Марий Элын калык сиёнлы сӥзем «Калыксий-2018» фестиваль ортчиз

Удмурт Дунне
By Удмурт Дунне Июнь 20, 2018 15:00

Карлыган музъем вылын Йошкар-Олаысь куноосты удмурт калык дӥсен «Ӟардон» ансамбль пумитаз. Удмурт кырӟанэз ке но быдэстӥзы, солэсь пуштроссэ ми валамы: куноос вуизы шуыса, шумпото.

Мария Главатскихлэн «ВКонтакте» бамысьтыз

Марий Элысь удмурт нылъёс сиён-юонэнызы тодматӥзы.

Котькуд куноез мусурен сектазы, мусурен чаркаез огшоры киысь кие ӧз сётэ — нимысьтыз кутӥсь бодыосын. Со бодызылэн нимыз ӧвӧл, нош ачиз та сямзы песятайёслэсь нылпиослы выже, пе. Чаркаез палэнтыны уг яра — кузёослэсь йырзэс кур карод.

Ӟечбуръяськем-пумитам бере эктыны черод вуиз. Карлыган нылъёс туж чебер потазы залэ, котькудӥзлэн кияз кыӵе ке сиёнэн тусьты — озьы тодматӥзы асьсэ сиёнъёсынызы. Соос шоры учкыса, дыльдымы вияны кутскиз. Соин милемыз соку ик ӝӧк сьӧры пуктӥзы. Вашкала сямъя нылъёссы кырӟан нёжъязы, нош куноос сиёнъёсыз веръязы.

Удмуртъёслэн тужгес тодмо сиёнзы — перепеч. Со быгатэ луыны губиен, курег яке мукет сӥлен, сугонэн, емышъёсын… Ми, соосты веръям сяна, асьмеос но пӧраны дышетскимы.

— Пушкесаз курегпуз трос пононо, ческыт мед луоз шуыса, — валэктӥз «Ӟардон» ансамбльлэн кивалтӥсез Мария Главатских.

Со вордскиз но быдэс улонзэ ортчытӥз Карлыганын, тодэ уно вашкала кырӟанъёсты но сям-йылолъёсты. Собере со вераз вылысьтыз дӥськутэз сярысь:

— Йырам понэмын такъя, азьвыл сое бызьымтэ нылъёс гинэ нуллӥзы. Бускель гуртэ соин мыно вылэм но, пиос соку ик валаллязы, со вуоно выль кенъёс шуыса. Кельшиз ке, отысен ик лушканы быгато вал. Калыкмылэн сыӵе йылолэз азьвыл вал. Нош али такъяен сцена вылэ гинэ на потаськом, соосты асьмеос вуриськом.

Мария Аркадьевнаез кылзэм улсын ми веръяллям мукетъёссэ но сиёнъёссэс. Ӝӧк вылын вал ӵӧжы, табанянь (табань), мильым, зырет.

Тунсыко, но удмуртъёс табаньёссэс но мильымез пуртэн уг вандыло.

— Мильым шундыез возьматэ, — валэктэ Мария Аркадьевна. — Нош яра шат пуртэн вандыны ваньмызлы шуныт сётӥсь, котыр дуннеез югдытӥсь шундыез? Мильымез но табанез киын гинэ тӥялляны яра.

Зыретэн сяна, мильымез сиё кӧжылэсь яке сезьылэсь лэсьтэм кисален, соос но карлыганъёслэн ӝӧк вылазы пуктэмын вал.

2 удмурт пӧрамъёс сярысь ми кылӥмы гинэ: виртырем но карлыган сямен лэсьтэм ты (лёгкие по-карлыгански). Соосты пӧрало пудоез вандэм бере гинэ. Милемлы валэктӥзы, кызьы соосты дасяно, но шуизы, туж, пе, ческыт пӧрме.

Фестивальлэн пумаз сюдӥзы 4 пумо кеньырлэсь (чабей, сезьы, кӧжы но сьӧдчабей) ӝукен — пӧлаз сӥль понэмын. Пӧзьтӥзы сое тылскем вылын бадӟым пуртыын.

— Таӵе ӝукез ми пӧзьтӥськомы праздникъёсы, — азьланьтэ веранзэ Мария Аркадьевна. — Вашкала аръёсы кеньырез быдэс гуртысь бичало вылэм, кин ке кырым, кин ке пуйы сётэ вылэм, но ваньзэ сое одӥг бадӟым пуртыын пӧзьтӥзы. Со вакытысен таӵе ӝукез ми палъёсын «Эшъяськон» нимало. Ми али но пӧзьтӥськомы сое вань гуртоослы но куноосмылы. Паркамы пуктылӥськом ӝӧкъёс, котькудӥз дорысьтыз сьӧраз вае кыӵе ке сиён-юон, ӵошен сииськомы пӧзьтэм ӝукмес но дэмен шулдыръяськиськом. Нош сюанъёсты ми дорын али но быдэс гуртэн ортчыто. Ог 100 ар талэсь азьло кадь ик, вуоно кузпалэз дуре егит пи лыктэ анаезтэк, атаеныз гинэ. Егитъёс коркась корка кырӟаса ветло, нош кузёос соослы кузьым сёто. Но азьвыл басмаос, валес котыръёс, ӵушконъёс кузьмаллязы ке, али уксё сёто ни.

Вань сиёнъёсты веръяммы бере гинэ милемлы чай вайизы. Тодӥмы: удмуртъёс, пе, сое сиськонлэн самой пумаз гинэ потто, куноос бертыны дасяськыку, сюрес вылэ потэмзылэсь азьло. Нош ӝӧк сьӧрын сектало сюкасен но мусурен.

Йылпумъяськиз шулдыръяськон озьы ик, кызьы кутскиз — выступлениосын. «Ӟардон» ансамбльысь пиос возьматӥзы «Агай эктонэз», нылъёс — «Апай эктонэз». Куд-ог движениоссы тупало вылэм пор тыпыртэмлы. Солы паймонэз ӧвӧл: поръёс но удмуртъёс — ӵыжы-выжыос, фин-угор калыкъёс. Соослэн трос огкадез, «тау» кылзы гинэ но.

Маргарита НЕКТАРОВА, Йошкар-Ола
Туспуктэм: vk.com (Мария Главатских)

Удмурт Дунне
By Удмурт Дунне Июнь 20, 2018 15:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<