Мар дасяз туэ Ижкар Гербер?

Удмурт Дунне
By Удмурт Дунне 8 июня, 2018 12:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Дышем сямъя туэ но 12-тӥ инвожое шоркарын но шаерамы улӥсьёсты огазеялоз Ижкарысь Гербер.

Сое радъя Индустриальной ёрос администрация Удмурт кун филармониен ӵош. Нимысьтыз тунсыко площадкаос дасяло «Удмурт Кенеш» огазеяськон, «Удмурт дунне» газет, элькунысьтымы Йӧскалык библиотека но музей но мукетъёсыз. Шулдыръяськонлэн интыез ӧз воштӥськы — котьку сямен, калыкез огазеялоз Кызьпу арама.

Гербер куноосты пумиталоз ини 11 часысен, ӵапак соку ужаны кутскозы нырысетӥосыз площадкаос. Нош ачиз шулдыръяськон усьтӥськоз ай 13 часын бадӟым сцена вылын концертэн. Та нуналэ мылкыд карисьёс быгатозы пыриськыны ӵошатсконъёсы, туспуксьыны нимысьтыз дасям яркыт баннеръёсын, учкыны удмурт киноос, вуылыны удмурт дискотекае, сиыны ческыт ӝук. «Удмурт дунне» ӧте квест шудонэ, со понна команда люкано.

«Удмурт Кенешлэн» кунокуаез таяз арын фин-угор эшъяськонлы сӥземын луоз. Соин, отчы вуыса, лыктэмъёс быгатозы адӟыны пор, мордва, фин но мукет коллективъёслэсь кырӟан-эктонъёссэс, тодматскыны куноосын, удмурт кырӟанъёсын пумиталоз Ижысь «Чильтэр» ансамбль. «Кенешчиос» дорын ужалозы кӧня ке площадкаос: ӵошатсконъёсын, нылпиослы, нимысьтыз инты чакламын луоз туспуксьыны. Герберез радъясьёс малпало на та нуналэ акция ялыны: вотэсын удмурт шулдыръяськонысь #гербер хештеген уно фотоос мед луозы.

Пумиськом 12-тӥ инвожое Кызьпу арамаын. Ӟеч мылкыддэс сьӧрады кутыны эн вунэтэ!

Алёна Михайлова

Удмурт Дунне
By Удмурт Дунне 8 июня, 2018 12:18