Оскон: Гужем визян

Удмурт Дунне
By Удмурт Дунне 4 июня, 2018 08:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

4-тӥ инвожое  кутскиз Петров пост. Та визян дыр Паскаен герӟаськемын, соин ик со быгатэ вакчигес но, кузьгес но луыны:  одӥгысен 6 арняозь кыстӥськылэ. 

Тройча бере арня ӵоже шумпотыса вӧсяськиськомы. Озьы ик апостолъёс но, куке соос ас вылазы басьтӥзы Святой Духез, шумпотыса, Инмарез данъяса, солы вӧсяськыса улӥзы. Нош арня ортчыса, соос, пус чӧлтыса, Выль Сӥзёнэз калыкъёслы вӧлмытыны кошкизы. Инмар ведь ачиз шуиз: та верам кылэз, Выль Сӥзёнэз вераны кулэ котькуд адямилы. Тодӥськомы, апостолъёслы но  Святой Духен Инмарлэсь кузьым  лыктӥз: соос вераськыны кутскизы пӧртэм кылъёсын. Огшоры чорыгасьёс, нокыӵе дышетскемзы ке но ӧй вал, сыӵе паймымон уж ортчем бере, шумпотыса, Инмарлы тау карыса,  котькудӥз ас сюрессыя мынӥзы Инмарлэсь осконзэ калыке вӧлмытыны. Асьмеос но озьы ик: Паска бере шумпотыса улӥмы, нош Тройча бере арня ортчыса,  кутскиз чылкытатӥськон вакыт. Со сӥземын Пётр но Павел апостолъёслы, соин ик Петров пост нимаське. Визян дыр ӵапак кыстӥське Петров нуналозь.

Пётрез но Павелэз верховной, нырысетӥ, апостолъёс шуо. Инмар соосты нырысетӥ интые уг ке но пукты, соос дунъямын ужамзыя. Пётрез чакласькомы ке, Инмарлэн со одӥгез яратоно дышетскисез, сое котьку сьӧраз басьтэ вал. Преображение дыръя со Иаковен но Иоаннэн ӵош  адӟиз Иисус Христослэсь воштӥськемзэ. Апостол Пётр адямиосты йӧнатылӥз, кулэмъёсты улӟытъяз но пӧртэм кунъёсысь сюрсъёсын адямиосты христианствое пыртӥз.

Нош Павел апостол дышетскемын вал. Со нырысь христианъёслы пумит выриз, оскисьёсты кутылыса синагогаосы сётъяз, соосты судить мед карозы шуыса. Но со Инмарлэсь кужымзэ ас вылаз шӧдӥз: Павел сукыр кылиз вал, нош Инмар солы адӟыны быгатонлыксэ берыктӥз. Апостол Павеллэн 14 ужъёсыз-посланиосыз асьмелы гожтэмын. Соос ӵем дыръя кутӥсько литургиын, соосъя асьмеос дышетскиськомы, Инмарлэсь тодон-косонъёссэ чакласа, вӧсяськыны.

Милемлы дуно та апостолъёс соин но: удмурт приходмы кылдытэмын Пётрлы но Павеллы сӥзьыса. Соин ик 12-тӥ пӧсьтолэзь — Пётрлэн но Павеллэн нуналзы —  приходмылэн праздникез луэ. Нош солы умой дасяськон понна визян дырез умой ортчытыны кулэ.

Петров пост сиськон ласянь сокем ик юнэсь куронъёс уг пукты: лэземын ӧвӧл сӥльлэсь но йӧллэсь сиёнъёс. Но визян дырлэн тужгес бадӟым кулэлыкез — адями черке мед лыктоз. Малы ке шуоно утиськон — со  сиёнлэсь куштӥськон ӧвӧл, со Инмар доры лыктон. Инмар ачиз шуиз ук, со гинэ утиськыны быгатоз, «кин сиёз мынэсьтым мугорме но кин юоз мынэсьтым вирме». Соин ик пост дыръя адями тыршыны кулэ, черке лыктыса, вӧсяськыны но причастие басьтыны. Ас урод сямъёсыдлэсь куштӥськыса гинэ, Инмарлы матэгес но ярамонгес луиськод. Нош сиёнлэсь куштӥськон асьмелы юрттэт гинэ луэ.

 

 

Удмурт Дунне
By Удмурт Дунне 4 июня, 2018 08:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<