Можгаысь арлыдо кузпалъёс патеразы 1,5 тонна жуг-жаг люкаллям

Удмурт Дунне
By Удмурт Дунне Май 14, 2018 16:02

Нимысьтыз верано созэ но: пересьёс нимаз юртъер уг возё, улон интызы — трос квартираем коркан.

Можгаысь арлыдо кузпалъёс патеразы 1,5 тонна жуг-жаг люкаллям.

Пенсионеръёс туж сюлмаськиллям ваньбурзэс йылэтыны. Мар гинэ уг шедьы ки улазы: куштэм посуда, дӥськут, пластик но пу арбериос, писэй шӧйёс — ваньзэ квартираязы нуллӥзы. Озьы 2 висъетэн патерзы куркуян интылэсь ӧз ни висъяськы. Жаляса верано, кузпалъёслэн йырзы сураськемын, улонлэсь кудпала бергамзэ уг ни валало. Песятайлы 73 арес, песянай 80-аз мынэ. Вылаз ик, та кенак лулсэр висёнъёсъя больницаын учётын сылэ.

Соин валче бадӟым шуге-леке вуизы та коркан улӥсь бускельёссы. Уго пересьёслэн «ваньбурзы» квартираязы ӧз ни тэры, ӧс азязы но люкаськиз. Но уката улонэз быдтӥзы шыр-комакъёс но таракан-урбоос.

Та курадӟон кыстӥськиз 2015-тӥ арысен. Кытчы но ӧз йыгаське шуге-леке вуэм бускельёс — 1 этажъем баракын 11 квартира. Ярам, Роспотребнадзорлэн вазиськонэзъя суд ортчиз. Собере пересьёсты косӥзы улон интызэс сузяны. Но та ужез соос, валамон ни, быдэстыны ӧз дыртэ. Жуг-жаг гурезез люканы гинэ капчи, нош утялтоно ке… Мукет ласянь, котькуд арбери та пересьёс понна зарни чот.

Нокыӵе но ӧз поты пересьёслы штраф тырытон сярысь решение. Судлэсь куронзэ быдэстымтэзы понна нырысь пенсиысьтызы 1 сюрс манетсэс кельтӥзы, собере — 2 сюрс манетсэс, вера Можгаысь судъя пристав Лариса Казакова.

Соин ик судлэсь решенизэ быдэстон борды приставъёс чырмытгес басьтӥськизы. Квартираез сузяны лыктӥзы городысь волонтёръёс.

— Кылын вераны уг луы, адӟыны кулэ та квартираез, — чабкиське Лариса Юрьевна. — Ужмы 2 нуналлы тырмиз. Шоканы уг луы — жуг-жаг пӧлын ик кулэм писэй но комак шӧйёс, кӧня тараканъёс но кутъёс! Ваньмы ымнырамы респираторъёсын ужамы — ма, коть противогаз дӥся!

Патерысь жуг-жагез азбаре люказы. Но пересьёс ваньбурзэс тазьы капчияк гинэ сётыны ӧз малпалэ. Чакласьёс кошкем бере песятай самой дуно арбериоссэ нош ик патераз пыртаны кутскиз. Мукет нуналаз волонтёръёс выльысь со жагез кыре поттазы. Ярам, Можгалэн администрациез транспорт висъяз — жаг люкаськиз трактор уробо тыр.

Зэм, та учырлэн пумыз ӧвӧл на. Пересьёсты огназэсты кельтыны кышкыт. Соин судъя приставъёс вазиськизы Роспотребнадзоре, квартираын дезинсекция ортчытыны курыса. Та учырын арлыдо муртъёсты чаклась-утялтӥсьёс но кулэ — опека радъян понна гожтэт келямын калыкез улон-вылонын утёнъя службае. Бен, Можгаысь соцзащитая отдел уг вырӟы: опека лэсьтон понна пересьёсты недееспособной лыдъяно, собере кытчы ке улыны интыяно. Нош песянаен песятай табере интылы уг ёрмо — квартиразы буш, коть туннэ ик матысь мульдаысь «ваньбур» пырта.

Юбер кышно
Туспуктэм: Удмуртиысь УФССП-лэн пресс-службаез

Удмурт Дунне
By Удмурт Дунне Май 14, 2018 16:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<