит специалистэз, сыӵе шер пумиськылӥсь висёнэз валай, шонер диагноз пуктыны быгатӥ шуыса, ушъяз. Нош мон уйёсы изьыны ӧй быгатылы куректэмысьтым, адямилэсь улонзэ утьыны ӧй быгаты шуыса. Пинал йырын ваньзэ сюлэме басьтӥськод ук. Али валасько ни, со учыре номыр карыны ӧй быгатысал шуыса. Берло тодӥ: та кышномуртлэн со висёнлэсь ик пиез но, картэз но кулӥллям. Та кышкыт висён шер ке но, али но пумиськылэ, солэсь дунтэк вакцина пукто ук 10 арлы одӥг пол, адями ачиз тазалыкез понна сюлмаськыны кулэ.

Вордскем Изошураз.

6-тӥ больницаын лор отделениен кивалтӥсь Алексей Зараев кемалась ӧте ни вал доразы ужаны. Одӥг пол жингыртӥз, ӵектӥз ёзэтэнызы кивалтыны. Ассэ, пе, Вир сётонъя элькун станцилы кивалтӥсе юнмато. Та ныпъетэз вормыны уг быгаты шуыса, кышкасько вал, но мыноно кариськи. Табере 21 ар отделениен кивалтӥсько ини. Ӟеч ужасьёсын, ӟеч кивалтӥсьёсын ужаны секыт ӧвӧл. Поликлиникамылэн кивалтӥсез Татьяна Чистоусова врачъёсмы понна но, висисьёс понна но зол сюлмаське.

Али больницаос «Бережливая поликлиника» амалъя ужаны кутско. Со врачъёс но, висисьёс понна но сюлмаськыса малпамын. Табере кабинетъёс дорын черодъёс троc уг люкасько ни, адямиос гожтӥськем дырлы вуо, медицинской картаоссы но электрон амалэн, мукет больницаосы направлениос гожтыны капчигес но шаплыгес пӧрме ни.

Врачъёслы висисез учкыны 10-15 минут сётӥське. Со, конечно, туж ӧжыт. Но трос тодон-валанэн, ас удысаз кема ужам врач та дыр куспын висёнэз валаны, адямиен вераськыны вуттоз. Но висисьлы тросгес саклык кулэ. Мынам висисьёс шоры аслам учконэ: адями больницае юнме шорысь уг лыкты. Пельыз, ньылонэз уг ке но висьы, лул пушказ вӧсез вань луоз. Уката ик воргоронъёс ласянь: пиосмурт висисько шуэ ке, со озьы ик вань. Мынам коллективе висисез йӧнатон сярысь котыр ласянь сюлмаське.

Егит анай-атай.

Кык полэс шудо

— Шудэ уж бордын. Висёнъёс одӥг кадесь, но котькуд адямилэн со ас сяменыз ортче. Котькуд висёнэз шӧдыны, кылзыны быгатоно. Мыным кельше висисьёсын пумиськыны, кылзыны соосты, валаны висёнзэс.

Больницаысь врачъёс мон удмурт шуыса тодо, бен, мукет отделениосын но удмурт врачъёс ӧжыт ӧвӧл. Мон доры висисьёс удмурт врач доры сямен но лыкто, кин кылэз вала, соосын асьме сямен вераськиськом. Кузпалы но удмурт сюриз — со Глазов палъёсысь, куспамы анай кылынымы вераськиськом. Одӥг ныл гинэ вордӥмы. Со Удмурт кун университетын логопедлы дышетскиз, берло юристлэсь тодон-валанзэ басьтӥз на. Юромо дунын удмурт кылъя курсъёсы ветлӥз. Али ваче каньыл вераськиськом. Алигес 2 поллы шудо луи: нылмылэн пиналыз вордӥськиз.

Ангелина Снигирёва
Туспуктэмъёс: геройлэн архивысьтыз

Удмурт Дунне
By Удмурт Дунне Июнь 19, 2018 14:15 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<