Кызьы Лӧпшо Педунь Кулонэз серекъятыны выриз. Николай Бехматовлэн выль гожтосэз пумысен малпанъёс

Удмурт Дунне
By Удмурт Дунне Июнь 20, 2018 17:03

Николай Бехматов (Вольэг Иники, Вольэг Бахматов) кӧня ке произведениосыныз тодмо луиз ини. Соосъя валаны луэ, аръёс ортчемъя воштӥськиз-а гожъяськон сямыз.

Вашкалазэ берыктӥсь

Вольэг Иники удмурт литературае «Юсьёс но куӵъёс» (1995) исторической романэныз пыриз. Гожтосэз дунъясьёс вал ке но, оглом удмурт критика сое ӧз адӟы, шуыны луоз. «Юсьёс но куӵъёс» романлэн инъетэз — этнографической реализм, отын асьме эралэсь азьло улэм ӵыжы-выжыосмылэн (удмуртъёс соку нимысьтыз этнос ӧй вал на) улон-вылонзы возьматэмын. Дышетскемезъя историк луэ бере, Н. Бехматов та удысысь тодон-валанъёссэ чеберлыко амалъёсын усьтӥз. Мыным «шӧйтэк ватон» сям тунсыко потӥз вал, берло та йылолэз ӟуч кылбурчи Влад Шихов но «Кенотаф» нимо кылбур бичетаз кутӥз.

Вольэг Иникилэн мукетыз бадӟым гожтосэз ини ӟуч кылын кылдытэмын. «Песня огненной реки» (2006) масс-культуралэн куронъёсызлы матэ каремын, учыръёс озьы ик вашкала дыръёсы ортчо. Тунсыко конфликт мадьгожез (сюжет) нуэ. Егит Айкай малпаське: 3 агайёс пӧлысь кудзылы — Юберлы, Удинлы яке Варышлы — бызёно меда? Соку Бурки Пужей пиоссэ ӟеч ужъёс лэсьтон понна бадӟым сюрес вылэ келя. Отын соосты будинъёс, меланхленъёс, гелонъёс, ииркъёс возьмало, геройёсмы савроматъёслэн но скифъёслэн ваче нюръяськоназы пыриськоно луо, озьы ик эллинъёслэн но Хорезм кунлэн улонэнызы тодматско. Повесть мыным Шота Руставелилэсь «Витязь в тигровой шкуре» поэмазэ тодэ вайытӥз. Со дыре ик автор Заратуштралэсь верамъёссэ, «Авестаысь» малпанъёсты аслаз чеберлыко гожтосаз укыр «меӵкыт» пыртэм, геройёсызлэсь пушдуннезэс, малпаськон манерзэс лыдэ басьтытэк.

Ӟуч ке но, удмурт

«Сказание о Лопшо Педуне и его друге Иване Дураке» произведениез 2017-тӥ арын потӥз Удмурт кун университетлэн издательствояз. Авторез Вольэг Бахматов шуэмын. Со ӟуч кылын гожтэмын, котьма ке но, мон сое удмурт литература шуыса лыдъясько. Угось гожтослэн валтӥсь героез — удмурт, тросэз учыръёс Удмурт шаерын ортчо, вылаз ик, авторез удмурт бере, дунне шоры учкон но удмурт сямен шараяське. Озьы ке но Вольэг Бахматовлэн выль книгаез пумысен мынам малпанъёсы ваче пумит луизы. Уката ик былиналэн 2-тӥ люкетэз ласянь. Лӧпшо Педуньлэсь дорамы берытскемзэ мон мукет сяменгес витисько вылэм, шӧдске.

Постмодернизм но крестьян реализм. Гожтослэсь жанрзэ «былина» шуыса пусъемлы ӧвӧл паймоно, угось асьме азьын — постмодернизмо текст, кытын автор котькызьы шудыны-шузияськыны быгатэ. «Частушка» яке «водевиль» шуысал ке, мон ӧй шуэрскысал. Адямиослэсь куать пӧртэм выжыоссэс висъян (гиперборейёс, атлантъёс но со выллемъёс), Кулонэн-Мараен шудон, граждан ожлэсь ортчемзэ возьматон — ваньмыз ик татын постмодернизмлэн куронъёсызъя радъямын. Но гожтос постмодернизмо гинэ луысал ке, мон солы таӵе саклык ӧй висъясал, дасо арлы беромыса кылем уж шуыса.

Но татын туж бадӟым инты басьтэ мукетыз ӧр — со «крестьян реализм». Оглом крестьян реализм умой но, урод но ӧвӧл, ваньмыз ик прозаиклэн быгатонэз бордысь потэ. «Сказаниын…» сюлэсь ятыр вужмем ӟуч кылъёс, кудъёсыз сноскаен сётъямын но книгалэн пумаз пыртэмын. Вольэг Бахматовлэн гожтосэз 2-3 поллы вакчигес но пезьдытгес луыны быгатэ вал, крестьян реализмез уже ӧй кутысал ке. Книгалэсь кутсконзэ тодэ ваём. Лӧпшо Педунь (Фёдор Лапшин) Кулонэз серекъятыны турттэ, со понна геройлы 12 ар улон сётӥськоз уго. Педунь олокыӵе но учыръёсты маде, тушмонзэ Иван Дуракен кышкатыны выре, мадёсъёсыз кузесь, серемесэсь ӧвӧл. Но лыдӟисьлэн пушказ оскон возиське на: оло, таӵе нуйтон — со серекъянэз кужмоятон амал? Бен, Лӧпшо Педунь Кулонэз серекъятыны быгатэ, но… солэсь берпалзэ но кунулзэ бичатыса. Нош монэ, лыдӟисез, со уг серекъяты. Татын Лӧпшо Педуньлэн функциез мукет, со философ, кудӥз Галактикалэн миллиард аръем историысьтыз 6 расаос сярысь дышетонэз вӧлдэ, вашкала инмаръёслы — Перунлы, Свароглы, Агнилы, Одинлы, Заратустралы но трос-трос мукетъёсызлы — черкъёс пуктыны малпа.

Озьы ке но серемес югдуръёс текстын кылдыло, но татын соосты, Педунь интые, вера ачиз мадись мурт. Тани геройёсмы Самсонов генераллэн дивизияз шедё. Номыр сыӵе-таӵезэ уг лэсьто («ясновидец» улсын вуонозэ тодэм сяна), со понна соослэн валъёссы туж тузӥесь, учке ай: «встав на дыбы, били передними копытами груди, черепа, шейные позвонки немецких солдат и офицеров и с хрустом разбивали их; распарывали животы и выпускали вон из них кишки» (173-тӥ б.).

Гожтон манер но стиль пумысен. Озьыен, постмодернизмлэн но крестьян реализмлэн тулкымъёссы вылын лэйкаса, Вольэг Бахматов аслэсьтыз стильзэ, гожъяськон манерзэ кылдытэ но шере. Кельше со яке уг — мукет ужпум. Нуйтыса-зульыса мадён манер, куке одӥг предложениын 100-лэсь ятыр кыл пумиськылэ, шудон-шузияськонэз кужмоятэ. 355-тӥ бамысь предложениын 120 кыл, но предлогъёсты но союзъёсты лыдэ басьтоно ке (компьютер куронъёсъя), ваньмыз 156 кыл люкаське. Бен, лыдӟыны шуг, шорозяз уд вуиськы на, кутсконзэ вунэтӥськод ни, но азьпалан эшшо ӝыны предложение на! Со понна автор «клип манерен» малпаськись егитъёслы ӧч каре, тазэ пусйытэк уг луы.

Лӧпшо Педунь но Иван Дурак. Кык геройёсты артэ вуттон — Вольэг Бахматовлэн одӥгез умой шедьтосэз. Асьмеос дышемын ни, Дон Кихот вӧзын одно ик Санчо Панса луыны кулэ шуыса, Шерлок Холмс вӧзын — доктор Ватсон, Чапаев вӧзын — Петька. Озьы ик Лӧпшо Педунь вӧзы ялан Иван Дурак кылдэ. Но татын авторез выльысь пыкылэм потэ: Иван нимысьтыз характер уг кылдыты, со Фёдор Лапшинлэн бездыт «вужерез» гинэ луэ. Солэн огъя функциез Лапшинлы «да, ты прав, Федька» шуон бордын. Мыным озьы потӥз. Бен, Лӧпшо Педунь — йӧспӧртэм философ, со дунне историысь данак учыръёсты тодэ, лушкем интыосысь зарниез шӧдыны быгатэ. Со вӧзын Иван Дурак туж тунсыко символлы-характерлы пӧрмыны быгатэ вылэм.

Ляб но кужмо палъёсыз. Ойдолэ кыкетӥ люкетлэсь пуштроссэ тодэ ваём. Учыръёс асьме палан ортчо. Али Ижевскын но Воткинскын восстание сярысь трос материал потӥз бере, Вольэг Бахматов лыдӟисьлэсь тунсыкъяськонзэ уже кутыны тырше. Азинлэн дивизияз вуыса, Педунь кылзэ сётэ, тӧдьыослэн контрразведказылэсь кивалтӥсьсэ Солдатовез кырмоз шуыса. Солдатов чик тодмотэм муртъёс сьӧры — зарнизылы шуыса — огназ кошке но «коросэ» шеде. Арск дорын ожмаськонын 4 сюрс тӧдьы солдатъёс но офицеръёс Азин доры выжо, угось Иван Дурак соослы мадем, мар луоз, одӥг ар ортчыса. Сарапулын но чугун сюрес станциез басьтонын, Лӧпшо Педунь визьмо военачальник луэменыз висъяське. Ас куспазы тунсыко споръясько Никодим но Евдоким попъёс, Педунь соослэсь «вылынгес» тани маиныз: «с плетью в руке нещадно хлестая по широким спинам и задам отца Евдокима и отца Никодима, громко и противно базлая их на своём родном вотяцком языке, стал гнать их …» (351-тӥ б.). Меӵак вераме потэ, таӵе сюжет мынам сюлэмыя ӧвӧл, куке тӧдьыослэн кадровой офицеръёссы чылкак шузиесь (контрразведкалэн кивалтӥсез но!), со понна героймы визьмо военачальниклы но стратеглы пӧрме. Татын Педунь интыын кыӵе ке музон герой луысал ке, мон ӧй пумитъяськысал, но Лӧпшо Педунь — со, котьма ке но, Лӧпшо Педунь.

Озьыен, марлы умоезлы дышетэ Вольэг Бахматовлэн «Сказание о Лопшо Педуне и его друге Иване Дураке» кузьмадёсэз? Нырысь ик, чеберлыко текстын ивортон сярысь ӧвӧл сюлмаськоно — возьматон но суредан азьпал радын луыны кулэ, таиз ласянь авторез нокызьы уд пыкылы. Кыкетӥез, бадӟым темаослэсь но кужмо геройёслэсь (Лӧпшо Педунь) ӧвӧл кышкано. Куинетӥез, кыл бордын ялан но ялан ужано, аслэсьтыд стильдэ, гожъяськон манердэ кылдытоно но волятоно; со понна кыллюкамъёсты бугыръян гинэ тырмыт ӧвӧл, эшшо но маке мукетыз кулэ на — валэктэ асьмелы та гожтосэныз Вольэг Бахматов.

 

http://udmdunne.ru/2018/06/volehg-iniki-yusjos-no-ku%D3%B5jos-romanys-lyuket/

Удмурт Дунне
By Удмурт Дунне Июнь 20, 2018 17:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<