Сюмси ёросысь Акил: Ёрос центр бордын улон майбыр

Удмурт Дунне
By Удмурт Дунне 11 мая, 2018 13:17

Сюмси ёросысь Акил гуртэн тодматскыны кылдӥз зоро нунал дыръя. Пичи машинамы ӧжыт гинэ нӧдэ ӧз выйы. Но гуртоос, сюресъёссы уродэсь шуыса, уг ӝожтӥсько. Умой улӥськом, уж, клуб, библиотека, медпункт вань, шуо. Одӥг гинэ шат сюлмаськонзы — куд-ог анай-атайёс пиналъёссэс Сюмсие нылпи садэ нуыны-вайыны шугъясько.

Выль юртъёс пуктӥсько.

Суро-пожо

Гурт бадӟым сюрес дурын интыяськемын, ёрос центрлэсь 6 иськемын гинэ. Соин но, дыр, татын улон азинске — егитъёс пуктӥсько, нылпиос вордӥсько. Акилын 60 хозяйствоын 250-лэсь тросгес адями улэ. Уноез — 163-ез — ужась муртъёс, школаын ог 30 пинал дышетске, нылпи садэ ветлоно кадьёсыз — 22, пенсионеръёссы но ӧжыт ӧвӧл — 48 мурт.

Гуртын клубзы, библиотеказы, медпунктсы вань. Азьвыл аръёсы школа-садзы ужаз, но ог 8 ар талэсь азьло со ворсаськиз — нылпиос ӧжытгес луизы вал. Со интые пересьёслэсь юртсэс усьтӥзы. Отын табере огназы кылем 20 пала арлыдоос огвакытэ улыны быгато.

Ужась адямилы уж сюре, шуо акилъёс. «Труд» кооперативной хозяйствоын Акилысь но артысь

Туспуктӥз Елена Владимирова

Акилъёс гуртсэс чылкыт возён сярысь сюлмасько.

Выселокысь 30 пала адямиос тыршо. Хозяйствоен 10 арлэсь кема кивалтэ ини Иван Владимиров. Иван Спиридонович Елена Валентиновна кузпалыныз татчы 30 ар талэсь азьло Ижысь гурт удысъя институт бере сюризы. Кыкназы агрономлы дышетскемын. И. Владимиров ас удысэзъя ужаны кутскиз. Нош Елена Валентиновна нырысь-валысь нылпиен пукиз, берло солы гуртысь библиотекаын инты сюриз. Со дырысен книгаен, лулчеберет удысэн кышномурт ӧз люкиськылы ни. Елена Валентиновна 30 ар пала библиотекарь луыса ужа ни, али тырше Сюмсиысь ёрос библиотекаын. Сомында ар Акилын улыса, та палъёс матын луизы ни, шуэ кышномурт.

— Акил ӟуч гурт вылэм, — вера Е. Владимирова. — Татысь пересьёс верамъя, гуртлы ним сётэм татчы улыны лыктэм Акил воргорон. Но нырысь-валысь Акилэз Починок при ключе Белокаменном шуо вылэм. 1859-тӥ арын татын 7 хозяйствоосын 36 воргорон но 34 кышномурт улӥллям, вукозы но вылэм. Али гурт суро-пожо ини, татчы артысь удмурт Выселокысь адямиос улыны лыктӥллям.

Асфальтсы ӧвӧл ай.

Кибашлы семья

Тодматскыны кылдӥз гуртысь Арыковъёслэн аспӧртэмлыко семьяенызы. Татьяна Борисовна — Марий Эл Элькунысь Карлыганысь, Леонид Валентинович — Татарстанысь Улын Ушма гуртысь. Егит семья Сюмси палъёсы 1990-тӥ аръёсы лыктӥз, муш вордыны кутскиз. Т. Арыкова агрономлы дышетскемын ке но, удысэзъя ужаны ӧз мыны. Карлыганын улыкуз, «Ӟардон» ансамбльын кырӟалляз, крезьгурез яратэмысьтыз ик, Акилысь клубын ужаны кутскиз вал.

— Клубысь нылпиос уг бырыло вал — яратӥзы теннисэн шудыны, — вера кышномурт. — Но клубын ужасьлы дышетскеме ӧвӧл шуыса, кошконо луи. Казыр гурт калыкен ужаны но секытгес луиз.

Ошмесо шаерысь удмуртъёс пӧлын ог 20 ар пала улыса но, кузпалъёс асьсэ палась аспӧртэм вераськон сямзэс утиллям. Татьяна Борисовна, Карлыган палъёсызлэсь мӧзмыса, отысь удмуртъёслэсь чеберъяськон арбериоссэс вурытэм. Камализэ шулдыръяськонъёс дыръя дӥсялля. Зэм, Арыковъёслэн нылпиоссы удмурт кылэз уг тодо ни. Нялтас вераса, гуртын улӥсь тросэз удмуртъёс куспазы ӟучен верасько.

Арыков кузпалъёс кыкназы ик кибашлыос. Татьяна Борисовна ыж гонлэсь пыдвылъёс гындэ. Леонид Валентинович пулэсь пӧртэм арбериос лэсьтэ. Ӝужыт капказы но солэн ужез — ӵуж буям пулэсь капка кыдёкысен адӟиське. Арыковъёслэн 3 нылпизы. Мыло-кыдо семья корка котыраз сюлмысь ужа, пудо вордэ, муш уте.

Арыковъёслэн капказы крепость быдӟа.

Одӥг сюлмаськон

Гуртын ваньмыз вань — клуб, библиотека, магазин, ФАП, ёрос центрлы матын уло. Вераны кулэ, быдэс муниципал кылдытэтын (отчы ог 10 гурт пыре) одӥг гинэ хозяйство — «Труд». Кӧня ке ар талэсь азьло отын выль ферма ӝутӥзы. Ужасьёслэн шоро-куспо арлыдзы 40 арес.

Гуртын Сюмсиысь ужбергатӥсьёслэн 2 пилорамазы усьтэмын, отын но гуртоос ик тыршо. Хозяйство но муниципал кылдытэт сюрессэс чакласа возё, гуртэ газ но вуэмын ни. Одӥг гинэ сюлмаськонзы вань — тэшкылиос ласянь. Нылпи садэз ворсакузы, шуизы вал, пиналъёсты Сюмсие автобусэн нуллозы, веразы гуртоос. Акилысь дышетскисьёсты автобусэн нулло, огвакытэ тэшкылиосты но бордазы кутылӥзы. Али школаын дышетскисьёс быдэс автобус тыр луизы ини, куронъёс но чурытазы, тэшкылиослы инты уг сюры. Сюмсиын ужась гуртоос пиналъёссэс нылпи садэ нуо-ваё ке, куд-огезлэн машинаез яке луонлыкез ӧвӧл нуналаз 2 пол черкогуртэ вуылыны. Соин кӧня ке пичиос песянай-песятайёсынызы доразы пуконо луо.

Ангелина Снигирёва

Удмурт Дунне
By Удмурт Дунне 11 мая, 2018 13:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<