Йӧл гылтэ… визез. Мар бордысен кутске анемия?

Удмурт Дунне
By Удмурт Дунне Июнь 27, 2018 15:31

Анемия ӵемысь пумиське ӝук но йӧл вылын будӥсь пиналъёс пӧлын/ Туспуктэм: udmdunne.ru

Йӧл бордын тазалык, шуо калыкын. Но сое трос юид ке, анемия кутскоз, пусъе медицина наукаосъя кандидат, Нылпи элькун больницаысь гематолог Наталья Андреева.

 

Куэн ӵош ӟигар кошке

Наталья Андреева дораз вазиськем пиналъёс пӧлысь котькуд куинетӥезлы анемия диагноз пуктэ. Со доры тужгес лябӟем нылпиос вуо ни, нош кӧняез нылъёс-пиос педиатръёс дорын эмъясько. Нылпиос интыязы тэк пукыны уг валало бере, тросэз анай-атайёс пиналзылэсь висемзэ валатэк ик кылё. Вираз гемоглобинэз но эритроцитэз кулэсмемын шуыса, синмын уг адӟиськы ук. Нош куд-огез воксё но малпа: вирыз ачиз ик тупатскоз ай. Но анемия дыръя тужгес кышкытэз тани мар: адямилэн вираз кислородэз тырмемысь дугдэ, мугораз железоез кулэсме. Таӵе дыръя нырысь ик секыт йӧтэ йырвиымлы но сюлэмлы.

— Йыре тырмыт кислород вуымтэысь, пиналлэн виымыз урод ужаны кутске, — шуэ Наталья Николаевна. — Анай-атайёслэн пиналъёссэс визьмо каремзы потэ, нош эмъян борды басьтӥськыны, пиналзылэсь тазалыксэ чакланы уг сюлмасько. Макем мургес пыӵамын анемия, сокем секытгес пиналлы визь люканы. Садын, школаын анемиен висисьёс, таза эшъёсынызы ӵошатыса, лябгес адӟисько, дыг малпасько, азьтэмъясько. Йырвиымзы пумен лябӟе но лябӟе. Йырвиым дыг ужаны кутске ке, солэсь та «сямзэ» воштыны секыт луэ.

Кызьы тодмано анемиез? Наталья Андреева пусъемъя, нылпиос ӵем висьыны кутско, кӧдэкто. Кузы куасьме, пильылӥське, чорыг сьӧм кадь куалмаськыны кутске. Ымпумъёсазы гижлоос пото, йырсизы усьыны ӧдъя, чилямысь дугдэ, гижыоссы чагасько. Ялан йырйиськемзы потэ: я мел, я штукатурка, я эгыр, я сюй, я бумага куртчыло-сиё. Озьыен, сак кариськоно. Врач доры ӧд вазиське ке, югдур уката секытомыны быгатоз. Пиналлэн лулсэрыз бырыны кутскоз, сюлэмыз урод ужаны ӧдъялоз, шоканэз шугектоз, ӝушез сӧриськоз. Таӵе дыръя сое эмъяны уката секыт.

Наталья Андреева верамъя, тужгес ӵем анемиен курадӟо 6-7 аресъем нылпиос но быдэ вуон вакытазы вуэмъёс: таос угось шуак нуйтӥсько, вань ӟигарзы будонлы кошке, мугорысьтызы железоез быре. Со сяна, анемия ӵем пумиське дырызлэсь вазь вордскем пиналъёс пӧлын. Ӝушенызы курадӟисьёс, аллергикъёс но висё. Таослэн угось ӵемысь кузы куасьмыса усьылэ, со куадаськись кузы пыр мугорысьтызы железоез но усе-тӧлӟе.

Мус — секыт сиён

— Висён ӵемысь пумиське ӝук но йӧл вылын будӥсь пиналъёс пӧлын, — вера Наталья Андреева. — Анай-атайёслы йӧллэсь сиён лэсьтыны капчигес ук. Соин пинал 3 час ӵоже кӧттыро улэ, сием потонзэ уг валалля. Нукыртыны кутске ке, пичи пиналлы нош ик кияз йӧлын бутылка донго. Озьы уг яра. 1 арессэс тырмытэм пиналъёс уй-нунал куспын 400-500 миллилитр гинэ йӧл юыны кулэ. Йӧлысь кальций, мугоре вуыса, железолы пыд пуктэм кадь луэ, сюресъёссэ ӵокса. Нуналаз 1 тэркы ӝук но 1 стакан йӧл — тырмыт. Кеч йӧл сётъяськод ке, соку лыдпусъёсты эшшо но кулэстоно. Кечлэн йӧлыз уката но секытгес угось. Со сяна, ичигес юоно чай, кофе. Уногес — компот, сок.

Зэм, малпан кылдэ ик: вордскем пинал ялан будэ анай йӧл вылын. Но анай сӥль сие бере, 3-4 толэзьем пиналлы анай йӧлын ваньмыз тырмыт на. Нош 5-6 толэзьем пиналлы таза будон понна отысь гинэ железо уг тырмы ни. Соин ик пӧртэм пумо сиёнъёсын пумен сюдыны кутскыны кулэ. Но кылсярысь, куасьтэм емышъёсын железоез 5-6 поллы тросгес кунян сӥльын сярысь, озьы ке но куасьтэм емышысь 3 процентэз гинэ железоез мугоре кыле. Со дыре ик кунян сӥльысь 17-22 процентэз железо мугоре пыӵа.

Кунян сӥльысь 17-22 процентэз железо мугоре пыӵа. / Туспуктӥз Максим Егоров

— Куд-ог педиатръёс анемиен курадӟись пиналлы мус сюдыны косо. Но татын токсинъёсыз вань, соин ик сое анемия дыръя сиёнлэсь возиськоно. Озьы ик утиськоно чорыглэсь. Куд-огез емышъёс вылэ выже. Быдэ вуон вакытазы вуэмъёс пӧлын вегетарианство вӧлмемын. Та но анемие вуттэ. Будосъёсысь железо урод пыӵа. Ваньмы ми — хищникъёс, пиньёсмы но хищникъёслэн. Асьмеос сӥль сиыны кулэ, сое номыр ӧз вошты на. Тужгес пайдаё кролик, курка, кунян сӥль но кунян кыл. Анемия дыръя сиёно сезьы кеньырен ӝук, сьӧдчабей ӝук. Татын тужгес трос железо но медь веществоосыз. Пайдаё курегпузлэн ӵужез: татын кобальтэз но, марганецез но, белокез но трос.

Анай-атайёс шуо: пиналлэсь сиськонзэ радъяй, тазалыкез тупатскоз. Со озьы ӧвӧл! Сиёнысь железоез мугоре туж шуген пыӵа. Туж трос сӥль сииды ке но, уй-нунал ӵоже 2,5 миллиграммез гинэ мугоре кылёз. Нош эмъюмъёс 20 поллы умойгес юртто. Соин ик анемия дыръя одно ик железоен тырмыт препаратъёс юоно. Кыӵе препарат кулэ, кӧняен сое сётъяно — бырйыны кулэ врач. Анемия угось пӧртэм пумо луэ, врач гинэ сое висъяны быгатоз. Зэм, эн возьмалэ, анализъёс соку ик умоесь луозы шуыса. Анемилэсь ичизэ 3 толэзь эмъяськоно. Соку гинэ будӥсь организмын железо люкаськыны кутске.

Куддыр 1 толэзь эмъюм юо но дугдо. Куд-огез железо препаратъёс пинез быдто, шуо. Пичи пиналлэн пиньыз воштӥськоз ай, нош йырзэ уд тупаты ни. Та сярысь сюлмаськоно но эмъюмез куспетӥ юэмысь дугдоно ӧвӧл! Собере, эмъяськонэз куспетӥ карыса, югдурез секытомытӥськоды гинэ. Тодэ: эритроцитъёс 120 нунал уло. Выль вордӥськисьёсыз железоен мед пачылалозы, гемоглобин мед йылоз шуыса, дыр кулэ. Соку гинэ мугорын запас кылдэ. Тазалыклы пайда ваё аскорбиновой кислота, фруктоза, сорбит. Железоез мугорысь кулэсто кальций, фосфатъёс, оксалатъёс.

Елена Сараматова

Удмурт Дунне
By Удмурт Дунне Июнь 27, 2018 15:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<