Ӟуз-ӟаз джаз. Лия Малыхлэн нылпиослы выль чуръёсыз

Удмурт Дунне
By Удмурт Дунне Июнь 25, 2018 17:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Лия Малых

Лия Яковлевна Малых — удмурт гожъяськись, Удмурт Элькунысь сӥё-дано журналист.

Висьыны усиз Шунды

Висьыны усиз Шунды:

Чаклатэк юиз, вылды,

Ошмесысь кезьыт вуэз —

Уг ни луы ньылэмез.

Ӟырдам Шундыез Пилем

Шобыртӥз сьӧд тулупен,

Вуюись нош кобыен

Сектаз эмъюмо вуэн.

Вазь ӵукна Шунды сайказ,

Йырыз уг вись ни, йӧназ.

Сиоссэ пазьгиз музэ,

Выль нунал усьтӥз синзэ.

Пилем усьтонзэ ыштӥз

Юмшаны потӥз Пилем.

Думетысь мозмем выллем,

Йырчукин бекмылляськиз —

Усьтонэз музэ усиз.

— Бертэме уз лу доре,

Кытчы пыром табере? —

Зоре Пилем синвуэн,

Коттэ музъемез вуэн.

Шунды Пилемез жаляз,

Йӧтӥськиз каллен бордаз:

— Лэзь монэ тон инбаме,

Гылто зореныд бамме,

Азвесяло сиосме —

Инмысен музъем вылэ

Буёло лёгет валё.

Озёлскиз бӧрдӥсь Пилем.

Шунды, пӧртмаськись музэн,

Сизьым пӧртэм нюжалэсь

Пужъятӥз Вуюисез,

Со ик ӝутӥз усьтонэз.

Синвузэ Пилем ӵушиз,

Ингож сьӧры ӵужонскиз.

Коӵыш мынӥз базаре

Ог ӵукна, арня бере,

Коӵыш мынӥз базаре

Вить пиосыныз уртче

Вуз басьтыны котькыӵе.

Масилы куриз изьы,

Мусялы басьтӥз пӧзьы,

Васькалы — шуныт башмак,

Яшкалы — сюрсо пенжак.

Пичиез пиез Кис-Кис

Огназ кузьымтэк кылиз —

Басьтыны коньдон быриз.

Вуз карись айы Ӟазег

Коӵышпилы чик дунтэк

Кузьмаз небыт гын сапег.

Пудо уллё крезьгура

Коргидысь кырӟась Атас

Эшъёссэ бордаз люказ,

Кылдытомы, шуэ, джаз,

Нималом сое «Ӟуз-ӟаз».

Крезьгуро инструментъёс

Быръелэ, пе, асьтэос.

Ошаклы кельшиз труба —

Та, пе, мыным туж тупа.

Скаллы медло саксофон,

Акыльтӥз солы бӧксон.

Парсь бырйиз аккордеон,

Кельшиз бирдыё шудон.

Така куриз барабан:

— Сюръёслы усто таран.

Лекъяське айы Курка:

— Ваелэ мыным скрипка!

Нош Курег кутӥз флейта:

— Уӵылы кельшод ук та!

Атасмы кутӥз боды,

Дирижёр со, валады.

Пудо уллё крезьгура,

Кыдёке вӧлске куара.

Кин-о пыраз бакчае?

— Кече, кече, сюрое,

Кин-о пыраз бакчае,

Сииз кубиста куарез,

Йырйиз улмопу ваез?

— Ме-ме-ме! Сикысь лудкеч

Кунояз, луоз, ӟеч-ӟеч.

Пумитай ке кытысь ке,

Возьмато солы сюрме!

— Курег, курег, куреге,

Кин-о пыраз бакчае,

Каръяськиз турын пӧлы,

Пузъёссэ ватӥз кинлы?

— Куд-кудах-кудах! Отчы

Каръяськиз, луоз, ӟичы.

Лушказ гидысь пузъёсты,

Потто, пе, тютюосты.

— Пыли-пыли, бабляе,

Кин-о пыраз бакчае,

Валтыса ыж уллёез,

Лёгаз турнано возез?

— Бле-бле-бле! Нылъёс, пиос,

Ужлы ёрмем пиналъёс,

Пыразы, луоз, дэмен,

Шудӥзы чималиен.

— Куча, куча, кучае,

Мар ӧд возьма бакчаез,

Лэзид отчы пудоез?

Кин берыктоз изъянэз?

— Гав-гав-гав! Возиз думет.

Бакча капкалы пуннет

Уз пӧрмы, дыр, мынэсьтым.

Кин янгыш меда татын?

Чиньыос — кибашлыос

Вить кибашлы чиньыос,

Люконтэм агай-вынъёс,

Малпазы вурны дэрем,

Вузлы мынӥзы дэмен.

Палагай басьтӥз чиль-вень,

Азьгарай — бирды курень,

Шорник вор куриз сӥньыс,

Нимтэмез чиньы — чиндыс,

Нош Пичи Очи — качы.

Бертыса ни доразы

Вылымтэ огез вуззы.

Чабкиськизы: ма-ма-ма,

Нокин басьтымтэ басма!

Шат вурод сотэк дэрем?

Чиньыос нош ик дэмен

Вамыштӥзы лавкае:

Басмадэс, пе, ваелэ…

Вить кибашлы чиньыос,

Люконтэм агай-вынъёс,

Вуризы дэмен дэрем,

Ужзы туж усто пӧрмем.

Удмурт Дунне
By Удмурт Дунне Июнь 25, 2018 17:18 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<