Укмыс ар — шинелен

Удмурт Дунне
By Удмурт Дунне Май 15, 2018 15:30

Пичи Пурга ёросысь Выль Мӧньяысь В. Панфилов (паллянысез) ӵош ожмаськем эшеныз.

Ӵужатайме адӟыны мыным ӧз кылды. Мон вордӥськи, со улонысь кошкем бере 4 ар ортчыса. Азям — ожъёс вискын лэсьтэм фото-осыз гинэ. Ӵужатае солдат сапеген вамышъям 9 ар ӵоже…

Толэзь пала — нюрын

Семья архивамы ӵужатаелэн кӧня ке туспуктэмез утиське. Тани со 1930-тӥ аръёсысь 18 аресъем пияш, йыраз — кизилиен будёновка, нош тани 1940-тӥ аръёсысь йӧно командир — фуражкаен, гадяз медален, мукетаз быдэс семьяеныз ӵош — утись-вордӥсь, атай, собере — секыт виськыкуз ини — туж чиед, укыр жадем тусо… Но кӧня асме тодӥсько, милемлы котьку тужгес но тунсыко потылӥз фронтын, ожъёс вискын лэсьтэм туспуктэмез. Отын со егит, йӧно, чебер но кышкасьтэм, совето фильмъёсысь командир выллем.

Ӵужатае Владимир Панфилович Панфилов (Панфил Лади) вордӥськиз 1918-тӥ арын Пичи Пурга ёросысь Выль Мӧнья гуртын. Армие мынӥз 1937-тӥ арын. Службазэ ортчиз 1941-тӥ арозь. Пересьёс али но верало на: кыӵе шумпотыса бертӥз, пе, вал Лади вордӥськем гуртаз, макем мӧзмемын вал со гурт ужлэсь, аслаз калыкезлэсь! Но толэзь но ортчиз-а, ӧз-а, кутскиз Быдӟым ож. Ӵужатайме нырысь нуналъёсаз ик басьтӥзы фронтэ.

Война азьын Владимир Панфилович службазэ химия войскоосын ортчем. Жаль, ми, солэн внукъёсыз, ум ни тодӥське, кинэн но кытын ожмаськиз соку ӵужатаймы. Но атаймылы со вералля вылэм химия атака дыръя кызен коттэм мучоло пыр шокаса улэп кылемез сярысь. Нош Быдӟым война дыръя ӵужатае миномётной расчётлэн командирез, сержант вал ни. Ожмаськонъёсын аслэсьтыз кышкасьтэм луэмзэ возьматъяз, солдатъёслэн тыбыръёссы сьӧры ватскыса ӧз улы. Соин но кӧня ке пол секыт сӧсырмыны шедьылӥз, 2 пол контузить каремын вал. Нош огпол, оборонаез возьыса, эшъёсыныз ӵош быдэс толэзь ӵоже нюр интыын, кезьыт дэри пӧлын улӥллям, но сётскиллямтэ. Зэм, пиналъёсызлы война сярысь мадьыны ӵужатаймы уг яраты, пе, вал.

Коммунист но командир

Ожмаськонысь Владимир Панфилович бертӥз 1946-тӥ арын, губырес инвалид луыса (нош солы соку 28 арес гинэ вал ай!). Вань кылем улонзэ сое курадӟытӥзы фронтын басьтэм яраосыз. Но висемез шоры учкытэк, ӵужатае вазь ӵукнаысен бер ӝытозь колхозын, аслаз сад-бакчаяз, хозяйствояз ужам. Зэм, атаелэн солы, аслаз атаезлы, кӧтӝожез но кылемын вал. Со, пе, монэ укыр юн возиз, эшъёсыным ӵошатыса, мынам шудон дыры ик ӧй вал, пичи шаянтэм понна но туж юн куаретылӥз… Владимир Панфилович зэмзэ но ачиз азе но, пиез азе но туж юн куронъёс пуктэ вылэм. 9 ар ӵоже солдат улонэн, ожгар дисциплинаен улэм адями — со мукет сямен уг но быгаты вал, дыр, одӥг пиез укыр эрки будоз шуыса, оло, сюлмаськиз. Собере, миномётной расчётлэн командирез вал бере, командаос зол кесяськыса сётъяно вал, оло, со дырысь ик кылиз пиез шоры юн кеськон сямыз. Ма, контузиос бере пельыз но лябгес вылэм ини, инвалид кылеменыз, ужаны но ӟигарыз туж ик ӧй вал…

Сӧсырмем бервылъёсыз котькуд нунал висьытӥзы ке но, ӵужатае туж яратэм улонэз, туж трос ужамзэ валэктэ вылэм войнаен сэрен вуттымтэзэ лэсьтыны тыршеменыз. Гуртоос сое туж дунъяло вал зэмлыкез яратэмез понна. Шуо: со, пе, зэмос коммунист вал. Туж куректылэм, коммунистэ кин сюрем донгиське шуыса, угось коммунист котыр ласянь адӟем карымон, пе, луыны кулэ. Пересьёс верамъя, Лади агай адӟемпотостэм карылэм мурт чотын улыны тыршисьёсты, азьтэмъёсты. Нош атае вералля вал: со туж дунъялляз аслэсьтыз выжызэ, туж гажалляз песятайёссэ. Яратылӥз инкуазез, чорыганы, пӧйшураны ветлӥз.

Выль Мӧнья гуртысь пересьёс Лади агаез али но тодазы возё на, трос муш вордэмысьтыз. Войнаын сӧсырмеменыз сэрен губырскем пиосмурт нырысь кыскем чечызэ бадӟым тэркые, пе, понэ вал. Сое веръяны Мӧньялась вань пиналъёс вуылӥллям. Муш вордэм сяна, ӵужатае бадӟым улмо сад возем. Мӧньялан тужгес чеберез лыдъяськем. Отын сомында улмоез вылэм — лушкасьёслэн но кӧтсы тырылэм, пудо но уг ни, пе, сиы вал. Паймисько: кызьы зэмлыкез сокем гажась адями чида вылэм, солэн улмо садаз ялан лушкаськыны пырало шуыса? Но апае (ӵужатаелэн нылыз) тодаз вае:

— Атай тодэ вал, быдэс гурт солэн садаз пыра шуыса, но киыныз гинэ шонтылӥз: ваньзылы тырмоз, мед сиёзы ойдо… Аслэсьтыз садзэ сяна, атай колхоз садэз но утялтыса, чакласа возьыны тыршиз.

«Шундыез эшшо адӟысал на..»

Ӵужатаелэн кузпалыз — Елена Ивановна — туж чебер, кускозяз чиль-чиль сьӧд йырсиё, ӝикыт кышномурт вал. Гуртоос сое Лелёк апай шуылӥзы. Лелёк апай — мынам мусо ӵужанае. Сое мон али кадь ик тодӥсько на. Со ужам колхозын. Война дыръя нюлэс корам. Лади картэныз соос гожтӥськемын ке но вал, малы ке аслаз Иванова фамилиеныз ик улӥз. Лелёк но Лади 2 пинал будэтӥзы — Васи но Кати. Соослы но инкуазез яратон мылкыд пыӵатӥзы. Озьы война бӧрсьы Владимир Панфиловичлэн улонэз, одӥг ласянь, ӟеч радъяськиз, ожын бырем эшъёсыныз ӵошатыса: со вуттӥз ик бадӟым сад будэтыны, корка пуктыны, пизэ визьманы. Озьыен, со шудо. Но Лади агай ачиз гинэ тодӥз, вылды, макем трос лулкужым, чидан кулэ луиз со понна. Мугораз, сэръёсаз кылем чалепъёсыз алекмытыса возизы, соосын сэрен тыбыраз потэм бадӟым лёг юнгес куасалтӥз. Одӥгез чалеп, 10 ар ӵоже пельпумаз улыса, ачиз ик потӥз. Та сярысь ӵемысь вералляз атае. Озьы, пе, пиосмуртлэн мугорыз со сьӧсь узвесьёсын ачиз нюръяськыны выриз. Но сюлэм дорысь узвесез озьы гинэ уд ни потты. Ӧйтӧд малы, но эмъясьёс доры вазиськыны песятай ӧз дырты. Ужзэ, мушъёссэ огдырлы ке но кельтэмез ӧз поты, лэся.

Улонысь кошкон азяз туж зол курадӟиз. Воксё катьтэммыса, кыллиз валес вылын, кизэ но, пыдзэ но ӝутъямез ӧз ни луы. Ожлэн бервылъёсыз тазалыксэ сюпсьыса быдтӥзы. Кулон азяз одӥг гинэ веранэз вылэм: «Жаль, та дуннеысь туж вазь кошкисько. Мынам песятайёсы, атайёсы та чебер улонэз кема адӟизы (соос 92-94 аресозь улылӥллям — авт.), мон но сокема улысал, шундыез адӟысал на…» Ӵужатае кулӥз 1972-тӥ арын, туж шундыё гужем нуналэ, 30-тӥ июне, 59 аресказ мыныкуз…

Фронтысь салам

Атае, Василий Владимирович, ӵужатайлэсь ужзэ азинтӥз, мушкасе дышетскиз. Армиын службазэ ортчиз военно-морской флотын. Вуылӥз Ближний Востокысь, Африкаысь пӧсь интыосы, ваче вуонъёсы.

Атай ӵемысь ассэ пыкылӥз:

— Малы меда атаен тросгес ӧм вераське, война сярысь умой-умой ӧй юалляськы, малы меда атайлэсь медальёссэ но пичи дыръямы дунъяны ӧм валалэ, шудыса кир-пазь каримы…

Со понна атаймы туж данъяськылӥз ӵужатайлэн фронтысь ваем трофееныз — немец пуньыен. Дорамы кин ке дуно куно пыре ке, атай солы одно ик та пуньыез мыче вал. Чилятэм пуньылэн кутонэзлэн берысьтыз немец букваосты, свастикаез но 2 ӧрӟиосты адӟыса, куноосмы воксё паймылӥзы.

Нялтас вераса, семьяямы та пуньы гинэ вормылӥз тып-тып кынмем чечыез поттаны, мукетъёсыз малы ке куасалско вал. Сиськыкумы ми но, пичи пиналъёс, куспамы та пуньы понна вожмаськылӥм, лушкем шудыны эшъёсмы пӧлы но поттам, кӧня ке пол сое ыштылӥм но нош шедьтылӥм. Быдӟым ожысь ваем трофей шоры пӧртэм сямен учкыны луэ. Но ми понна со семьямылэн историезлэн пичи люкетэз. Та пуньыен али нокин уг сиськы, уг шуды, сое лачаса возиськом. Угось табере, пуньы но уно аръёс талэсь азьвыл фронтын лэсьтэм туспуктэмъёс сяна, ӵужатаймылэсь номыр кылемын ӧвӧл ни. Эшшо — тани та тодэ ваёнъёс. Зэм, бадӟым кунамы улӥсь котькуд адямилэн Быдӟым оже ветлэм ӵыжы-выжыез сярысь аслаз тодэ ваёнъёсыз, аслаз историез. Со историез асьмелы тодоно азьлань вамышъян понна.

Ӵужатай туж ӧпкелем, солэн вакчи улонысьтыз 9 арез солдат сапеген ветлонлы кошкиз шуыса. Угось солэн но, война пыр ортчем мукет пиослэн но туж потэ вал шундылы, котькуд сайкыт нуналлы шумпотэмзы. Улонысь кошкыкуз, ӵужатай ӧз но малпа, дыр: тупаса улонлэн чагыр инэз азьланяз но пильмаськылоз на…

Елена Миннигараева

 

Удмурт Дунне
By Удмурт Дунне Май 15, 2018 15:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<