Идна, Гурья но гондыр. Адам черкогуртын кылдӥзы пу скульптураос

Удмурт Дунне
By Удмурт Дунне Июнь 28, 2018 13:35
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылем арняе Глазов ёросысь Адам черкогуртэ люкаськылӥзы 30-лэсь уно пуэн вырисьёс. «Донды дорлэн мадёсъёсыз» фестиваль дыръя соос кылдытӥзы 16 арт-объект.

Василий Балахонов

Глазов ёросысь Адам черкогурт котыре выжыяськизы Идна, Гурья батыръёс но вайёслэсь лэсьтэм мукет скульптураос.

Ваньмыз соос али сыло Адамысь «ДондыДор» паркын. Табере татысь туристъёс уз бырылэ ни. Уго котькудӥз скульптура туж аспӧртэмлыко. Тани паркез утьыса сыло вайёслэсь лэсьтэм Идна но Гурья батыръёс, киоссэ йыр вылаз ӝутэм Шунды-мумы, кытчы ке вамыштэ пулъёслэсь шуккем гондыр, тӧлъёсын шудэ ньыль сэрего тангыра, пиналъёсты лэйканы возьма койык… Вань та ужъёс лэсьтэмын пуослэсь, вайёслэсь но одно ик герӟаськемын удмурт мадёсъёсын, лулчеберетэн. Нош кин ке но аслаз ужезлы ачиз мадёс малпаз. Кылсярысь, Ижысь Мария Соловатовалэн но Любовь Бывальцевалэн (кышноослы юрттӥськиз Артур Соловатов) «Йыро» скульптуразы «Йӧспӧртэм» номинациын вормисе потӥз.

— Йыро (койык) Чупчилэсь ярдуръёссэ герӟа — огпал пыдъёсыныз со одӥг ярын, мукетъёсыныз мукет ярдурын сылэ, шортӥзы ву бызе. Удмуртъёслэсь 3 дуннезэс возьматӥмы: койык улын ошиськись чорыг — со тупал дунне, ачиз койык — югыт дунне, нош сюр вылаз пукись тылобурдоос возьмато инсьӧрез, — вера Любовь Бывальцева. — Чорыг вылэ пуксьыса, луэ ӟечыраны но, койыклэн мугорыз вормоз, со лэсьтэмын кортлэсь.

Василий Балахонов

Ижысь С. Назаровлэн  «Гондыр агаез».

— Скульптураосын луэ шудыны, куд-огаз пукыны, лэйканы но малпанъёсы выйыны. Яраз! Семьяеным эшшо огпол татчы вуыломы на!  — мылкыдзэ вера Глазовысь Анастасия Ельцова.

Кибашлыос ужазы 5 нунал ӵоже. Нырысь куазь ӧз удалты: 2 нунал зориз. Кот куазен тэлетӥ вайёсты утчано луиз — уго  фестивалез радъясьёс пулъёс вайизы ке но, усточиос отысь асьсэлы кулэзэ шуген шедьтылӥзы. Но ми, шуэ Любовь Бывальцева, вырйылэ тубимы но Инмарлы куриськимы, нянь сётӥмы, собере луиз пӧсь!  Берпуметӥ нуналаз, Гыронбыдтон шулдыръяськон дыръя, быръемын вал 5 тужгес усто ужъёс. «Йыро» сяна, мукет номинациосын пусъемын Яр ёросысь Д. но П. Назаровъёслэн «Чипей пыжзы», Якшур-Бӧдья ёросысь В. Широбоковлэн «Мудор крезез»,  Ижысь С. Назаровлэн  «Гондыр агаез», Ижысь А. Ильинлэн, А. Чувашовлэн но А. Галимзяновлэн «Идна но Гурья» батыръёссы.

Фестивалез радъяз Глазовысь культурая но туризмъя центр, грант утыса.

— Таӵе фестивальёс кулэ, соин ик вуоно арын но сое ортчытыны малпаськомы, табере ини чортом быдэс дуннеысь кибашлыосты, — шуэ  Глазовысь культурая но туризмъя центрысь туризмъя ёзэн кивалтӥсь Алексей Дьяконов.

Мария Векшина
Туспуктӥз Василий Балахонов

 

Удмурт Дунне
By Удмурт Дунне Июнь 28, 2018 13:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<