Азаматысь Шумахерлы — комбайн

Удмурт Дунне
By Удмурт Дунне Июнь 25, 2018 13:02

Выль комбайн басьтод али, нош дунзэ тырыны кутскод, ог ӝыны ар ортчыса. Элькунмы, быдэс ар вис карыса, выльысь пыриськыны кутскиз «Росагролизинг» кун компанилэн программаяз. Нырысетӥ 2 комбайнъёсты озьы басьтӥз Алнаш ёросысь «Решительный» колхоз.

Роман Исупов

Алнаш ёросысь «Решительный» колхозлэн тӧроезлы В. Ганьковлы техникалэсь усьтонъёс сётэ «Росагролизингысь» Т. Антипова.

Кредит интые лизинг

Колхозъёс туж выльдысалзы трактор-комбайнъёссэс, но тросэз понна со вормонтэм: кредит басьтоно ке, процентъёс укыр бадӟымесь.

«Росагролизинг» кун компания чылкак мукет куронъёс пуктэ со пыр техника басьтӥсь хозяйствоос азе. Эштосъёслы 3 процентэн пунэм сёто. Вылаз ик, нокыӵе аванс уг куро. Таӵе кредитъёс нокытын ӧвӧл ни, шуэ «Росагролизинг» огазеяськонысь департаментлэн кивалтӥсез Татьяна Антипова. Агролизинг программая Россиысь 21 улосъёс ужало. Соос пӧлы пыриз элькунмы но.

Нырысетӥ 2 комбайнъёсты агролизинг чотын басьтӥз Алнаш ёросысь «Решительный» колхоз. Та хозяйстволэн гыроно-кизёно бусыосыз — ог 6 сюрс гектар пала. Бускель лябӟем колхозлэсь муоссэ кизё на. Со но тырмытэк, Татарстанысь хозяйстволэсь буш бусыоссэ гыро.

Племрепродуктор луись хозяйстволэн йӧл поттонын азинсконъёсыз шӧдскымонэсь. Нуналаз 18 тонна йӧл келяло. Районын со тужгес бадӟымез лыдпус, ушъя Алнаш ёрос администрациысь гурт хозяйствоя управленилэн кивалтӥсез Владимир Медведев. Котькуд скалзылэсь араз шорлыдын 6 сюрс килограмм йӧл кыско. Кылем арын выль гид пуктӥзы. Оглом 2 сюрс 500 пала скалъёссы. Туэ эшшо 400 йырлы чаклам выль ферма ӝутыны малпало. Сомында пудоез сюдыны сиён но тросгес кулэ луоз. Нош техниказы вужме. Туннэ ужась комбайнъёссы 2001-тӥ — 2003-тӥ аръёсы поттэмын. Миым 2 трактор басьтыны быгатӥзы. Йӧллэсь сиён-юонъёс дасясь заводлэсь пунэмаським, ферма пуктэммы понна кун программая юрттэт вуиз, шуэ «Решительный» огазеяськонлэн кивалтӥсез Виктор Ганьков.

Роман Исупов

Егит трактористлы М. Рязанцевлы оскемын выль комбайн.

Но 2 трактор тырмыт ӧвӧл. Соин ик «Росагролизинг» компаниен кылдытэм луонлык борды соку ик ӝабырскизы. Лизингъя 2 комбайнъёс басьтӥзы. Огез Россиын поттэмын, мукетыз Белоруссиысь ваемын. Техника Удмуртиысь бусыосын эскеремын ни, кизер эстӥськон трос уг сиы, уг тӥяськылы, ю-нянез умой утялтэ, оскытӥзы сое вайыса лыктэм специалистъёс.

Выль комбайнъёссэс «Решительный» хозяйствоын оскизы азьмынӥсь механизаторъёслы. Егит трактористэз Михаил Рязанцевез Азаматысь эшъёсыз чырмыт ужамез но техникаез усто тодэмез понна Шумахер шуо. Михаил пичи дырысеныз ни техника котырын. Школаын дышетскыкуз, атаез вӧзын ужалляз. Собере тракторлы право басьтӥз но ачиз штурвал сьӧры пуксиз.

Ог 10 ар «Дон» комбайнэныз ужаз. Берло дыре тӥяськылэ вал ни, шуэ. Нош ю-нянь утялтыку котькуд час дуно. Выль техникаез вуженыз уд ӵошаты ни. Ӝоген, оло, адямитэк но, пе, ужалоз ни. Тӥяське ке но, азьло кадь лампочка уг ӝуатскы ни. Кытӥ мар луэмын — ивортэ адями куара.

Михаил кадь сюлмо ужась егитъёс эштосын ичи ӧвӧл. Алигес 4 адями палэнысь лыктӥз, озьы ик асьсэлэн 2 егитъёссы кылизы. Хозяйство выль ужасьёсызлы юрттыны тырше. Улон инты но сётэ. Егит специалистъёсты выль техникае пуктыны уг кышкало.

«Росагролизинг» компания юрттысал ке, хозяйство лизинген дась басьтыны «К-700» трактор, туала сеялкаос, фермалы оборудование. Комбайн басьтӥм али, нош коньдонзэ тырыны кутском уборка бырем бере гинэ, шуэ Виктор Ганьков.

МТС интые МТК?

Удмуртиысь 60 процентэз гурт техника 10 яке солэсь но трос ар ужа ни. Уката шуг югдур комбайнъёсын. Соин ик туж умой, «Росагролизинг» компания шаерамы выльысь ужаны кутскиз шуыса, вера гурт удысъя но сиён-юонъя министр Ольга Абрамова. Туэ Удмуртиысь хозяйствоос лизинген 70 миллион манет тыр 13 комбайнъёс басьтыны чаклало. Кенешонъёс мыно лимитэз 52 миллион манетлы будэтон сярысь. Али элькун Правительствоын та программая техника басьтэмъёслы юрттонъя документ эскериське. Лизингъя тыриськон 5 арлы чакламын. Колхозлэн арлы быдэ тыриськонэзлэсь 20 процентсэ Удмуртилэн бюджетысьтыз берыктыны ӵекто. Хозяйство одӥгез тракторез понна тыриськиз ке, соку ик мукетсэ басьтыны мед быгатоз, малпа Ольга Абрамова.

Кун компанилэн программаез чакламын бадӟым но шоро-куспо хозяйствоослы. Соос возьматыны кулэ, пунэмзэс берыктыны быгатозы шуыса. Пичи колхозъёслы но фермеръёслы юрттон понна «Росагролизинг» огазеяськон ӵектэ кооперация амалэз. Кӧня ке улосвылъёсын, кылсярысь, Башкириын со кылдытӥз МТК-ос (машинно-технологической компаниос). Пичи хозяйствоос отысь техникаез медъятыса ужало. Али лыдъяськом, макем со тупалоз шаермылы, ивортӥз гурт удысъя но сиён-юонъя министр Ольга Абрамова. Уго та выллем кутсконъёс Удмуртиын вал ни. Вазенгес кылдытэм МТС-ёсты (машинно-тракторной станция) али банкротэн яло.

Эдуард Степанов

Удмурт Дунне
By Удмурт Дунне Июнь 25, 2018 13:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<