Сандӥ 11 аресысен фермаын ужаз

Удмурт Дунне
By Удмурт Дунне 27 июня, 2018 17:36
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

1929-тӥ арын 6-тӥ октябре Пичи Пургалан Оверка Марпалэн Сандӥ нимо 2-тӥ нылыз вордӥськиз. Сьӧд йырсиё, пичи гинэ мугоро дыды вань улонзэ фермаын ужаз.

Пичи Пурга ёросысь Пичи Бӧдья гуртысь А. Викулова.

1941-тӥ арын Сандӥ 4-тӥ классэз йылпумъяз. 22-тӥ июне кутскиз война. Трос калык ожмаськыны кошкиз. Оверка Марпалэн семьяяз дядяйзы сяна воргоронзы ӧй вал. Арлыдызлы луыса сое войнае ӧз басьтэ ни ке но, 11 аресъем Сандӥлы пыраклы фермаын ужаны кылёно луиз.

— Сӥзьыл эшъёсы школае мынӥзы. Мон но бакча бертӥ шур кузя лушкем гинэ кошки. Нош фермаын монэ ыштӥллям. Школаысь бертӥ но, дядяе, езэ кутыса, берпалам сётъяз. Вӧсь луэмме но ӧй шӧды кадь, но кӧты туж ӝож луиз, — тодаз вае Шура апай. — Туж дышетскеме потэ вал. Нош дядяе шуиз: «Милемыз школа сюдоз-а мар-а?» Война вакытэ туж трос тыриськонъёс вал ук: скалэн, куреген улыса но, йӧлэз, вӧез, сӥлез но курегпузэз сиыны ӧз кылды, ваньмыз выт тырыны пичиен-пичиен кошкылӥз.

Котьмае чидано луиз фермаын. Кунянъёсыз люктаны ву колодчаысь карнанъёсын нуллӥзы. Кутонзэ бергатыны сузьытэк, пуклё вылэ султыса, ужам.Кызьы колодчае ӧй усьы, пайме нылкышно. Сандӥ пичи мугоро вал бере, ведраосыз ӧжыт гинэ музъеме ӧз йӧтылэ. Нош кунянъёсты возьмакуз, пудоос кыдёке кошко ке, корт кобы борды чиньы зӧкта кортэн кокаллям, озьы анаез индылэм. Кунянъёс, юон сёто малпаса, соку ик бызьыса берен берытско вылэм.

— Трос тодон-валан сётӥз пудо першалмы — Алексей Борисов. Со войнае ветлӥз — пал пыд бертӥз. Улытозяз пудоен  ужаз бере, эмъяны но дышиз. Алексей Григорьевичлэсь вань верам кылъёссэ пелям понылӥ. Соин  ик мынам сюдэм пудоосы котьку чебересь но тазаесь вал, — вера Шура апай.

Война бырем бере клубе калык кырӟаны потаз. Сандӥ но пӧлазы вал, уго пичи дырысеныз туж кырӟаны яратэ вал. Гуртысьтызы Михаил Кузьмич Маштаков кивалтэм улсын «Юж-Пурга» колхозын хор кылдӥз. Одӥг пол Удмурт театрын ортчем смотр-конкурсэ но пыриськизы. Отчы элькунысьтымы калыкысь потэм коллективъёс вуизы. Кин нырысетӥ инты басьтоз, соос ик, пе, Москвае мынозы. Алнашъёс шулдыр кырӟазы бере, пургаос соослы ик нырысетӥ инты сётозы шуыса малпазы. Соку Михаил Кузьмич шуэм: маин меда паймытом ай жюриосты? Сцена вылэ потыса, удмурт кырӟан вискы ӟуч кылъёсты пыртыса, кырӟазы. Туж шулдыр потӥз, лэся, кырӟанзы, уно пол сцена вылэ ӧтчазы на. Озьы пургаослы Москвае вуылыны удалтӥз. Сандӥлы 19 арес вал. Вылазы дукесэн, кинлэн вань пыдазы катаен, нош Сандӥ тодмоезлэсь бареткизэ курем, йыраз вож куаро, горд сяськаё чебер кышет керттэм.

Москваын «Колхозлэн паськытэсь лудъёсаз» кырӟанэз быдэстӥллям. Отын нош ик нырысетӥ инты басьтӥллям. Ваньзы паймыса юало, пе, кытысь, кин луо, мар ужало. Нокин но уг оскы, соос огшоры скал кыскисьёс, пудо сюдӥсьёс, кыед куясьёс шуыса. Хорлы патефон кузьмаллям но быдэн 300 манет сётӥллям. Сандӥ шумпотыса 2 дукеслы тырмымон сукно кесэг, буртчин кышет басьтэм. Со кышетсэали но синпельлы возе на.

1954-тӥ арын «Юж-Пурга» хорлы нош ик Москвае вуылыны шуд усиз. Таяз учыре нылкышноосты рос-просгес дасязы ини: городын дэремъёс вуртытӥзы, чебер эктыны дышетӥзы. Оскоды, оло, уд, но «Зарни сӥзьыл» кырӟанэз быдэстыса,  хор нош ик нырысетӥ инты басьтӥз, хорлы баян кузьмазы.

— 1955-тӥ арын декабре монэ Пичи Бӧдьялась Онуфрий Викуловен тодматӥзы. Ма, кельшиз, синмаськи но, ялан огнам улом-а мар-а шуыса, бызёно кариськи. Озьы мон Бӧдьяла вуи. Соку ик фермаын уж сюриз. Кунян сюдӥ, скал кыски. Мыным туж чырткем, умой ужась Лёня Зотов юрттылӥз, мар курисько, ваньзэ быдэстэ вал. Гуртын ваньмы тупаса улӥмы, кытӥ кырӟаськом, кытӥ бӧрдӥськом вал. Тӥни озьы, 1984-тӥ арозь, пенсие потытозям, фермаын ужай, — тодаз вае Шура апай.

Фермаын ӟеч тыршемез понна Александра Викулова пӧртэм данъетъёсын пусъемын, озьы ик со ожысь но ужысь ветеран, «Дети войны» медалез вань.

Тӥни сыӵе капчи мылкыдо, кырӟаны яратӥсь кышномурт улэ милям Пичи Бӧдья гуртамы. Али но солэн жингрес куараез чузъяське на. Кузпалыныз соос 2 нылъёс вордӥзы, 4 кузя нунокъёсыз вань, но жаляса верано, кузпалыз улонысь кошкиз ини. Али пичиеныз нылыныз улэ. Шура апайлы 88 арес ини, но кышномурт тэк пуконэз уг вала. Кыштыр поръя, ыж гон черсыса, туэ 18 куз пыдвыл керттэм ни.

Ми, Шура апай, вань гурт калыкен сӥзиськом тыныд тазьы ик кыштыр-каллен, висьытэк 100 арескозь улыны, ноку но капчи мылкыдыд медаз быры.

А. Бочкарёва
Пичи Пурга ёрос,  Пичи Бӧдья гурт 

Удмурт Дунне
By Удмурт Дунне 27 июня, 2018 17:36 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<