Ожез пуромытӥз сютэм улон. Ижын но Воткинскын восстанилы — 100 ар

Удмурт Дунне
By Удмурт Дунне Июнь 29, 2018 15:26

100 ар талэсь азьло, 1918-тӥ арын сӥзьыл, Ижын но Воткаын улӥсьёс совето властьлы пумит ӝутӥськизы. Соин валче историк, КГБ-ын ужам мурт Алексей Коробейников, архивъёсын бугыръяськыса, кӧня ке книга поттӥз.

Кытын но кыӵе вакытэ ортчиз бугыръяськон. Басьтэмын Омскын 1919-тӥ арын потэм «Ижевско-Воткинская годовщина» газетысь.

— Граждан ожын, мынам учкемея, большевикъёс но, тӧдьыос но ӧй вал, — вера Алексей Владимирович. — Государство куашкамен, калык сярысь малпаськись быриз. Странаен кивалтӥзы бандаос.

Учконо ке, продотрядъёсты, продразвёрсткаез воксё но большевикъёс ӧз малпалэ. Эксэй кивалтон вакытэ ик закон кутэмын вал: крестьянъёс бичам ю тысьсылэсь оглюкетсэ одно ик кунлы сётыны кулэ, уг кылзӥсько ке, кужмысь кароно. Озьы ке но городъёсын сютэм улӥзы. 1917-тӥ-1918-тӥ аръёсы Вятка губерниысь заводъёсын ужасьёс пӧлын асьсэды быдтон учыръёс ӵем пумиськылыны кутскизы. Уждун ӝыны аръёсын ӧз адӟылэ угось. Сютэм улонлы чидатэк ошиськылэмъёс сярысь газетъёс гожъяллязы. Калык бугыръяськыны кутскиз. Бугыръяськемзылэн пайдаез шӧдӥськиз уго. Ас ужзэ тодӥсь, огсыр ужась мужиклы заводын 200 манет уждун тупатъяллязы. Нош йырзэ ӝутӥсьлы, куашетыны дӥсьтӥсезлы соку ик 400 манет юнматъязы, сапег, ю тысь сётъязы. Адямиос, тае адӟыса, малпаны кутскизы: малы мон но бугыръяськисьёс радэ ум султэ, мынам сиеме уг поты шат? Котькуд банда, котькуд бугыръяськисьёс асьсэ куспын асьсэлэсь законъёссэс юнматъязы. Ужась калык йырзэ ӧз тӥялля социализм но коммунизм сярысь. Соос К. Маркслэсь, Ф. Энгельслэсь книгаоссэс ӧз лыдӟылэ.

1910-тӥ арын вордӥськем песянае вералля вал Вотка ёросысь Чёрное гуртазы Граждан ож вакытэ кылдэм югдур сярысь. Ялан, пе, доразы кыӵе ке солдатъёс вуыло вал. Нокин но соку ӧз валалля, гордъёс со я тӧдьыос. Но гуртэ кожон мугзы ваньмызлэн солдатъёслэн одӥг вал: калыклэсь ваньбурзэ талан. Пудозэс вандо, ю-няньзэс калто но кошко. Нокин но калык сярысь ӧз сюлмаськылы. Бератаз гурт калык ӧз чида ни: кылем ю тысьсэс люкаса, кумышка пӧзьтылӥзы, сое бутыльёсын музъеме нюлэскы ватылӥзы. Со ик луиз песянайёсмы понна аспӧртэм валюта, сое, 1990-тӥ аръёсы талонэз сямен, товарлы вошъяллязы.

Малы калык тӧдьы движение пала кыстӥськиз? Тӧдьыос пӧлын закон вал: вием красноармеецлэсь уксёзэ аслыд басьтыны, сое семьяедлы келяны луэ. 1919-тӥ арын Верховной главнокомандующий Александр Колчак янгыш лэсьтӥз, Сибирьын выль уксё — сибиряки — поттыны кутскыса. Соин уго Сибирьын гинэ басьяськыны луэ вал. Фронт чигнаку, сибирякъёс номырлы ӧз яралэ ни. Соин ик калык тӧдьыос пӧлысь кошкыны кутскиз. Большевикъёс со ласянь визьмоесьгес вал: 1920-тӥ арозь печатлазы эксэй вакытысь уксёез, со коньдонлы калык дышем сямызъя оскылӥз. Нялтас вераса, странаын со вакытэ 35 правительство нерге вал, котькудӥзлэн аслаз коньдонэз. Со сярысь «Свадьба в Малиновке» киноын возьматэмын.

— Шаерамы 100 нунал калык бугыръяськиз. Тросэз тӧдьыос сьӧры кошкиз-а?

— 1918-тӥ арын 3 сюрс 446 адями, Ижевской дивизиос кылдытыса, тӧдьыос сьӧры кошкиз — Ижын вань улӥсьёс пӧлысь со 5 процентэз. Кӧня ке сюрс адямиос кошкизы 1919-тӥ арын апреле, соослэсь нимъёссэс рос-прос ум тодӥське. 1922-тӥ арын Китайысь Харбинэ кошкемъёс пӧлын 400 адями гинэ Ижевской дивизиысь вал. Со пӧлысь Удмуртиысь потэмъёс — ог 100 мурт. Кин Ижысь кошкиз, кин городэ берен берытскиз шуыса, архивъёсын бугыръяськоно кариськи. Шараяськиз: 1924-тӥ арозь ваньзы сямен кошкем адямиосмы берытскемын. Зэм, куд-огез кылиллям, нылпи вордӥллям, сое возьматӥсь список вань. Вань нимтулъёс пыремын «Участники Ижевского восстания» книгае.

— Ижын бугыръяськисьёс сярысь со вакытысь газетъёс кема чалмыт улӥзы…

— Самараысь газет гинэ бугыръяськон сярысь пичи поттылӥз. Нош мукет газетъёс огпол но ӧз гожъялэ, 7-тӥ августэ большевикъёс Казанез но Ижез ки улысьтызы лэзизы шуыса. Ижын бугыръяськон сярысь печатлан борды тӧдьыос басьтӥськизы. А. Колчаклэн Николай Арнольд пресс-секретарез «Песня ижевцев» кырӟан но гожтӥз. Бӧрысь со калыке вӧлмиз.

— Малы одно ик ижевецъёс сярысь, сыӵе бугыръяськисьёс лачак вал шуиськоды?

— Тӧдьы генералъёслы Ижын бугыръяськон ӝутыны нокыӵе но пайдаез нырысь-валысь ӧй вал. Но Ижын улӥсьёс тӧдьыослэн радазы султӥзы зэмос дивизия кадь, асьсэ командиръёссы но вал. Таӵеез мукет улосъёсын ӧз пумиськылы. Соин ик данъязы. Собере, асьмелэн кавалерия, артиллерия но Галёвоысь флотилия вал. Флотилиын ичизэ 5 вооружённой пароход лыдъяськиз.

— Но нокыӵе восстаниос тӧдьыослы вормыны ӧз юрттэ…

— Тӧдьыос вормыны уз быгатэ шуыса, азьло ик тодмо вал. 1913-тӥ арын Россилэн кун долгез 2 миллиард манет лыдъяськиз. 1916-тӥ арын лыдпус 90 миллиард манетозь вуиз. Франция, Англия, Америка уксё пунэмен сётъязы. 1917-тӥ арын Николай II эксэй престоллэсь куштӥськиз. Со вал дефолт вакыт. Ожмаськон понна винтовка, дӥсь, патрон, чугун сюрес кулэ. Ваньзэ тае басьтон понна Колчак Россилэсь зарнизэ Америкае, Японие келяны кутскиз. Со зарниез ик Урал заводъёсысь ужасьёслы сётысалыз ке, соос пыӵал но, чугун сюреслы кортъёс но дурысалзы, фронтэз но возьысалзы. Англичанъёс асьсэ пала ужазы: зарни запасэз кысконо, Россиез сюпсёно, шуизы. Вань узырлыкез кыскемзы бере Колчакез вузазы.

Граждан ож — кышкыт маке. Адямиос адями луэмысь дугдылӥзы. Тае возьматон понна ик кӧня ке книга поттӥ. Адямиослэсь тодэ ваёнъёссэс, архивысь шараям документъёсты калык син азе поттэме потӥз. Огез книгае — «Ижевско-воткинское восстание: правда победителей». Зэмос югдурез возьматэме потӥз. Кин ке шуэ уго: 70-100 сюрс белогвардеецъёс вал. Озьы луыны уг быгаты. 25 сюрс адями гинэ лыдъяськиз тӧдьыослэн армиязы — та инъетэз вал. Зэм, Ижевской дивизия пыр потӥз 50 сюрс адями: кин ке лыктэ, винтовка басьтэ но пегӟе, я кулэ. Сыӵе лыктӥсь-кошкисез лачак вал, уксё понна но вуылӥзы.

Берло дыре тӧдьы движение бадӟым бизнес луиз. Форма но вуро, реконструкциос но лэсьто. Мода. Но мода лыктэ но, ортче но. Кыле история гинэ.

Елена Сараматова

Удмурт Дунне
By Удмурт Дунне Июнь 29, 2018 15:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<