Кун Кенешын вераськизы кылем арын элькун казнаез кутэм пумысен

Удмурт Дунне
By Удмурт Дунне Июнь 26, 2018 13:30

Кун Кенешын ортчем калык кылзонъёсын йылпумъянъёс лэсьтэмын кылем арын элькун казнаез кызьы кутэмлы. 

udmurt.ru

Азьло ик верано: арез ортчытӥм пунэмаськонъёстэк — таӵеез берло 9 ар ӵоже ӧй вал ни.

Депутатъёсын ӵош калык кылзонъёсы пыриськизы общественной огазеяськонъёслэн адямиоссы, мылкыд карисьёс. Сессия ортчытъян зал быдэс тырмиз. Кун Кенешлэн Тӧроез Алексей Прасолов валэктӥз: юнматэмлэсь азьло бюджет потэ калык кылзонъёс пыр. Кызьы со быдэстэмын — нош ик верано калык кылзонъёсын, тае куре законодательство.

Та рад умой адӟиське ни: пӧрмытӥм-а шонер прогнозъёс лэсьтыны, вуиз-а казнае ватсаса коньдон? Азьло ик верано: арез ортчытӥм пунэмаськонъёстэк — таӵеез берло 9 ар ӵоже ӧй вал ни.

— 2017-тӥ ар кутсконын пунэмъёсмы ог 48,9 миллиард манет пала вал, ар пумозь соосты ог 48,4 миллиард манетозь уськытыны быгатӥм, — шуиз коньдон ужпумъёсъя министр Станислав Евдокимов. — Туэ пунэмъёсмес эшшо 1,9 миллиард манетлы ичигес кельтыны кулэ. Коммерция банкъёслэсь 12,1 процентэн кредитъёс басьтӥм вал, та лыдпусэз 8,1 процентозь кулэстӥм. Озьы кылем арын тыриськонъёсмес пытсанлы 4,3 миллиард манет пала кошкиз ке, туэлы бюджетын 2,3 миллиард манет гинэ учкемын ни.

Станислав Евдокимов верамъя ик, 2017-тӥ арын казналэн доход люкетэз 67,688 миллиард манет луиз. Кылем арын бюджет удысын ужасьёслэн уждунзы но кудӟытӥсь юонъёслы акцизъёслэн ставкаоссы йылӥзы — таин валче элькун кисые тросгес коньдон лыктӥз. Со сяна, министерствоос но ведомствоос Россиысь тросгес коньдон кыскыны пӧрмытӥзы: Москваысь Удмуртие 15,167 миллиард манет вуиз, 2016-тӥ арен ӵошатыса, со 6, 6 миллиард манетлы тросгес.

Кытчы но кӧня коньдон кутэмын? 67,257миллиард манет луиз бюджетлэн расход люкетэз. Быдэстэмын Россилэн Президентэзлэн май указъёсыз — бюджет удысын ужасьёслэн уждунзы йылтэмын. Дыраз тыремын пособиос, пенсиос — соос 40 пумо. Ватсаса коньдон кошкиз муниципал кылдытэтъёслы.

— Кун программаос пӧлысь тужгес коньдоноез луиз дышетон удысэн герӟаськемез — 20,5 миллиард манет быдтэмын, — шуиз коньдон ужпумъёсъя министр. — Солы луыса элькунамы 607 нылпи садъёс ужало, отчы 102 сюрс нылпиос ветло. 2017-тӥ арын ватсаса 536 интыос усьтэмын. 3-7 аресъем вань пиналъёслы нылпи организациосы ветлыны луонлык кылдытэмын. Со сяна, кылем арын 2 школа пуктэмын — Ижын но Можгалан.

Отӥяз расходъёс мыно тазалыкез утёнлы — 10, 158 миллиард манет, калыкез улон-вылонын утёнлы — 7,74 миллиард манет, культуралы -1,69 миллиард, мугорез кыдатон культуралы, спортлы — 942,9 миллион но мукет.

Экономикая министр Михаил Фомин тодэ вайытӥз, кыӵе прогнозъёс пуктэмын вал 2017-тӥ арлы. Жаляса верано, куд-ог удысъёс соосты быдэстыны ӧз ворме. Шуом, 63 процентэз промышленной предприятиос 2 процентлы ичигес вуз поттӥзы, мувӧй кыскон озьы ик 2 процентлы кулэсмиз. Гурт удысын но ваньбур поттон 1,8 процентлы усиз. Ӧжытгес картошка октэмын — куазь ӧз сёты ӟеч урожай басьтыны. Со сяна, кӧнялы ке кулэсмиз пудолэн но тылобурдоослэн лыдзы. Уката секыт йӧтӥз лэсьтӥськон удыслы — заказъёс 19 процентлы кулэсмизы. Но улон юртъёс 1,3 процентлы тросгес ик ӝужазы — 658,6 сюрс квадрат метр.

Экономикая министрлэн докладысьтыз эшшо кӧня ке тунсыко лыдпусъёс: элькунамы улӥсьёслэн лыдзы 2017-тӥ ар пумозь 1515,4 сюрсозь вуыны кулэ вал, луиз 1514,9 сюрс — ог 1 сюрслы кулэсмимы. Дунъёс йылӥзы 3 процентлы гинэ. Ёрмыса улӥсь семьяос чакламъя 12,2 процент луыны быгато вал, луизы 12,8 процент.

Калык кылзонъёсы пыриськисьёс пусйизы: казнаысь коньдонэз Правительство валаса кутӥз. Доклад лэсьтӥсь министръёслы одӥг юан но ӧй вал — ваньмыз пыр-поч верамын-валэктэмын, пе.

Элина Кумачёва
Туспуктэм: udmgossovet.ru

Удмурт Дунне
By Удмурт Дунне Июнь 26, 2018 13:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<