Россиез 2024-тӥ арозь азинтонъя указ юнматэмын. Мар сярысь отын вераське?

Удмурт Дунне
By Удмурт Дунне Май 8, 2018 15:56

Понедельнике президентлэн должностяз пыриз Владимир Путин. Инаугурациез ортчем бере Президент кизэ нюртӥз Россиез 2024-тӥ арозь азинтонъя указ улэ.

Владимир Путин 4-тӥзэ луиз Россилэн Президентэз.

Документ вылэ пыкиськыса, Правительство 1-тӥ октябрёзь дасяны кулэ нимысьтыз удысъёсъя нацпроектъёс. Кылсярысь, экономикаез чырмытгес азинтыны амалъёс утчано, инфляциез 4 процентлэсь вылӥе ӧвӧл лэзёно, Россиез пыртоно дуннеысь 5 бадӟым экономикаен кунъёс пӧлы.

Социальной удысын 2 поллы кулэстоно ёрмыса улӥсьёслэсь лыдзэс. Со дыре ик сюлмаськоно Россиысь калыклэсь лыдзэ йылэтыны. Шоро-куспо улон арлыдэз 2024-тӥ арын 78 аресозь вуттоно, 2030-тӥ арын — 80 аресозь. Та понна юнматоно тазалыкез утён удысэз. Кылсярысь, гуртын 100-ысен 2 сюрс адями вань ке, луыны кулэ ФАП. 100-лэсь ичи ке, татчы мобильной эмъян комплекс ысъяно. Озьы ик нимысьтыз программаос чаклано, тросгес нуныос мед вордскозы шуыса, нылпиен семьяослы коньдонэн юрттонъя радлык кылдытоно.

Дышетонлэн ӟечлыкезъя Россия дуннеысь 10 усто кунъёс пӧлы пырыны мед быгатоз. Нош дышетӥсьёс понна выль система кылдытоно — со та удысысь ичизэ 50 процентсэ ужасьёсты вырӟытоз, будыны-азинскыны чаклам конкурсъёсы пыриськытоз.

Саклык висъяно улон юртъёс ӝутонлы но — араз 120 миллион квадрат метр пуктоно. Шоро-куспо улӥсь семьяос понна ипотекая кредитъёсты 8 процентэ васькытоно.

Указын бадӟым инты басьто экологилы сӥзем ужпумъёс. Пӧлазы жуг-жаг куян интыосты радъян, Волга шурез но Байкал ты котырез сузян, бадӟым промышленностен городъёсын омырез чылкытатон.

Озьы ик Президент ӵектӥз премьер-министре кельтыны Дмитрий Медведевез. 8-тӥ мае Кун Думаысь депутатъёс кандидат понна куаразэс сётӥзы. «Огъя Россия» но ЛДПР дурбасьтэмзэс веразы Д. Медведевлы. Пумит луизы КПРФ но «Справедливая Россия» фракциос.

Дмитрий Медведев ивортӥз вице-премьере чаклам муртъёслэсь нимъёссэс. Соос пӧлын Антон Силуанов (экономикая блок), Татьяна Голикова (социальной удыс), Алексей Гордеев (гурт удыс), Дмитрий Козак (Севастополь но Крым понна кыл кутоз), Виталий Мутко (лэсьтӥськон удыс), Юрий Борисов (обороная комплекс), Ольга Голодец (спорт но культура) но Максим Акимов (транспорт но связь).

Елена Скворцова
Туспуктэм: kremlin.ru

Удмурт Дунне
By Удмурт Дунне Май 8, 2018 15:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<