Россиысь удмуртъёслэн нырысетӥ ӧтчамзы ортчем дырысен 100 ар тырмонлы сӥзем конференцие пыриськемъёслэн мылкыдзы

Удмурт Дунне
By Удмурт Дунне Май 25, 2018 08:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Россиысь удмуртъёслэн нырысетӥ ӧтчамзы ортчем дырысен 100 ар тырмонлы сӥзем конференция люказ пӧртэм адямиосты: удмурт азьветлӥсьёсты, палэнын улӥсь мыло-кыдо удмуртъёсты, кин ке но татчы, аслаз ӵыжы-выжыезлэсь сюрессэ лёгисько шуыса, вуиз. Кыӵе мылкыдын соос пыриськизы конференцилэн ужаз?

Ирина Самигулова, Башкириысь азьветлӥсь:

— Конференцие Башкириысь Татышлы но Янаул ёросъёсысь удмурт актив вуиз. Таӵе конференциос, зэм но, туж кулэ, ми ог-огмес адӟиськом, ужаммы но малпанъёсмы сярысь ог-огмылы вераськом — палэнын улӥсь удмуртъёслы со туж уг тырмы.

Башкириысь удмуртъёс нырысьсэ люкаськылӥзы вал Национально-культурной центрмы кылдэм бере гинэ, со вал 1996-тӥ арын. Кичӧлтӥсез вал Ренат Биктимирович Галямшин. Соку огазеяськизы 9 ёросъёсысь но Нефтекамск городысь удмуртъёс. Али вань ужрадъёс нуисько 2 удмурт центръёсынымы. Берло ужъёсмы пӧлысь: кылдӥз удмурт нылкышноослэн клубзы, солы сюлэм туж шумпотэ. Егитъёсын, пичиосын ужмес азьланьтӥськом, соос ке вераськизы анай кылынызы, улоз удмуртлык но. Оскисько, конференция бере ужаны эшшо но мылкыдмы ӝутӥськоз.

Раиса Корепанова, Трокай Борисовлэн ӵыжы-выжыез:

— Вордӥськемын мон Алнаш ёросысь Кизекгуртын, Трокай Борисов луэ мынам Коля песятаелэн пичи выныз. Трокайлэн агаез ямщик вал, гуртэтӥмы кошкись Екатерининской тракт кузя вань мынӥсь-ветлӥсьёс пырало вылэм соослэн корказы. Озьы купец Стахеев адӟе 8 аресъем Трокаез, пияш лыдӟиськыса пуке вылэм. Купец собере гожтэ: «Деревенский мальчик этот не по годам развит».

1918-тӥ арын 5-тӥ мае Трокай Борисов бертэ фронтысь, гуртэ ӝамдэ вуылыса, Алабгое лыктэ, татын ини сое председателе (Алабго уездлэн исполкомысьтыз Депутатъёслэн Советсылы тӧрое) быръё. Шумпотӥсько, мынам выжыям Трокай агаймы вал шуыса.

Туннэ мон Алабгоетӥ ветлӥсько, оло, Трокай Борисовлэн ветлэм сюрестӥз ик? Соин мон — бурдъяськемын.

Николай Кузнецов, писатель:

— 100 ар талэсь азьло удмуртъёслэн нырысетӥ ӧтчамзы лэсьтэмын вал автономимес кылдытон понна. Секыт уж вал со. Тодӥськомы, Сарапулысь большевикъёс воксё но пумит султӥзы талы, Москвае официальной гожтэт но гожтӥллям. Но удмурт калык бичаськыны быгатӥз, нырысетӥ ӧтчамын кутэмын вал официальной документ, кудӥз возьматӥз, удмуртъёслэн но интеллигенцизы вань, удмурт калыкез ӝутыны луэ, солы кунлык кулэ шуыса. Одӥгаз статьяяз Трокай Борисов гожтэ: нырысь ик ми пыкиськимы дышетӥсьёс но красноармеецъёс вылэ. Туспуктэм вылысь адӟиськомы: трос гинэ делегатъёс солдат картузъёсын — соос Нырысетӥ дунневыл но Граждан ожъёс пыр ортчизы, армия соосты политика ласянь кыдатӥз.

Малпасько, та конференциын нырысь ик со делегатъёсты данъяны кулэ. Асьмелы удмурт калыклэн яркыт адямиосыз сярысь материал люкано. Кылсярысь, та уже пыриськем 200 пала адямиосты шедьтоно. Ойдолэ соосты дэмен утчалом, фамилиоссы тодмо ук.

Елена Белослудцева, Кияса ёросысь Уддяди гуртысь удмурт коркаен кивалтӥсь:

— Мынам ӵужатае Мазитов Алексей Гаврилович 1918-тӥ арын Алабгое удмуртъёслэн нырысетӥ съездазы делегат сямен вуылӥз. Со киын вал отын лэсьтэм огъя туспуктэмзы но. Кызьы со съездэ сюрем? Солэн дышетскемез вал: 4 классэз быдтэмын, туж мыло-кыдо, котькытчы пыриськись адями. Колхоз кылдытонэ но пыриськемын, земельной комитетлэн тӧроез но вал, Быдӟым ож вакытэ кивалтӥз Уддядиысь но Сальялась колхозъёсын. Ачиз со ожысь комиссовать каремын вал, трахомаен висе вылэм.

Мон ачим «Удмурт Кенеш» огазеяськонлэн Кияса ёросысь правленияз пырисько. Тодӥ но, конференция луоз шуыса, мынэме, ӵужатаелэн пытьыетӥз вамыштэме потӥз.

Мария Главатских, Марий Элысь азьветлӥсь:

— Мон исторической ужрадэ вуылӥ. Мыным туж яраськиз. Лулчеберет секциын Шаркан ёросысь Быгы сярысь тодӥ, кемалась отчы коллективеным мынэме потэ вал ни. Эгра ёросысь Сэпысь бырем гуртъёслы сӥзем музейзэс но ӧй адӟы на.

Ми но проект гожтӥмы вал. Марий Элын Шолдынер гуртмы вань, отын 2 этажъем корка, азбаръёсыз но, амбаръёсыз но вашкалаысен утиськемын. Отчы Удмурт корка усьтэммы потэ, туристъёс но мед вуылозы шуыса. Куке но ветлӥмы вал Уддядие, отын сыӵе удмурт корказы! Но таяз радэ элькунамы проектмы ӧз ортчы, со интые больницамес тупатъязы. Но осконмы уг быры: культураен кивалтӥсьёсмылэн Уддядие вуылэмзы потэ, оло, собере мылкыдзы но ӝутскоз милемлы юрттӥськыны.

Мария Векшина

Удмурт Дунне
By Удмурт Дунне Май 25, 2018 08:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<