Саентология сярысь. Курике эн шеде!

Удмурт Дунне
By Удмурт Дунне 8 мая, 2018 14:01

Кылем даурлэн шораз шундыпуксён палан вӧлмиз дианетика наука. Сое кылдытӥз Рон Хаббард. Тодмо писатель-фантаст оскытэ, солэн амалъёсызлы дурбасьтыса улӥд ке, мугор висёнъёслэсь но, урод мылкыдъёслэсь но мозмытскод. Мон, пе, дышето ӟечезлы гинэ оскыны, озьы вань шуг-секытъёсты вормыны луэ.

 

Катэз тӥясь черк

Хаббард та малпанъёссэ азинтон понна колледж но кылдытӥз. Нош 1955-тӥ арын Вашингтонын усьтэмын вал нырысетӥ саентологической черк.

Али та черк дуннеын огез бадӟымез луэ, тужгес но сое яратӥзы США-ын. Отчы пыро 154 кунъёсысь 3200 огазеяськонъёс.

Та оскон кылдыкуз ик пӧртэм кунъёсысь кивалтэтъёсын ваче вуиз. Саентологиез вӧлмытӥсьёс вылэ огпол гинэ уголовной но административной уж ӝутэмын ӧй вал ни. Со ужъёсты учконо ке, саентология черк уксё поттон огазеяськонлы кельше. Со оскисьёссэ ляльчиос интыын возе, ӵыжы-выжыосынызы, эшъёсынызы кусыпъёссэс сӧре, нош тушмонасьёссэ уг жаля, куддыръя вийылэ но. Соин ик тросэз кунъёс та осконлы пумит луо.

Тодмо луон гочатэ

Россиын та черк тоталитарной секта лыдъяське. Кылсярысь, 2007-тӥ арын Санкт-Петербургысь суд пуктӥз: «Саентологический центр» катэз тӥяса ужа. Кылсярысь, соос, пе, лицензиятэк-мартэк дышетон но эмъяськон уж нуизы, со понна калыклэсь уксёзэ кыскизы. 2008-тӥ арын тулыспалэ Санкт-Петербургысь саентологъёслэн штаб-квартираязы шедьтэмын вал пӧртэм аудиогожтэмъёс. 2017-тӥ арын 8-тӥ инвожое кырмемын Санкт-Петербургысь саентологической черклэн огез азьветлӥсез Иван Мацицкий, солэсь азьвыл пытсэт улэ пуктэмын огазеяськонлэн огез квалтӥсез Галина Шуринова, валтӥсь бухгалтеръёс Сахиб Алиев но Анастасия Терентьева.

Югдурез утисьёс верало, та черкысь 5 адями 4 ар ӵоже калыклэсь уксёзэ кыскыса улӥз. Огазеяськон 276 миллион манетлэсь ятыр уксё поттэм. Оскись адямиос уксёзэс сёто вал дышетскемзы понна. Со сяна, янгыше уськытэмъёслэн ӝажыоссы вылысь шедьтэмын экстремистской книгаос, таосты но соос вӧлмытъязы.

Вераны кулэ, та черке трос тодмо адямиос, бизнесменъёс сюро, огшоры калык татчы, ӟечезлы оскыса, вамыштэ.

Аналскон

Со сяна, саентологъёслэн черксы политикае но мерске. Кылсярысь, соос пыриськизы Украинаын ортчытэм «нап-ӵуж» революцие, Майданын ӝутскем бугыръяськонэ. Огез саентолог — Украинаысь правительство понна дурбасьтӥсь — «Медаль свободы» гадьпусэн но пусъемын вал.

Саентологъёс туж кескич ужало. Мерлыко улонэ пыриськом, наркоманиен, курыт юонэн нюръяськиськом, йыружчиосты шонер сюрес вылэ поттӥськом, шуо. Нош катэз тӥямзы сярысь вераськон ӝутске ке, янгыше уськыто интыосысь огазеяськонъёссэс, кин катлы пумит ужа, соосты ворсалом, шуо.

Ваньмыз — Хаббардъя

Удмуртиын саентологъёс огыр-бугыр поттӥзы 1990-тӥ-2000-тӥ аръёсы «Ижевский гуманитарный центр «Дианетика» (регистрациез таламын) огазеяськон улсын. Али вань 2 нимаз огазеяськонъёс (соос нокытын пусйымтэ), озьы ик саентологиез вӧлмыто пӧртэм интыосысь нимаз адямиос. Удмуртиысь ФСБ, кылсярысь, алигес огзэ шарае поттӥз — Александр Кислицин, «Интерком» центрлэн кивалтӥсез. Компаниезлэсь ужзэ со Хаббардлэн дышетэмезъя радъяз. Воргоронлэн уж дурысьтыз но гуртысьтыз трос книгаос шедьтэмын, куд-огъёсыз экстремистской лыдъясько.

Озьы ик шарае поттэмын Елена Вепрева — ужбергатӥсёслэн калыккуспо WISE ассоциацизылэн ёзчиез, «Счастливая семья» огазеяськонлэн но «Major» компанилэн кивалтӥсьсы. Йырез усыкмытӥсь суретъёсын но юонэн нюръяськон вылысь Елена Вепрева Ижысь школаостӥ ортчем, школьникъёслы лекциос лыдӟем, Рон Хаббардлэн малпанъёсыз сярысь верам. Ижысь дышетонъя управление та сярысь тодытэк кылем.

Озьы ик Ижын вань «Продавай.ру» вузкаронни, со ужбергатӥсьёс пӧлын дышетон радъялля, озьы вӧлмытэ Хаббардлэсь малпанъёссэ, оскон сярысь книгаос, журналъёс, кагазъёс вузалля.

Сак лу: кышкыт!

Саентология трос пӧртэм амалъёс пыр калыклэсь уксёзэ кыске. Со психотерапия, ужбергатӥсьёслы, нылпиослы чаклам дышетсконъёс, йырез усыкмытӥсь суретъёслэсь но юонлэсь мозмытыны оскытонъёс.

— Кышкыт, саентологъёс гипноз, зомбирование амалъёсты куто шуыса, пумиськон бере адямилэн мылкыдыз куашка. Ваньзэ тае тодытэк, мон но сектантъёслэн мурдоязы сюри, — шуэ азьвыл саентолог. — Та черкын Хаббардлэн книгаосыныз вуз каро, курсъёс дэмлало. Ваньзэ тае соос осконэн лыдъяло. Нырысь тынэсьтыд трос ик уксё уг куро, но собере дунзы будэ, 500 долларозь вуэ. Кылдӥз ке, валалоды, со тренингъёс тӥледлы номыр выльзэ ӧз сётэ шуыса, нош ӧд валалэ ке, психотренингъёслэн четлыкысьтызы потыны уд быгатэ ни но саентологъёслы сётоды вань уксёдэс, машинадэс, квартирадэс. Озьы луиз монэн. Уг поты ке таӵе гуэ сюремды, тодоно: Хаббардлэсь малпанъёссэ калык пӧлы вӧлмыто «Дианетика», «Нарконон», «Криминон», «Рубикон» центръёс, пӧртэм бизнес-школаос. Тазалыкты, дырды но уксёды тӥледлы дуно ке, чаклаське ваньмызлэсь, мар герӟаськемын Рон Хаббардлэн нимыныз. Ваньмыз со уксё поттон гинэ.

Сергей БУЛАЕВ, «Удмуртская правда»

Удмурт Дунне
By Удмурт Дунне 8 мая, 2018 14:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<