384 школаез йылпумъясь пусъемын «Дышетон удысын вормонъёс понна» медален

Удмурт Дунне
By Удмурт Дунне Июнь 29, 2018 12:05

Удмуртиысь 6 сюрс 931 пинал йылпумъяз школаез. 384 ныл но пи дунъямын «Дышетон удысын вормонъёс понна» медален.

А. Горбунов

Республикаысь устооссэ 27 егитъёсты данъязы резиденциын.

Удмуртилэн Тӧроезлэн резиденцияз данъязы республикаысь устооссэ 27 егитъёсты. Соос визьнодо луэмзэс возьматӥзы огъя кун экзаменын, пӧртэм олимпиадаосын, Россиысь но дуннеысь конкурсъёсын.

Нылъёсты но пиосты ӟечкылазы Правительстволэн Тӧроез Ярослав Семёнов, Кун Кенешлэн Тӧроезлэн воштӥсез Надежда Михайлова, дышетонъя но наукая министр Светлана Болотникова.

— Тӥ устоосыз пӧлысь устоосыз! Бадӟым улонэ нырысетӥ вамышъёс гинэ лэсьтӥськоды ай, нош али ик басьтӥды ни синмаськымон вормонъёс. Малпасько, тросэз вылӥ кивалтӥсьёслэн таӵе яркыт сюрессы ӧй вал. Соин азьланяз но мед удалтоз тӥледлы, мед быгатоды тодон-валанъёстэс азинтыны. Уката но тау кареме потэ мумы-бубыостылы, дышетӥсьёстылы. Малы ке шуоно вормон ас кожаз уг лыкты, — ӟечкылаз люкаськемъёсты Ярослав Семёнов.

Шумпотоно, таӵе данъян ужрадын городъёсысь пиналъёс гинэ ӧй вал. Тани Кристина Семёнова йылпумъяз Алнаш ёросысь Байтэрек школаез. Ӟуч кылъя ЕГЭ-зэ 100 баллы гожтӥз, медаль басьтӥз.

Правительстволэн Тӧроез Я. Семёнов но Алнаш ёросысь К. Семёнова.

Нылызлэн вормонэзлы анаез Лилия Раифовна уг паймы. Уго Кристина — туж тыршись, уйшор берозь но книгаосын пуке. Азьланяз Кристиналэн переводчик луэмез потэ, дасяське кунсьӧр кылъёсъя институтэ мыныны.

Мукетыз медальчи — Игорь Елизаров. Ӝужыт но чебер удмурт пияш йылпумъяз Пичи Пургалась гимназиез. 8-тӥ классозь Игорь дышетскиз вордскем гуртаз — Гожня школаын.

— Котькуд нунал со сюрес вылын: райцентре мынэ-бертэ. Урокъёсын косонэз ӧвӧл — ваньзэ ачиз тодэ, лэсьтэ, дасяське, — шуэ Игорьлэн анаез Ольга Леонидовна. — Ми картэным Василий Николаевичен сюлмаськиськом пимылы котыр ласянь юрттыны — олимпиадаосы пыриськон али дунын, сюрес понна но дун тыроно.

Игорь таӵе ужрадъёсысь вормонъёс вайылӥз. Со республикаын ортчем биологияя, географияя элькун олимпиадаослэн призёрзы луэ. Азьлане сюресэз сярысь но пияш рос-прос малпаськиз.

— Информатика но котыраз кыскиз, биологиен химия но гочатӥзы. Собере малпай: котырысь адямиослы маке но ӟечсэ лэсьтыны быгатоно. Озьы эмъян удысэ мыныны малпасько. Москваысь Сеченов нимо медициная университет но гочатэ, Удмуртиысь медакадемия но кельше, — вера Игорь.

Кристина но, Игорь но будо трос нылпиё семьяосын. Соос асьсэ сузэр-вынъёссылы но адӟем карымонэсь луо. Оскем потэ, та егитъёсмы, зэмос кивоштӥсьёслы пӧрмыса, вордскем шаеразы берытскозы.

Елена Скворцова
Туспуктӥз А. Горбунов

Удмурт Дунне
By Удмурт Дунне Июнь 29, 2018 12:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<