Концлагерь бервылын жуге гырлы

Удмурт Дунне
By Удмурт Дунне Июнь 29, 2018 17:20

Нырысетӥез концлагерь кылдытэмын Германиысь Дахау городын 1933-тӥ арын. Татын быремын Удмуртиысь пленнойёс но. Юзырес интыосты котыръяз Ижысь Евгений Кривенко.

Евгений Кривенколэн «ВКонтакте» бамысьтыз

Германиысь Дахау лагерьысь крематорий.

Вылӥ дунъяськиз адями ку

— Дахау концлагерь бервылын ку лӧптэ. Татысь ӝоггес пегӟем потыны кутске. Тон шоры курадӟытыса виемъёслэн лулъёссы учко кадь йӧтэ, — шуэ Евгений Кривенко.

1933-тӥ арын 22-тӥ мартэ ог 200 гектар вылын лэсьтӥзы концлагерь. Нырысь-валысь сое кылдытӥзы нацистской режимлы пумитъяськисьёсын нюръяськон вылысь. Таос радын вал коммунистъёс, баӵкоос, социалистъёс. Со сяна, Дахау азе ужпум пуктӥзы — арийской расаез генетика ласянь чылкытатон. Адямиос вылын олокыӵе но эскеронъёс ортчытъяны ӧдъязы. Узникъёсты тифен, холераен, маляриен но мукет кышкыт висёнъёсын черлатъязы, со висёнъёслэсь эмъюмъёс, вакцинаос кылдытъязы. Эскеронъёс ортчытъязы давлениен но. Концлагере шедемъёсты барокамераосы интыяллязы, татын вирзӥбетсэс уськытъязы-ӝутъязы. Талы чидатэк, адямиос асьсэлэсь асьсэос йырсизэс ишкаллязы, синъёссэс потталлязы, улэп кылемъёсыз шузимылӥзы. Кызьы кылдытоно нокинэн вормонтэм солдатэз? Та юан бордын трос врачъёс, тодосчиос йырзэс тӥяллязы. Пленнойёслы кыӵе но операциос ӧз лэсьтылэ. Учкылӥзы, макем кема адями ӟырт кезьытын чида. Зигмунд Рашер врач эскеремъя, тужгес кема чидаллязы славян выжыос.

Дахау — кулон лагерь. Татысь, пегӟемед потыса но, уд пегӟы: ӝужыт борддоръёс кузя электро лэземын. Быдӟым ож пуромыса, техника, пыӵал кулэ луэмен, лагере сюремъёс заводъёсын тыршылӥзы, сюресъёс лэсьтылӥзы, из поттылӥзы, нюр интыосты куасьтылӥзы. Но таос вылын но лябӟемзы бере опытъёс пуктылӥзы. Тужгес зол курадӟытылӥзы егит, таза муртъёсты. Фашистъёс пӧлын вылӥ дунъяськылӥз адями ку. Солэсь майтал, сумкаос, пукон вылэ шобретъёс, пыдкутчанъёс лэсьтылӥзы. Ӵапак та понна но кулэ луылӥзы егитъёс.

1944-тӥ-1945-тӥ аръёсы камераосын лёгиськон интыез ӧй вал — котькудаз ог 2 сюрс адями, 1942-тӥ арын сярысь, со 1 сюрс 700 муртлы тросгес.

Дахауын вань быдтэм адямиос пӧлысь ог 75 процентэз — Совето Союзысь. Соосты татчы пӧртэм интыосысь ысъяллязы. Пӧлазы 94 генералъёс, полковникъёс, майоръёс. Таосты туж зол курадӟытӥзы. Кӧт вылазы сяна кыллемзы но уг луы, пе, вал. 1944-тӥ арын, Берлинысь приказ вуэмен, ваньзы крематорие келямын.

Дахау пыр 24 кунысь 250 сюрс адями потэмын. Курадӟытыса виемын ог 70 сюрсэз. Улэп кылемын 32 сюрс узникъёс. Мозмытӥзы таосты 1945-тӥ арын 29-тӥ апреле Америкаысь войскоос.

Евгений Кривенколэн «ВКонтакте» бамысьтыз

Дахау лагерьлэн бервылаз сыло пӧртэм черкъёс, кылсярысь, православной.

Шайвыл интыын — возь

— 2 ар талэсь азьло май толэзе Германиысь Ландсхутысь больницаын нылылэсь тазалыксэ юнматыкумы, Интернетын бугыръяськыса, тодӥ: город котырын советской солдатъёслэн 3 шайвылзы, — вера Евгений Кривенко. — Отчы ветлыны, гу вылазы сяська керттэт поныны малпамы. Городлэн бургомистрезлы (йырызлы) вазиськимы. Соин ӵош ик пусъем интыосы вамыштӥмы. Но огзэ но шайвылэз ӧм шедьтэ. Списокын вань, нош зэмзэ ке — ӧвӧл. Котыр шулдыр, чебер паркъёс. Кызьы озьы? Сяська керттэт кельтӥмы ик. Германиысь Удмуртие берытскыкумы, ми ӧм ик тодылэ, бургомистр со интыос сярысь пыр-поч тодыны косэм шуыса. Волонтёръёсты но та борды кутскыны куриллям. Огез волонтёр — больницалэн секретарез Эйка. Туэ нош ик май толэзе больницае сюрим но, со дорамы шумпотон иворен вуиз: солдат пытьыос шедьтэмын, бургомистр тӥледыз возьма.

Ваньмы дэмен вамыштӥмы Дахау но Мусбург городъёсысь концлагерь бервылъёсы. Малы ке шуоно шайвылъёсы ватэмын вал узникъёс. Немецъёс концлагерьлы сӥзем мемориалъёсын но музейёсын данъясько, малпаськоды? Фашистъёслэн изьверъяськонъёссылы асьсэос но паймо, кышкатско. Курдамзылэн мугез но вань: Германиын али неонацистъёс йырзэс ӝуто, соос мигрантъёслы пумит султо. Сыӵе националистъёс ужало кивалтон удысъёсын но. Соин ик кинэн гинэ ӧй вераськы, уноез кышкало, история выльысь берытскыны быгатоз шуыса. Огез гинэ ке шат немецъёслы пайда вайиз. Концлагерьёсын ортчытъям экспериментъёс, операциос, кылдытэм вакцинаос Германиысь туала медициналы инъет луизы. Соин но Германиын сокем зол азинскемын медициназы. Татын эпилепсиез гинэ но узникъёс вылын эмъяны дышетскылӥзы. Та висёнэз зӥбломытонъя Германия огез адӟем карымонэз луэ. Соин ик ми но татын эмъяськиськом.

Евгений Кривенко пусъемъя, туннэ война вакытысь огзэ но концлагерь юртэз уд пумита ни — ас вакытаз ваньмыз куашкатэмын. Но туспуктэмъёсъя, тодэ ваёнъёсъя камераос, крематорийёс, газэн ӝокатон камераос выльысь ӝутэмын. Музейын утисько фамилиос но туспуктэмъёс. Пӧлазы удмуртъёс но сюро. Кинъёс со шуыса рос-прос тодон понна куриськон гожтӥ, валэктон возьмасько, шуэ Евгений Кривенко. Кылсярысь, Дахау концлагерь но солэн филиалъёсыз пыр ортчемын Удмуртиысь таӵе адямиос: старшой лейтенант, 1914-тӥ арын вордскем Анатолий Галичанин, Дэри черкогуртысь 1922-тӥ арын вордӥськем Иван Моисеев, Яр ёросысь Пудэм гуртысь 1914-тӥ арын вордскем Александр Баженов но мукетъёсыз.

— Туннэ советской солдатъёслэн шайвыл бервылъёсазы памятникъёс гинэ на сыло. Лысьӧмъёссы мукет интыын, — вера Евгений Кривенко. — Кылсярысь, Мусбургын 2 сюрс мурт ватэмын вал. Котькуд гулэн — аслаз номерез. Со номеръя шедьтыны луэ вал котькуд кулэм адямилэсь фотозэ, кытысь потэмзэ. Фашистъёслэн картотеказы узыр. Со документъёс али ке но утисько. Адямиосты быдтонэн выризы ке но, котькудзэ туспуктыса, со сярысь гожтыса но вутто вылэм. Кылсярысь, Мусбургысь стационарной лагерьын 14 сюрс советской солдатъёс сярысь вань иворъёсты утьыса возё, оло, кин ке вазиськоз шуыса. Городлэн бургомистрез верамъя, та аръёс ӵоже Россиысь одӥг мурт но ӵыжы-выжыез сярысь ӧз юалляськы на вал.

1950-тӥ аръёсы шай бервылысь музъемез гырон-кизён улэ висъяно кариськиллям. Вань лысьӧмъёсты Лансберг-ам-Лех городысь огъя бадӟым шае поттӥзы. Зэм, 1982-тӥ арын Мусбургысь бургомистр гыронэз-кизёнэз дугдытӥз, татчы синпелет пуктӥзы, кирос шуккизы. Туннэ отын сяська будэ, турын пыдесозь-кускозь ик вуэ. Нокин сое уг турна. Татын куашетыны, шудыны уг яра шуыса тодмет со, шуэ бургомистр.

Туннэ Дахауысь концлагерьлэн но мукет бадӟым концлагерьёслэн бервылъёсазы черкъёс пуктэмын. Гырлыоссы жугем улсын сюлэм уката позырске, шуэ Евгений Кривенко. Йыре но уг тэры, макем адямиосты курадӟытыны луэ вал. Дахауысь мемориал пул вылын гожтэмын: нацизмен нюръяськисьёслэн, татын 1933-тӥ-1945-тӥ аръёсы курадӟытыса виемъёслэн чиданзы мылкыд мед сётоз тупаса улон, эрик, адямилыко луон понна огазеяськыны.

Елена Сараматова

Удмурт Дунне
By Удмурт Дунне Июнь 29, 2018 17:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<