Можга но Кизнер ёросъёсысь ог 200 коркаос ву улэ сюризы

Можга но Кизнер ёросъёсысь улон коркаосы ву пыриз

Можга но Кизнер ёросъёсын туннэ нуналлы, 1-тӥ майлы, тудву ӝутскемен шукрес югдур кылдэмын.

Та сярысь журналистъёслы ивортӥз Правительстволэн Тӧроез Ярослав Семенов. Вазь ӵукна гинэ со берытскиз лымшор ёросъёсысь. Кизнерын кыриськыны кутскиз тымет. Пеймыт уй шоры учкытэк, отчы кӧня ке бадӟым машинаосын кӧльы-изъёс ваемын вал. Ву пыриз 150 пала улон юртъёсы. Отын улӥсь ог 300 муртлы огдырлы мукет улон инты ӵектэмын. Но соос доразы ик кылёно кариськизы. Коркаос дорын югдурез чакласа возё МЧС-ын ужасьёс. Нуназе бере ву кошкыны кутскиз ни.

— Можгалан ву калленгес кошке, — вераз Ярослав Семенов. — Ву улэ кылемын ог 45 корка. Отын улӥсьёс но доразы ик улыны мылкыд каризы.

Шукрес югдур матысь нуналъёсы кылдыны быгатоз уйпал ёросъёсын но. Кылсярысь, Эграла ёросысь шуръёс туннэ ӧрысьтызы потыны кутскизы. Городъёслэн но ёросъёслэн йыръёссылы куремын: котькуд 2 часлы быдэ тудву ӧръяськем сярысь ивортоно.

Элина Кумачёва

Туспуктэм басьтэмын Удмуртиысь МЧС-лэн сайтысьтыз