Кун Кенешын: Кыӵе удысъёслы ватсаса коньдон луоз?

Удмурт Дунне
By Удмурт Дунне Июнь 28, 2018 15:02

26-тӥ июне ортчиз Кун Кенешлэн 6-тӥ сессиез. Эскеремын 32 ужпум, 23-эз — элькун законъёслэн проектъёссы. Кенешонэ пыриськиз Правительстволэн Тӧроез Ярослав Семёнов.

udmgossovet.ru

Кун Кенешлэн 6-тӥ сессияз эскеремын 32 ужпум.

Дунъет сётыны вазь на

Кун Кенешлэн Тӧроез Алексей Прасолов сессиез кутскиз ӟечкыланэн. 80 ар талэсь азьло ӵапак 26-тӥ июне нырысьсэ быръемын вал УАССР-ысь Верховной Совет.

Сессия кутскон азьын депутат Владимир Бодров вазиськонэн потӥз на: пенсие потон дырез нуйтон пумысен умой-умой малпаськоно, пе. Казнае ватсаса коньдон пыртон понна, оло, мукет амалъёс утчано, кылсярысь, лушкаськон, коррупция понна кыл кутонэз уката чурытатоно… Кун Кенешысь «Огъя Россия» фракциын но та ужпум ӝуткаськылэм ни. Но депутатъёс огкылэ вуизы: законопроект умой-а, урод-а — дунъет сётыны вазь на. Угось туннэ верамын ӧвӧл на, кыӵе удысын ужась адямиослы пенсие вазьгес потыны лэзёзы.

Уксё люкылэмын

Депутатъёс воштонъёс пыртӥзы 2018-тӥ арлы «Бюджет сярысь» законэ. Шумпотымон: казналэн доход но, расход но люкетъёсыз йылтэмын.

Коньдон ужпумъёсъя министр Станислав Евдокимов валэктӥз:

— Россилэн бюджетысьтыз целевой уксё вуыны кулэ. Со сяна, пунэмаськонъёсмылэсь процентъёссэс пичигес кельтыны быгатэменымы, коньдон шыръяськиз.

Озьы оглом 1,198 миллиард манет люкылэмын пӧртэм министерствоос но ведомствоос куспын: 263 миллионэз — кун учреждениосты возёнлы, 904 миллион манетэз — куд-ог программаосты 3-тӥ кварталын азинтонлы.

Станислав Евдокимов пыр-поч вераз, кыӵе министерствоос марлы но кӧня басьтозы:

— Тазалыкез утёнъя министерстволы 10 миллион манет висъяськоз адямиосты секыт операциос бере йӧнатонлы, 41 миллион — эмъюм басьтонлы, 47 миллион — секыт висисьёслы юрттэт сётонлы, — шуиз со. — Озьы ик 27 миллион манет вуоз Киясаын Гурт шудонъёслы стадионэз вуттонэ, 128 миллион манет — транспортэн мынӥсь-ветлӥсьёслы льготаос сётонлы но мукет.

Списокын Дышетонъя но наукая министерство но. Нырысетӥ лыдӟемен юнматыку, 145 миллион манет учкемын вал 2-тӥ паларе нылпи садъёсы, школаосы ветлӥсь пиналъёсты сюдонлы но анай-атайёслы компенсация тыронлы. Но 2-тӥ лыдӟемен юнматон азьын ӵектон вуиз Удмуртилэн Тӧроезлэсь — 65 миллион манет ватсано дышетон организациосты 1-тӥ сентябрьлы дасянлы но. Депутатъёс таӵе дэмланэн огкылысь кариськизы.

Алексей Конорюков депутатлэн юанэз кылдӥз вал: уз луы-а гурт хозяйствоослы техника басьтыны чаклам коньдонэз йӧллы компенсация карыны.

— Техника басьтозы кӧня ке гинэ хозяйствоос, нош йӧл поттонэн ваньмыз ик выро, — валэктӥз со малпанзэ.

Но пумитаз шуэмын вал: урожай утялтон вакыт ӝоген вуоз, соин ик техника басьтоно. Но йӧлэн герӟаськем программа озьы ик уз вуны — талы ватсаса коньдон шедьтыны амалъёс утчано.

Воштонъёс пыртэм бере бюджетлэн доход люкетэз 69,922 миллиард манет луиз, расходъёсыз 70,233 миллиард манетозь йылӥзы, дефицитэз — 311,6 миллион манет.

Мандаттэк кылизы

Огдыре 2 муниципал кылдытэтъёсысь — Камбаркаысь но Якшур-Бӧдья ёросысь Чернушкиысь — депутатъёс дырызлэсь вазь мандатъёстэк кылизы.

Таӵе ӵектонэн нырысь ик потӥз вал Удмуртилэн Тӧроез Александр Бречалов. Таӵе решение кутӥз суд но. Мугез: депутатъёс 3 толэзь ӵоже одӥг кенешон но ортчытӥллямтэ. Кун Кенешысь Кунэз радъянъя но интыысь аскивалтонъя ялан ужась комиссилэн кивалтӥсез Александр Прозоров верамъя, кыксэ ик учыръёсты комиссиязы пыр-поч эскеризы — судлэн решениеныз соглаш луизы. Сессия дыръя мукет комиссиосысь депутатъёс но муниципалитетъёсысь эшъёссэс ӧз жалялэ.

Парламентлэн Тӧроез Алексей Прасолов шуиз:

— Кенешонъёс ортчылӥл-лямтэ, куспазы валамтэос кылдэмен. Но таин ӵош соос возьматӥзы, бырйисьёссэс чик уг гажало шуыса. Малпасько, таӵе учыръёс азьланьын уз луэ ни, угось интыосысь депутатъёсын ми ӵемысь пумиськылӥськом, сюлмаськытӥсь ужпумъёсты сэрттӥськом-пертчиськом. Да-накез калыкен быръемъёс, зэмзэ но, сюлмасько бырйисьёссылэсь улон-вылонзэс ӟечгес карон понна.

Камбаркаын но, Чернушкиын но выль депутатъёсты быръёзы туэ огъя куара сётон нуналэ — 9-тӥ сентябре.

Таяз сессиын ик Кун Кенешысь Владимир Нельзин депутатлэн полномочиосыз уретэмын — мандатэзлэсь со куштӥськиз ас мылкыд каремезъя. Озьы парламентын 3 буш инты кылемын, вазенгес мандатъёссэс кельтӥзы Андрей Лямин но Юрий Фёдоров.

Старосталы — эрик

Гуртысь старостаослэн табере луонлыкъёссы тросгес луозы, кылсярысь, поселенилэн улон-вылонэныз герӟаськем ужпумъёсты сэрттоно-пертчоно ке, та дырлы соос ужысьтызы кошкылыны быгатозы. Нош уждун тыриськоз. Эшшо пӧртэм министерствоосы но ведомствоосы вазиськыкузы, валэктон 10 нунал куспын басьтыны быгатозы, али талы 30 нунал сётӥське вал.

Депутатъёс озьы ик огкылысь луизы: Удмуртилэсь гербзэ табере адӟыны луоз электрон амалэн дасям документъёсысь но. Нош Общественной палата кылдытыны быгатоз общественной советъёсты, кудъёсыз чакласа возёзы культура, дышетон, тазалыкез утён но мукет удысъёсын калыклы сётӥськись услугаослэсь ӟечлыксэс.

Элина Кумачёва

Туспуктэм: udmgossovet.ru

Удмурт Дунне
By Удмурт Дунне Июнь 28, 2018 15:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<