1 пенсионерез 1,3 мурт сюдэ. Малы будэтоно пенсие потон дырез?

Удмурт Дунне
By Удмурт Дунне Июнь 25, 2018 13:50

14-тӥ июне Россиысь Правительство пенсиосты тыронъя федерал законэ воштонъёс пыртонъя проектэз умоен лыдъяз. Сое кутӥзы ке, 2019-тӥ арын 1-тӥ январьысен пенсие потон арлыдэз йылтозы.

udmurt.ru 

Пенсие потытозь ужан понна трос тазалык кулэ луоз.

Трос нылпиё анайёсты утёзы

— Быдэс улонме колхозын ужаса, тазалыке быриз ни. Пенсиозь 5 ар кылиз на вал. Весь малпалляй: кызьы ке чидано. Нош табере пенсие потон вакытэз будэтӥзы ке, мар карыны кулэ секыт ужын тыршись адямиос? Фермае бодыен васькалом-а? Уждунэ коть бадӟым луысал ке — 8 сюрс манет басьтӥсько! — таӵе юанэн жингыртӥз Балезино ёросысь огысьтыз хозяйствоысь лыдӟисьмы.

Та нуналъёсы мукет но жингыръясьёс вал. Зэмен ик, Пенсиосъя фондлэн Интернет сайтаз пенсие потон арлыдэз будэтон сярысь ивортон поттэмын ни. Отын специалистъёс тодмато законопроектэн. Мукет кунъёсын угось пенсие потон арлыд азьвылгес ик будэтэмын ни. Выль законопроектъя воргоронъёс пенсие потозы 65, нош нылкышноос 63 аресазы. Ваньмыз со шуак уз луы — пенсие потон дырез арен-арен кузёмытозы. Нырысь ик со пыр ортчозы 1959-тӥ арын вордӥськем пиосмуртъёс но 1964-тӥ арын вордӥськем нылкышноос. Соос угось вуоно арын пенсие потыны дасясько. Закон кутӥзы ке, таос эшшо одӥг ар ужано луозы на. Удмуртстат ивортэмъя, озьы 2019-тӥ арын пенсие потытэк кылёз 6 сюрс пала адями. 1 пенсилэн быдӟалаез шаерамы шорлыдын 13 сюрс манет ке, озьыен, ог 78 миллион манет казнае кылёз. Россиын 1 миллион 484 сюрс мурт пенсие потыны кулэ вал ке, кӧня коньдон шыръяськоз… Пенсиосъя фондлэн сайтаз ивортэмын: эсьма, арлы быдэ 1 сюрс манетлы йылтыны луоз пенсиосты. Но та лыдпусъёсты ӵошатыны луоно меда?

Шаерамы 1-тӥ апрельлы пусъемын вал 456 сюрс 706 пенсионеръёс. Таос пӧлын инвалидъёс но, стажзыя пенсие потэмъёс но. Кылсярысь, вань пенсионеръёс пӧлысь 97 сюрс 91-ез — со ужась пенсионеръёс. Гуртъёсысь эмчиослы, дышетӥсьёслы 25 ар ужамзы бере ик выслугая пенсия тыриське ни, нош городъёсызлы — 30 ар тыршемзы бӧрсьы. 1980-тӥ аръёсы выслуга понна пенсия тыро вал соослы гинэ, кин ужысь кошке. Уже кылемъёслы сое ӧз тырылэ. Росстат ивортэмъя, кунамы сыӵе выплата басьтыса ужась дышетӥсьёс 1,1 миллион кузя, врачъёс — 659 сюрс адями. Соослэсь льготаоссэс таланы уг медо. Пенсие потон арлыдзы уз воштӥськы тазалыксылы изъян вайись удысъёсын, цехъёсын, шахтаосын ужасьёслэн. Чугун сюрес вылын ужасьёсты, экспедициосы потасьёсты, нюлэс дасясьёсты, флотын ужасьёсты, авиациын тыршисьёсты, колониосын югдурез чакласьёсты, али сямен ик, пенсие вазь келялозы. Озьы ик сюрес лэсьтон но гурт удысын гырон-кизён ужъёсын тракторен ужась нылкышноослы льготаос чакламын. 5 но солэсь трос нылпи ваем анайёсты, инвалид пиналэз будэтӥсьёсты, куд-ог инвалидъёсты, Чернобыле ветлэмъёсты но куд-ог мукетъёссэ уз исалэ.

Удмуртстат ивортэмъя, шаерысьтымы 580 сюрс ужасьёслэсь Пенсиосъя фондэ отчислениос вуо. Соос борды ик ватсано на 40 сюрс ужбергатӥсьёсты. Ваньзэсты таосты огазеяса, таӵе лыдпус потэ: 1 пенсионерез 1,3 адями сюдэ. Но отчислениос трос уг люкасько. Угось туж тросэз конвертэн уксё басьто я воксё но асьсэ вылэ лушкем ужало, соин ик Пенсиосъя фондэ отчислениоссы но пичиесь, со луонлык уг сёты тросгес пенсия тырыны. Азьвыл 2 ужась мурт 1 пенсионерез сюдэ вал. 5 ар талэсь азьло пенсионеръёслэн лыдзы но 31 сюрслы ичигес вал. Нош али соос арлы быдэ йыло. Со вакытэ ик ужасьёслэн лыдзы кулэсме. 1990-тӥ аръёсы угось нылпиос ичи вордӥськизы.

Киын но йырын ужасьёс

Кун служащийёслэсь пенсие потон арлыдзэс ӝыны арлы йылтӥзы ни кылем арын. Таос пӧлын реформа шугъяськонъёстэк ортчиз кадь. Кабинетын ужасьёс чалмыт ик тыршозы, уждунзы угось пенсилэсь бадӟымгес. Нош секыт ужын бергасьёс пенсие потонзэс лыдъяса гинэ уло. Уноезлэн тазалыксы лябӟемын ни.

Зэм, Росстат ивортэмъя, адямилэн улон вакытыз кузьгес луиз. 2000-тӥ арен ӵошатыса, 2017-тӥ арын воргоронъёс 8,5 арлы кемагес улыны кутскизы, нылкышноос — 5,4 арлы. 2028-тӥ арын воргоронъёс 75 аресозь улыны кулэ, пе, нылкышноос — 85 аресозь. 1920-тӥ аръёсы адямилэн шоро-куспо улон вакытыз 43 арес вал.

Россиысь Правительство чакламъя, али ужан мылкыдзы адямиослэн бадӟымгес. Кылсярысь, ужасьёс радын 12 миллион пенсионеръёс — вань пенсионеръёс пӧлысь со 27 процентэз.

Калыкез улон-вылонын утён политикая но ужъя министрлэн воштӥсез Лариса Вершинина ивортэмъя, туннэ ужтэк пукисьёс шаерамы 6 сюрс но ӝыны пала лыдъясько. Куд-ог вакытъёсы та лыдпус 2 поллы но тросгес вал. Россиын али 3,7 миллион адями уже интыянъя центръёсын учётэ басьтэмын.

— Шаерамы уж ӵектӥсьёс вань, — шуэ Лариса Вершинина. — 14,5 сюрс вакансия пусъемын. Но тросэз бырйисько, ӵектэм интые мынэмзы уг поты. Кладовщик, диспетчер, утялскись, почтальон кариськемзы уг поты. Черодзэс возьмасьёс пӧлын уногес 40-45 аресъемъёс. Уноез соос пӧлысь вылӥ образованиен: бухгалтеръёс, юристъёс. Ас вакытаз та удысъя дышетскисьёс лачак вал угось. Нош табере ужтэк пуко. Юн уг тырмо ремесленникъёс. Соин но егитъёс пӧлын ялан валэктон уж нуиськомы, одно ик вузэ пырыны дыртоно ӧвӧл шуыса. Училищеосты йылпумъяса сюбег специалист луэмъёс угось котьку кулэ вал но котьку кулэ луозы. Соосты заводъёс но ялан утчало. Секытгес югдур пенсие потон азязы ужтэк кылемъёсын. Туэ нырысетӥ кварталэ таос 175 кузя пусъемын. Тӥни сыӵеосты кутэмзы уггес поты. Куд-огезлы соку ик арлыдыз шоры возьмато. Но сыӵе учыръёсъя ми соку ик Прокуратурае ивортӥськомы, угось арлыдъя уже кутытэк кельтон — со законэз тӥян. Соин ик уж сётӥсьёс но кескичесь луизы ни: уже кутытэк кельтэмзылэсь мугзэ валэкто, куриськисьлэн квалификациез уг тупа шуыса.

Елена Сараматова
Туспуктэм: udmurt.ru 

Удмурт Дунне
By Удмурт Дунне Июнь 25, 2018 13:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<