Пичи Пурга ёросысь Норья черкогуртлы кулэ выль амбулатория. Воштӥськоз-а югдур?

Удмурт Дунне
By Удмурт Дунне Июнь 26, 2018 12:01

Пичи Пурга ёросысь Норья муниципал кылдытэтэн кивалтӥсь Николай Зайцев вазиськонэн вуылӥз Россиысь Президентлэн общественной приёмнояз. Кыӵе куронэз вал солэн? Воштӥськоз-а табере гуртоослэн улонзы?

udmgossovet.ru

Пичи Пурга ёросысь Норьяысь больницалэн югдуреныз тодматскизы Кун Кенешысь депутатъёс.

Чимаса шудэм уг поты ни

Норья — Пичи Пурга ёросысь одӥгез чеберез черкогурт шуим ке, ум янгышалэ, дыр. Син шоры соку ик йӧто чылк-чылк утялтэм урамъёс, чылкыт вуэн пачылась шуръёс-тыметъёс. Гурт уката но шулдыр адӟиське, вырйыло-нюко интые пуксеменыз. Норья шорын ик — школа, ужало нылпи сад, аптека, ветлечебница, амбулатория. Ог 1 сюрс пала улӥсез. Муниципал кылдытэтэ пырись мукет но гуртъёсты лыдэ басьтыса — ог 1 сюрс 500-лэсь ятыр.

Но таӵе ӟеч улӥсь гуртын но сюлмаськонъёс шедё вылэм. Кылсярысь, амбулаторизы интыяськемын вашкала пу юртэ — кыӵе арын со пуктэмын, нокин уг тоды ни. Гуртоослэн верамзыя, 150 арлэсь ятыр ортчемын. Муниципал кылдытэтлэн йырыз та больница пумысен ик вазиськылӥз Россиысь Президентлэн приёмнояз: лыктэ, пе, асьтэос учке, отын калыкез йӧнатыны луоно на-а кадь, егит специалистъёслэн сыӵе интыын ужамзы потоз-а? Приёмез соку нуэ вал Кун Кенешлэн Тӧроез Алексей Прасолов.

Парламентлэн Тӧроез Алексей Прасолов та нуналъёсы Норьяла потаз, соин ӵош — Президиумлэн ёзчиосыз, озьы ик тазалыкез утёнъя министр Игорь Титов, Пичи Пурга ёрослэн йырыз Сергей Юрин, Пичи Пурга ёрос больницалэн кивалтӥсез, Кун Кенешлэн депутатэз Наталья Зямаева. Амбулаториез пыр-поч учкизы, кенешизы эмчиосын но висисьёсын.

Больницалэн лапкам пу юртэз котыраз пушъем куакъёс пӧлысь ӝыныё гинэ адӟиське на. Укноосыз жальмаса кадь учко шоре. Пушказ пыриськод ке, уката паймоно: борддоръёс пырдыса усьыло, ӧсъёс, укноос, ӝӧк-пуконъёс, кушеткаос кылем даурез тодэ вайыто. Туала куронъёслы тупась эмъян тӥрлык син шоры уг йӧты. Алексей Прасолов эмчиосын тодматскемезлэсь азьло вазиськиз коридорын пукись висисьёслы. Соосыз одӥг ымысь сямен пумитаз веразы:

— Эмъясьёсмы милям туж умоесь: ужзэс тодо, вазиськисесь…

Чакламъя больницаын 7 муртлы уж вань. Но туннэ татын ӧвӧл врачсы, стоматологзы выжиз Пичи Пургала — татысь кабинетаз пинь йӧнатыны кышкыт луиз, ужан висказ ик вӧлдэтысь штукатурка усьыны быгатоз…

— Озьы али ми 5 кузя ужаськом, — вераз фельдшер Елена Нурканова. — Вань на лаборанткамы, эмъясь сузэрмы, эмъясь братмы, санитаркамы. Нуналаз та вакытэ ог 15-20 мурт, юрттэт курыса, вазиське. Толалтэ йӧнатӥськисьёс тросгес луо. Норья калык сяна, бордамы юнматэмын Улӥ Посьтолысь нылпиос — 114 кузя. Озьы оглом 1 сюрс 200 пала адямиез учконо луиськом.

Одӥгез умой: больница вӧл-вӧл, буш кабинетъёс но вань. Угось 380 квадрат интыын 25 интылы стационар но вылэм, татысь одӥгаз палатаын нуныос, пе, вордскылӥзы ай. Но ог 10 ар талэсь азьло ни стационарез пытсазы, нуназе ужась 5 койка гинэ кельтӥзы. Озьы али татын коть чимаса шуд.

Ог 10 ар талэсь азьло ни стационарез пытсазы, нуназе ужась 5 койка гинэ кельтӥзы.

Но эмчиос соглаш карисько ни ӟоскытгес юртэ но выжыны — ужаны гинэ мед луоз, пе. Нош калык куре на: больница гуртын ик мед луоз вал — али со гурт сьӧрысь вырйылын, отчы тубаны капчи ик ӧвӧл.

— Одӥгез амал: фельдшер-акушер пункт усьтыны, — дэмлаз Алексей Прасолов. — Но асьтэос валаськоды, солэн быдӟалаез таизлэсь шӧдскымон пичигес луоз — ог 80 квадрат метр гинэ…

Нош муниципал кылдытэтлэн йырыз инты дэмлаз — школа вадьсысь кыралэ. Со али муниципалитетлэн луэ, озьыен, музъемлы документъёсын шугъяськонъёс кылдыны кулэ ӧвӧл. Пурга ёрос больницалэн валтӥсь врачез ватсаз на: ставкаос кылёзы, Пичи Пургала кошкем пинь йӧнатӥсь но берытскыны кулэ.

Оскон кылдӥз, матысь дыре норья калык туала куронъёслы тупась фельдшер-акушер пунктын йӧ-натӥськыны быгатоз ни шуыса.

Шедьтоно врач!

Кылиз на эшшо одӥг сюлмаськытӥсь ужпум — кулэ огъя практикаен врач. Ёрос больницаен кивалтӥсь Наталья Зямаева верамъя, «Гуртысь эмчи» программая районэ ог 30 егит специалистъёс лыктӥзы ни. Ӝыныезлэсь ятырез туннэ ужало. Куд-огъёсыз корка но пуктӥзы — пыраклы кылён сярысь малпасько. Но соос ужало ёрос центрын. Гуртъёсы, кылсярысь, Норьяла мынэмзы уг поты. Мар кароно?

— Шедьтоно та гуртын ик вордскем, враче дышетскем муртъёсты, — малпанэ вуиз депутатъёсын, ёросысь ки-валтӥсьёсын пумиськонэ люкаськем гурт калык.

Эсьма, кӧня ке муртъёсты тодазы но вайизы. Наталья Зямаева соосын кенешыны пумит ӧз кариськы.

— Но егитъёс мед кылёзы шуыса, гуртамы сюрес но кулэ вал, — ӧз ыштӥське гуртоос. — Сельхозпредприятимы банкрот луэм бере тросэз уже Иж пала ветлыны кутскизы. Сюресмы луысал ке, оло, нуналлы быдэ бертылысалзы но.

Отӥяз вераськон эшшо пыдлогес пыре. Нылпи садын ужасьёслэн юанзы кылдэ: школаосысь дышетскон тӥрлыкез выльдонъя программа кутэмын вал, нош ку тодазы ваёзы нылпи садъёс сярысь — анай-атайёс чот ремонт но лэсьтоно, шудонъёс но басьтоно луэ…

Югдурез умой-умой ва-лэктӥзы Кун Кенешлэн Тӧроез Алексей Прасолов но ёрослэн йырыз Сергей Юрин. Гуртоос соглаш кариськизы: шуг-секытъёсты вормон понна огкылысь тыршоно. Кун Кенешысь депутатъёс, эшшо но Норьяе лыктом, шуизы. Кылзэс сётӥзы: нылпи садлы кузьымъёс ваёзы.

Гуртсылэн ӵуказе нуналызлы туж оско норьяос. Озьы соос кышкатэк басьтӥсько улонлэсь туала куронъёссэ быдэсъяны но, кылсярысь, доразы туристъёсты кыскон сярысь малпасько — маршрутсы кылдытэмын ни. Кужым сёто соослы гурт шорысьтызы ик нылкышно монастырь но дун-чылкыт Пётр но Павел апостолъёслы сӥзем черк.

Элина Кумачёва

Удмурт Дунне
By Удмурт Дунне Июнь 26, 2018 12:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<