Россиысь удмурт калыклэн 1-тӥ ӧтчамез дырысен 100 ар тырмонлы сӥзем конференцилэн резолюциез

Удмурт Дунне
By Удмурт Дунне Май 25, 2018 12:23

Быдэс Россиысь удмурт калыклэн 1-тӥ ӧтчамез дырысен 100 ар тырмонлы сӥзем улоскуспо научно-практической конференцилэн

резолюциез

Елабуга кар 18-тӥ май 2018-тӥ ар.

18-тӥ мае 2018-тӥ арын Татарстан Республикалэн Казаньысь федерал университетэзлэн Елабугаысь филиалаз ортчиз быдэс Россиысь удмурт калыклэн 1-тӥ ӧтчамез дырысен 100 ар тырмонлы сӥзем научно-практической конференция (азьланяз — Конференция).

Конференцилэн радъясьёсыз: «Вань удмуртъёслэн «Удмурт Кенеш» ассоциацизы» улоскуспо общественной огазеяськон, Татарстан Республикаысь удмуртъёслэн национально-культурной автономизы.

Конференцилэн ужаз пыриськиз Россия Федерациысь 7 субъектысь 250 адями: Удмурт Республикаысь, Татарстаысь, Башкортостанысь, Марий Элысь, Пермь, Киров, Свердловск улосъёсысь. Конференцие вуэмъёс пӧлын — законъёс бордын ужась но быдэсъясь власте пырисьёс, общественной движениысь азьветлӥсьёс, тодосчиос, вузъёсысь, наукая центръёсысь специалистъёс, дышетӥсьёс, шаерчиос, культура удысын ужасьёс, журналистъёс. Конференцилэн ужаз пыриськисьёс пӧлын шӧдскымон инты басьтӥзы егитъёс, студентъёс, школаосын но гимназиосын дышетскисьёс.

Конференцилэн ужан кабъёсыз:

— пленарной заседание: удмуртъёслэн нырысетӥ ӧтчамзылэн историын интыезлы сӥзем 5 валтӥсь доклад кылзэмын; удмурт калыклэн улоназ Елабугалэн интыез, удмурт калыклэн нырысетӥ комиссарез Максим Прокопьев сярысь выль эскеронъёс; Трокай Борисовлэн но удмурт калыклэн мукет дано пиосызлэн Удмурт автономиез кылдытон бордын ужамзы; удмурт калыклэсь историяя но культурая узырлыксэ утёнъя, азинтонъя но мургес эскеронъя ужпумъёс.

— секциосын ужан: чакламын вал пӧртэм удысъёсъя ужпумъёсты эскерыны панельной дискуссия, конкурс, интеллектульной шудон, контрес ӝӧк сьӧрын кенешон пыр. Ужаз 6 секция:

1. «Егит тодосчи» — фольклоръя но шаертодонъя эскерон ужъёслы конкурс.

2. Егитъёс понна чаклам «Шудком» интеллектуальной шудон.

3. Пиналэз школае мынэмезлэсь азьло будэтон-визьман но семьяен ужан — Россиын трос пӧртэм кылъёсты азинтонын семьялэн интыез.

4. «Кыл но дышетон» — анай кылэз дышетон мылкыдэз бурдъясь выль амалъёсты утчан.

5. «Культура но туризм» — та удысъёс шоры выль синмын учкон.

6. «Власть. Общество. Граждан инициативаос» — НКО-ослэн граждан обществоез азинтонын интызы.

Секциосын эскериськизы удмуртъёслэсь историзэс но этнографизэс дышетонын кылдӥсь ужпумъёс; Россиысь пӧртэм культураос пӧлын удмурт калыклэн интыез; граждан обществоез азинтоныны НКО-ослэн интызы; дышетон заведениосын шаертодонлы, анай кыллы дышетонэз ӟечгес радъян удмурт калыклэсь кылзэ но культуразэ, историзэ дышетон мылкыд мед ӝутскоз шуыса; выль инновационной технологиосты утчан, этно- но экотуризмез азинтон.

Конференция ӵоже пленарной люкатаз но секциосын оглом кылзэмын но эскеремын 37 доклад но ивортон. Соос сӥземын Удмурт Республикалэсь историзэ, культуразэ азинтонлы, Удмурт Республикалэн кунлыкезлы, удмурт калыклэн историезлы, культуралы, сям-йылолъёслы, удмурт кунлыкез кылдытӥсьёслэн улонзылы но ужзылы. Со сяна — улосъёсын историяя-шаертодонъя, музей ужъя, дышетон учреждениосын гуманитарной дисциплинаослы дышетонын (шаертодон, география, история, удмурт кыл) кылдӥсь шуг-секытъёс, удмурт кылэз азинтонлэн инъетэз — семьяен ужан, туала обществоын НКО-ослэн интызы.

Конференцилэн валтӥсь темаез, вань докладъёс пыр векчи нюжаен потӥсь малпанэз — быдэс Россиысь удмурт калыклэн 1-тӥ ӧтчамезлэн удмурт калыклэн улоназ бадӟым инты басьтэмез. Быдэс Россиысь удмуртъёслэн 1-тӥ ӧтчамзы — историысь бадӟым событие. Со ортчиз Елабугаын 26-тӥ июне 1918-тӥ арын. Удмурт калыклэсь асваланзэ ӝутонын интыез туж бадӟым. Съезд удмурт калыкез огазеяны юрттӥз, кунысьтымы мукет калыкъёсын ӟеч кусып тупатыса улыны сюрес усьтӥз.

Съездын ӝутэм юанъёс туннэ нуналлы но тупало: удмурт кылэз утён но азинтон, анай кылын газет-журналъёс, книгаос поттон, национальной кадръёсты дасян.

Докладъёсын но ивортонъёсын верам дэмланъёсты, секциосын ӝутэм ужпумъёсты лыдэ басьтыса, конференцие пыриськисьёс:

— тау каро Удмурт Элькунысь Кун Кенешлы но Правительстволы, Татарстан, Башкортостан, Марий Эл республикаослэн, Пермь улослэн, Киров, Свердловск областьёслэн (кытын удмуртъёс тросэн уло) парламентъёссылы но правительствооссылы удмурт кыллы но культуралы саклык висъямзы понна но та удысъя азьланяз но ӵош ужаны дэмлало;

— удмурт кылэз, культураез, сям-йылолъёсты утён но азинтон сярысь мылкыдзэс верало, Россиысь вань мукет калыкъёсын тупаса улонэз юнматоно шуо;

— Россия Федерацилэн кивалтэтэзлэсь кунмылэн дуннеын кулэяськонъёсызъя, национальной кун политикая стратегиез азинтонъя, Россиын улӥсь пӧртэм калыкъёслэсь кылъёссэс но культураоссэс азинтонъя но со дыре ик астэ Россилэн гражданинэныз шӧдонъя курссэ умоен лыдъяло.

— удмурт калыклэн кулэяськонъёсызъя ужась вань удмуртъёслэн «Удмурт Кенеш» огазеяськонз кунэз но обществоез герӟан ужын бадӟым инты басьтэ шуыса лыдъяло.

Дасяз Елена Миннигараева

Удмурт Дунне
By Удмурт Дунне Май 25, 2018 12:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<