Сӥлы каризы интыысь аскивалтон ёзъёсты

Удмурт Дунне
By Удмурт Дунне Май 4, 2018 16:00

Культурая юртлэн фойеяз радъямын вал ёросысь предприятиослэн вузъёсынызы адӟытон.

26-тӥ апреле Уваын ортчиз Интыысь аскивалтон ёзъёслэн нуналзылы сӥзем сӥё-дано элькун ужрад. Отчы пыриськиз Удмуртилэн Тӧроез Александр Бречалов.

«Юность» культурая юр-тэ люкаськизы быдэс элькунысьтымы вань муниципал кылдытэтъёслэн ки-валтӥсьёссы. Культурая юртлэн фойеяз радъямын вал ёросысь предприятиослэн вузъёсынызы адӟытон. Удмуртилэн Тӧроез А. Бречалов котькудӥз дортӥ котыртӥськиз, тунсыкъяськиз мылкыд-малпанъёсынызы.

Интыысь аскивалтонъя ёзъёсын кивалтӥсьёслы Тӧро вазиськиз:

— Кылем арысен кутскем выль воштӥськонъёс тросэзлы секытэн сётӥсько. Куд-огез ортчемез борды кырмиськыны турттэ на: тодаз вае кылем даурысь аръёсты — со вакытъёсы умой улӥськом вал, шуо. Но со вакытъёс уз вуэ ни, выльдӥськонъёстэк азинскыны уз пӧрмы. Ужды туж секыт. Адямиос ӵемысь уг валало тае, йыркурзэс но вылады кисьто. Чидан тӥледлы! Оскисько, асьмелэн ваньмыз пӧрмоз.

А. Бречалов, Кун Кенешысь депутатъёс азьын 2017-тӥ арлы йылпумъянъёс лэсьтыкуз, матысь 2 арлы быдэстоно ужпумъёс сярысь вераз. Со ужпумъёс пуктэмын интыысь аскивалтон ёзъёс азе но: бюджетъёсты тырмытоно, отысь коньдонэз валаса но пайдаё кутоно. Озьы 4-тӥ толэзьзэ ни нимысьтыз кылдытэм группа буш кыллись муослы, буш сылӥсь юртъёслы инвентаризация ортчытэ. Соосты пайдаен кутыны амалъёс утчамын луозы.

— Та сяна, нимысьтыз саклык висъяськоз интыысь аскивалтон ёзъёслэн кивалтӥсьёссылэсь тодон-валанъёссэс будэтонлы, — ватсаз А. Бречалов, журналистъёслэн юанъёссылы валэктонъёс сётыкуз. — Муниципал кылдытэтэн кивалтӥсь туннэ юрист но, финансист-экономист но, визьнодась но луыны кулэ, солы калык азьын вераськыны, адямиосты пӧртэм проектъёсты пыӵатонэ кыскыны, азьлане учкыны быгатоно.

«Устоез муниципал кылдытэт» вожвылъяськон туэ но, котьку сямен ик, кӧня ке номинациосъя радъяськиз.

Тросэзлэн кивалтӥсьёслэн таӵе быгатонлыкъёссы вань шуыса, возьматэ «Удмуртиысь устоез муниципал кылдытэт» вожвылъяськон. Туэ апреле йылпумъянъёс лэсьтэмын интыысь аскивалтон ёзъёслэн кылем арын ужамзылы. Конкурслэн 1-тӥ этапаз пыриськиз 85 муниципал кылдытэт. Со пӧлысь 36-ез сюриз 2-тӥ этапаз. Ӵапак таос ик жюри азе потӥзы пӧртэм проектъёсынызы. Вормисьёс тодмо луизы Уваысь сӥё-дано ужрадын — дипломъёс но 170 сюрсысен 800 сюрс манетозь коньдонлы сертификатъёс басьтӥзы. Нош А. Бречалов оскытӥз: та конкурс вуоно арын уката паськыталоз: тросгес номинациос, бадӟымесьгес коньдон премиос луозы.

«Устоез муниципал кылдытэт» вожвылъяськон туэ но, котьку сямен ик, кӧня ке номинациосъя радъяськиз — муниципалитетъёсын улӥсьёслэсь лыдзэс лыдэ басьтыса. Конкурсэ проектъёс но туж пӧртэмесь вал — одӥгъёсызлэн со сӥземын ке информационной технологиосты пыӵатонлы (Дэри ёросысь Люк), мукетъёсызлэн — кивоштӥсьёсты будэтонлы (Ува ёрос), котькуд корка чагыр эстӥськон кысконлы (Сарапул ёрос), шайвылъёсты утялтонлы (Пичи Пурга ёросысь Улын Юри) но мукет.

18 сюрслэсь ӧжытгес улӥсен муниципал кылдытэтъёс пӧлын огез вормись — Вавож ёрос: 530 сюрс манетлы сертификат сётэмын ёросын улӥсьёсты транспортэн нуон-ваёнэз радъянлы.

— Уваысь автопредприятие куашкам бере ёросамы пассажир транспорт ӧвӧлэн шугъяськонъёс кылдӥзы, — вераз Вавож ёрослэн йырыз Николай Чайников. — Нимаз ужбергатӥсь куд-ог гуртъёсы автобусъёссэ келяны кутскиз — пайдаез ӧвӧл, пе. Калык пӧлын валэктон уж нуоно луиз, автобус вань дыръя таксиен медаз ворттылэ шуыса.

Али ёросысь котькуд гуртэ ик транспорт ветлэ ни, пичиосаз — арнялы одӥг пол ке но, бадӟымъёсаз — нуналлы быдэ ик. Но рейсъёсты нимаз ужбергатӥсь радъя бере, льготникъёслы, шуом, пенсионеръёслы ик, дунъёсты со уг пичияты. Ёрослэн йырыз верамъя, ӵапак конкурсын вормем уксёысь оглюкетсэ соос висъялозы тае радъянлы. Нош кылемез уксё кошкоз, пе, Вавож черкогуртэз шулдыртонлы.

Элина Кумачёва

Удмурт Дунне
By Удмурт Дунне Май 4, 2018 16:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<