Муниципал кылдытэтъёслы малпанъёссэс улонэ пыӵатон вылысь уксё висъямын

Удмурт Дунне
By Удмурт Дунне Май 10, 2018 14:27

Алигес Удмуртилэн Тӧроез Александр Бречалов сӥлы кариз устооссэ муниципал кылдытэтъёсты. Проектъёссэс улонэ пыӵатон вылысь люкылӥз коньдон сертификатъёс. Калыклэсь улон-вылонзэ ӟечгес карон сярысь сюлмаськисьёс, выль сямен ужаны дась луисьёс пӧлын ӧжыт ӧвӧл гурт поселениос но.

Шутэтскон азбар

Пичи Пурга ёросысь Улӥ Посьтол муниципал кылдытэтлэсь кивалтӥсьсэ Ф. Верёвкинэз ӟечкылаз Удмуртилэн Тӧроез А. Бречалов.

Пичи Пурга ёросысь Улӥ Посьтол муниципал кылдытэт, 1 сюрслэсь ӧжыт улӥсьёсын поселениос пӧлын устоосыз пӧлы шедьыса, «Шутэтскон азбар» проектэзлы 170 сюрс манетлы сертификат басьтӥз.

 Таза улон — нырысетӥ интыын

"Новый путь"

Дэбес ёросысь зар-медлоослэн вань ини куасэн нискыланы югдытэм трассазы. Но сое кузьгес каремзы потӥз.

— Туэ ар пумозь малпанмы быдэсмыны кулэ, — вераз гурт поселенилэн кивалтӥсез Сергей Косарев. — Проектмылы элькун 400 сюрс манет висъяз. Малпаськом, со тырмыны кулэ.

400 сюрс манет пӧлысь оглюкетэз, пе, кошкоз снегоход басьтыны. Лымыяку-пелляськыку куас сюрес угось согиське — сое волятыны кулэ. Нош снегоход бервылтӥ коньковой ходэн но нискыланы луоз ни — та амаллы уката но нылпиослэн дышетскемзы туж потэ.

Уг тырмы сюрес гинэ

Пичи Пурга ёросысь улын юриослэн малпанъёссы трос — нылпи площадка но кулэ, музей но радъяно… Но соос нырысь ик утялтоно кариськизы ватӥськон интызэс.

Улын Юриын шайвыл кылдэм 1921-тӥ — 1922-тӥ аръёсы. Пересьёслэн тодэ ваёнъёссыя, соку сютэм аръёсы валъёс ӧз сюрылэ ни, соин ик улонысь кошкемъёсты ватыны кыдёке нуллэмысь дугдӥзы, шайвыл лэсьтӥзы гуртсы борды ик. — Со нюлэскын интыяськемын, — шуэ поселенилэн кивалтӥсез Борис Николаев. — Соин ик отын трос вал ини куасьмем писпуос. Соосты гурт калыкен корам-утялтӥм. Коръёслэсь пичияк корка пуктӥм. Отын кортгурез но, ӝӧкез но вань — кезьыт куазен шунтӥськыны, ял карыны луэ…

Учаысь баӵкоез ӧтьыса, шайвылзэс, корказэс осветить кариллям. Эшшо ке шайвылазы пичияк синпелет пуктӥллям — шайвылысь тросэз киросъёс пулэсь гинэ лэсьтылэмын вал ай, соос сисьмылэмын ни. Синпелет, пе, соосты мед воштоз.

— Шайвыламы оже ветлэм 50-лэсь ятыр ветеранъёс но ватэмын, — ватсаз Борис Семёнович. — Соослэн памятникъёссы бордын юнматэмын горд кизилиос. Эшшо нимъёсынызы пул юнматэмын шайвылысь коркамы бордын но. Вань малпанмы: кизили юнматылоно ветеранъёслэн улэм юртъёссы борды но — тае матысь аръёсы лэсьтыны быгатом, оло.

Гурт поселенилэн ки-валтӥсез верамъя, гуртоос туж мыло-кыдоесь. Улын Юрилэн старостаез ик Яков Петров поселенилэн кивалтӥсезлэн оскымон юрттӥсез луэ. Озьы шайвылзэс огъя кужымен утялтӥзы. Оглом ог 200 сюрс манет талы кошкиз. Со люкаськиз спонсоръёслэсь но, нимаз адямиос юрттӥськыны пумит ӧз кариське: кин техниказэ, кин бензопилазэ висъяз. Кылиз на одӥг сюлмаськонзы: шайвылозь сюрес туж урод. Но табере таиз но малпанзы быдэсмыны кулэ — проектсы понна элькун бюджетысь 300 сюрс манет басьтозы.

Элина Кумачёва

Удмурт Дунне
By Удмурт Дунне Май 10, 2018 14:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<