Революция асваланмес ӝутӥз. Удмуртъёслэн ӧтчамъёссы — Вотской автономной областез кылдытонлы дасяськон

Удмурт Дунне
By Удмурт Дунне Май 17, 2018 12:30

1920-тӥ арын 4-тӥ шуркынмонэ Совнаркомлэн тӧроез В. Ленин но РСФСР-ысь ВЦИК-лэн тӧроез М. Калинин гожтӥськизы Вотской автономной областез кылдытон сярысь декрет улэ. Но со азьын бадӟым дасяськон уж ортчытэмын вал.

1920-тӥ арын ортчиз удмурт коммунистъёслэн 1-тӥ конференцизы.

Кутскон сётӥзы глазовъёс

20-тӥ даурлэн кутсконаз туала Удмуртилэн бадӟым люкетэз пыре вал Вятка губерние, отын улӥз 1 но ӝыны миллион пала адями, соос пӧлысь ог 60 процентэз — ӟучъёс, 27 процентэз — удмуртъёс, со сяна, бигеръёс, башкиръёс, коми-пермякъёс но мукет калыкъёс. Уноез удмуртъёс — 99,7 процентэз — крестьянъёс вал. Удмурт интеллигенция кунлыкмы понна мыло-кыдо ужаны кутскиз революция бере нырысетӥ аръёсы.

Со ужын бадӟым инты басьтӥзы удмуртъёслэн нырысетӥ ӧтчамъёссы. Россиысь удмуртъёслэн ӧтчамъёссы ортчизы 1918-тӥ но 1919-тӥ аръёсы Елабугаын но Сарапулын.

3 съездэ люкаськылӥзы Глазов уездысь удмуртъёс. Нырысетӥез ортчиз 1917-тӥ арын 13-тӥ-14-тӥ инвожое Василий Крылов священник кивалтэм улсын. Лулчеберетэз, дышетон удысэз но удмурт калыклэсь асваланзэ азинтон вылысь отын кылдытэмын вал Глазовысь культурно-просветительской огазеяськон. Озьы ик эскериськизы юанъёс Глазов уездысь начальной школаосын удмурт кылэз дышетон, асьсэ газетсэс поттон, Глазовын йӧскалык музей усьтон пумысен но кумышка пӧзьтонлэн урод палъёсыз сярысь.

Тунсыко: глазовъёслэн ӧтчамзылэн нырысетӥ нуналаз залын 100 пала адямиос пукиллям, ӵуказеяз — ог 70. Документъёсын со тазьы валэктэмын: «Крестьянъёс, ӧтчамлэн нырысетӥ нуналаз юанъёссылы валэктон шедьтыса но турнан дыр кутскемен сэрен, дыртӥзы доразы берытскыны».

Глазов уездысь удмуртъёслэн 2-тӥ ӧтчамзы 1917-тӥ арын 14-тӥ-16-тӥ пӧсьтолэзе ортчиз. Отын вераськизы Временной правительство, война, Россиысь удмуртъёслэсь ӧтчамзэс радъян пумысен.

3-тӥ ӧтчаме, 1918-тӥ арын южтолэзе, 114 делегатъёс вуылӥзы. Съездэз усьтэмзылэсь азьвыл соос Инмарлы вӧсяськизы. Ӧтчамын дурбасьтӥзы совето властьлы но кенешизы Россиысь удмуртъёслэсь съездзэс люкан пумысен. Глазовысь культурно-просветительской огазеяськонлы оскизы вань удмурт калык пӧлын вуоно ужрад сярысь валэктон уж нуыны.

Кин кинэн ӵош?

1918-тӥ арын тулыс Россиысь удмуртъёслэн 1-тӥ ӧтчамзылы дасяськон мы-нӥз, отын вань удмурт калыклэн нимыныз кутоно вал РСФСР-е пырон пумысен решение. Оштолэзе-куартолэзе вань волостьёсын сходъёс ортчылӥзы, отын ӧтчаме делегатъёс бырйиськизы.

Россиысь удмуртъёслэн 1-тӥ ӧтчамзы люкаськиз Елабугаын 1918-тӥ арын. Отчы вуизы Вятка, Уфа, Казань, Пермь губерниослэн 9 уездъёсысьтызы 78 делегатъёс. Тросэз вал крестьянъёс но дышетӥсьёс, но озьы ик пӧлазы шедиллям черкын ужасьёс но азьвыл офицеръёс. Ӧтчамысен тӧрое быръемын вал Максим Прокопьев — азьветлӥсь, дышетӥсь, кылбурчи.

Удмуртъёс азьланяз асьсэды кытын адӟо вал? Съездын кӧня ке ӵектонъёс чузъяськизы, кылсярысь, ӟучъёсын, чувашъёсын но бигеръёсын валче урал федерация, удмурт штат, удмурт губерния кылдытоно. Озьы ик дэмлазы Прикамской губерния лэсьтыны, шоркаре Сарапулэз бырйыны. Озьы унозэ удмуртъёсыз огазеяны луысал.

Со сяна, эскеремын вал Наркомнац бордын вотякъёслэн ужъёссыя комиссариат кылдытон сярысь, дышетон, эмъян но лулчеберет удысъёсты азинтон пумысен юанъёс.

Автономиез кылдытон бордын ужез уретӥз Граждан ож. М. Прокопьев, ачиз куриськыса, фронтэ кошкиз но бырыны шедиз. Удмуртиез киултӥзы тӧдьыос. Соослэсь мозмытскем бере гинэ «удмурт» юан выльысь ӝутэмын вал.

1919-тӥ арын куарусёнэ Сарапулын удмуртъёслэн 2-тӥ рабоче-крестьянской ӧтчамзы ортчиз. Отчы вуылӥзы Вятка, Казань, Уфа, Пермь но Самара губерниосысь 102 делегатъёс. Съездын Граждан ож вакытэ куашкатэм гурт хозяйствоез ӝутон пумысен вераськон мынӥз, ӝутӥськиз удмуртъёсты огазеян сярысь юан. Кутэмын вал решение Наркомнаце вазиськыны, Сарапулын Удмурт комиссариат усьтыны курыса. Сыӵе постановление Наркомнацлэн коллегиез 1918-тӥ арын 28-тӥ коньывуонэ поттӥз. Комиссариатэн кивалтыны оскизы Иосиф Алексеевич Наговицынлы — революционерлы, удмурт азьветлӥсьлы.

Автономиез кылдытонъя ужпумъёс озьы ик эскериськизы удмурт коммунистъёслэн 1-тӥ всероссийской конференциязы, со ортчиз Сарапулын 1920-тӥ арын 6-тӥ-11-тӥ инвожое. Кӧняез ке делегатъёс мылкыдзэс шараязы, ӝегатскытэк Удмурт автономия кылдытоно шуыса, мукетъёсыз шуизы: сыӵе решение кутыны вазь на. Вотякъёслэн ужъёссыя Центральной комиссариатлэн кивалтӥсезлэн И. Наговицынлэн докладэзъя РКП(б)-лэн Центральной Комитетэз но Наркомнац огкылэ вуизы, административно-территориальной автономия кылдытыны шонер луоз шуыса. Озьы Прикамской губерния пумысен малпан палэнтэмын вал. Лыдъязы, удмурт калык понна автономной область ик кылдытоно шуыса.

1920-тӥ арын 4-тӥ шуркынмонэ РСФСР-ысь ВЦИК-лэн но СНК-лэн Вотской автономной область кылдытон сярысь постановленизы кутэмын вал.

Н. Василечко,
Шор кун архивлэн директорез.

Материал басьтэмын «Архивы Удмуртии» сайтысь: http://gasur.ru/activity/publications/pub_arh/2005/cga0505.php

Удмурт Дунне
By Удмурт Дунне Май 17, 2018 12:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<