Кызьы дӥськутэз удмурт кароно?

Удмурт Дунне
By Удмурт Дунне 28 июня, 2018 16:01
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмурт дӥськут кылдытон интыяз уг сылы. Трос нылашъёс дась адӟытыны асьсэлэсь удмурт шӧмо коллекциоссэс. Тани Ижкарысь егит дизайнер Софи Разина быгатэ ни ушъяськыны вормонъёсыныз. Со луэ Zarni дӥськут брендлэн одӥгез кылдытӥсез.

С. Разина буртчин кышетъёс вылын суредаське.

— Кызьы вуид дизайнэ?

— 7-тӥ классын дышетскыкум, синмаськи модалы сӥзем «Бурда» журналысь эскизъёслы. Соку ик дӥськут дизайнер луэме потӥз. Искусствоосъя элькун школаысь дышетӥсе Наталья Михайловна Морозова малпанме юнматӥз. Огшоры набросокъёс лэсьтытэм сяна, со косэ вал журналысь эскизъёсты копировать карыны. Йырез ужатон, малпаськонэз паськытатон понна косэ вал суреданы сыӵе дӥськут, кыӵезэ ачим ноку ӧй дӥсясал. Со визь-кенешез туж юрттӥз. Умой, пичи дыръяд сыӵе визьнодасед вань ке. Наталья Михайловна ӧй ке луысал, мон, оло, дизайнэн тунсыкъяськемысь дугдысал. Озьы школа бере пыри Удмурт кун университетысь Искусствоосъя но дизайнъя институтэ дӥськут сярысь тодон-валанме будэтыны. Выпускнойын горд дипломе пурысь дэременым туж чебер адскиз.

Собере эшшо дышетскеме потӥз на. Пыри Социологияя но философияя факультетэ. Маскара кадь, ваньзы паймизы, кыӵе тӧл монэ отчы нуиз. Татын, калыклэсь юалляськыса, эскеронъёс ортчытъяй. Ваньмы пӧртэмесь ук, кулэ шӧдыны, кыӵе дӥськут кыӵе адямилы кулэ. Соин ик мон понна дизайн но социология ӵош вамышъяло.

Университет бере уж кема ӧз сюры. Ар котыр дӥськутэн туж ичи выри. Декоратор но, корка пушкысь текстильлэн дизайнерез но вал. Бен, со ваньмыз туж матын: мар пӧртэмез, мае тон дӥсяськод — адямиез яке юртъерез. Но мыным адями ик матынгес. Соин шуыны быгатӥсько, асме 100 процентлы шедьтӥ шуыса.

— Кызьы кылдӥз Zarni брендды? Мар бордын отын ужаськоды?

— Zarni-лы ар но ӧвӧл на. Ми сое дизайнер эшеным Екатерина Фоминаен кылдытӥмы. Мон малпасько дӥсьлэсь вылтуссэ, нош Катя дӥськутэз мугоръя чебер пуктэ, конструкциос кылдытэ, берло соя выкройка лэсьтэ. Туж капчи, дыр, куке ваньзэ тае одӥг адями быдэстэ. Но, мон малпамъя, 2 адямиослэн ужзы тунсыкогес но узыргес пӧрмыны быгатэ. Ӵош ужаса, тыршиськод огкыл шедьтыны, ог-огдэ валаны.

Мынам аслам но конструктор луыса ужаме вань, но мон валай, со монъя ӧвӧл, мынам йырвизе туж творческой. Со сяна, батиклы, басма вылын суредаськонлы, мон туж синмаськемын, солэсь куштӥськеме уг луы. Али мон буртчин кышетъёс вылын суредаськисько. Малпанэ вань батикез дӥськутэ поттыны, но, кызьы валаськоды, буртчинлэсь дӥсь туж дуно пӧрмоз. Нош дӥсьлэсь одӥг люкетсэ гинэ буртчинлэсь вурид ке, умой уз адӟиськы ни.

Zarni-ын ми кыкнамы гинэ ӧвӧл, вань на пужъятӥськисьёс, вуриськисьёс. Али ужамы Германиын улӥсь удмурт куиськисен Лариса Шаензонэн. Тӥ нырысетӥосыз, кинлы со сярысь верасько. Соин ӵош лэсьтэм ужмес туспуктыса но ӧм вуттэ на.

Ӵем шуо, ми этно стилен ужаськомы. Со шонертэмгес. Ми туала дӥськутэ удмурт люкетъёсты пырты-лӥськомы. Кулэ быгатыны огшоры дӥсез яркыт карыны. Татын милемлы юртто удмурт сям-йылолъёс. Соин ик воксё кулэ ӧвӧл, вань дӥсед удмурт шӧмо мед луоз шуыса.

— Туэ тон «Шундыкар» лагерьын егит дӥськут дизайнеръёсты дышетод.

— «Шундыкар» лагерь сярысь трос кылэме вань, ваньзы шумпотон мылкыдын верало сое. Ачим отын ӧй вал бере, али пумозяз ваньзэ уг на валаськы. Шумпотӥ «Шундыкаре» ӧтемзылы, ачим но шудо покчи дырыным выльысь пумисько кадь потэ. Дизайн отрядын 8-тӥ-11-тӥ классъёсысь пиналъёс луозы, со туж тунсыко арлыд. Кыӵе ке аспӧртэмлыко малпанъёссы, ужпумъёссы вань ини, школа бере кытчы пырон сярысь малпасько. Оскеме потэ, дизайнэн тунсыкъяськонзэс будэтыны быгато шуыса. Соослы валэктэме потэ коллекция кылдытонлэсь радлыксэ.

— Нош туннэ нуналлы кыӵе ужпум азяд пуктӥськод?

— Мынам туж потэ пичи производство кылдытэме. Бадӟымзэ уг, соку кутске ни лыдпус сьӧры уйиськон, нош удмурт элементъёсын яратыса кулэ ужаны, рос-прос.  Кылсярысь, кышетъёсам сюлыкъёсысь суредъёсты пыртылӥсько. Кыӵе ке выль люкет ватсасько ке, со токма шорысь уг луы. Тани, шуом, палэзь. Мон сое суредасько, малы ке шуоно со удмуртъёслэн дун-чылкыт писпузы. Соин оскисько, кышетъёсы чеберлы гинэ ӧвӧл шуыса. Соос вашкалаослэн дуннеенызы герӟаськемын. Кызьы шуиз огез эше, кышеттэ ибырвесь (талисман, оберег) интые нуллоно.

— Кинлэн творчествоез тонэ бурдъятэ?

— Мон яратӥсько модаез но, быдэсак искусствоез но. Котькуд дизайнерлэн коллекциез бурдъяны быгатэ, котькуд адями адӟоз отысь мае ке аслыз гинэ валамонзэ. Dolce & Gabbana, Kenzo, Valentino, Dior коллекциос бордысен кутскыса ик. Дизайнеръёс пӧлысь висъясал Александр Маккуинэз но Джон Гальяноез. Кыкназы сюлэмам, университетын дышетскыкум ик, пыризы. Костюмографикая занятиосын милемыз косыло вал кыӵе ке стилен суреданы кельшись дизайнерлэсь дӥськутсэ. Маккуинлэн котькуд моделез яркыт, аспӧртэмлыко, валантэм, со дыре ик ваньмыз интыяз, мултэсэз ӧвӧл. Нош Гальяно туж яратэ исторической костюмъёсты. Костюмлэсь историзэ вань дизайнеръёс тодыны кулэ.

Художникъёс сярысь верано ке, синмаськисько Микеланджелолэн искусствоезлэн брутальностезлы, Леон Бакстлэн творчествоезлэн пумтэм-йылтэм луэмезлы. Солэн сценической костюмъёслы эскизъёсыз тужгес но монэ мальдыто, альбомезлэн бамъёсаз басмалэн вӧлъяськемез шӧдӥське кадь. Винсент Ван Гог монэ кыӵе ке валантэм кужымен паймытэ. Сальвадор Дали воксё йырвизез поттэ суредъёсыныз но, туспуктэмъёсыныз но, дневникъёсыныз но. Клод Моне сярысь но вератэк кельтэме уг поты, мынам солы луыса писеелэн но Мони нимыз.

— Удмурт дизайнеръёс пӧлысь кинэ висъясал?

— Нырысь ик — Полина Кубистаез. Солэн шӧдӥське концепциез, валамон но лад-лад, аслаз стилез. Соин артэ нокинэ но ӧй пуктысал. Али дӥськут дизайнын трос нимъёс кылдо.

— Кызьы малпаськод, дизайнэн ӧй ке пумиськысал, кин тон али луысал?

— Школаын дышетскыкум, шумпотыса журналистикая кружоке ветлӥсько вал. Яратылӥ сочинениос гожъяны. Оло, со удысын асме шедьтысал. Творчество монэ ӧй кельтысал.

— Быдэс улондэ Ижкарын улыса, чебер удмурт кылдэ кызьы утьыны быгатӥд?

— Мон тыныд тросгес верало: удмурт кылъя олимпиадае но пыриськылэме вань. 5 аресысен гужем весь гуртын улылэмын, соку ик дыши удмурт сямен вераськыны. Малпасько, ваньмыз семья бордысь потэ, кызьы тонэ будэто, сыӵе ик тон луиськод. Соин уг валаськы, куке адямиос ӟучомемзэс карын будэменызы валэкто яке верало ке, городын нылпилы удмурт кыл кулэ ӧвӧл шуыса.

Мария Емельянова

Туспуктӥз Meiko Inoe

Удмурт Дунне
By Удмурт Дунне 28 июня, 2018 16:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<