Кыӵе инты басьто вузъёс Удмуртиез азинтонын?

Удмурт Дунне
By Удмурт Дунне Май 29, 2018 14:00

Мар кароно соосты юнматон понна? Та юанъёслы валэктон утчазы Кун Кенешын калык кылзонъёс дыръя.

istu.ru

Удмуртиысь экономикаез азинтон понна трос лэсьто ИжГТУ-ын дышетскемъёс.

Туннэ валаны кулэ, кыӵе удысъёслы кӧня специалистъёс кулэ. Вузъёс куспын вожвылъяськон гинэ медам луы — валче ужаны мед быгатозы, ог-огзылэсь ляб но зол интыоссэс мед адӟозы, котькудӥз ас удыссэ валаса мед нуоз, шуэ Кун Кенешысь ялан ужась комиссиен кивалтӥсь Татьяна Ишматова.

— Асьмелы кадръёс дасян сярысь гинэ сюлмаськоно ӧвӧл. Ваньзэ лэсьтоно, выпускникъёс заводъёсмылы но кулэ мед луозы шуыса, — вера Кун Кенешлэн Тӧроез Алексей Прасолов. — Кылсярысь, 1974-тӥ арозь шаерамы ӧй вал лэсьтӥськисьёс. Соин валче Удмуртие палэнысь специалистъёсты вуттылӥзы. Собере гинэ ИжГТУ-ын нимысьтыз факультет усьтэмын вал. Туннэ обороная заводъёс меӵак ужало вузъёсын, 2-тӥ курсысен устооссэ синйылто. Вань удысъёсты тазьы огазеяны тыршоно, — шуиз Алексей Прасолов.

Удмурт кун университетлэн ректорез Галина Мерзлякова верамъя, вуз туннэ дась пичи ужбергатонлы специалистъёсты дасян борды басьтӥськыны. Со понна заводъёсын валче кариськоно, предприятиосын кусып тупатоно, кластеръёс кылдытоно. Шаермес азьланяз эшшо но азинтон понна проектъёс дэмен лэсьтоно, инвесторъёс утчано. Та ласянь Правительство но, Кун Кенеш но палэнэ кыльыны кулэ ӧвӧл, шуэ Галина Мерзлякова.

Кадръёс дасямы, соослы уж ӵектӥмы ке, специалистъёс шаерамы ик кылёзы, шуиз Алексей Прасолов. Та бордын ик ужан сярысь нимысьтыз резолюция кутэмын.

Кун Кенеш устооссэ студентъёсты арлы быдэ пусйылэ. Кылсярысь, туэ 20 егит муртлы премия тыре. Студентъёслы луонлык кылдытэмын кун учреждениосын практиказэс ортчыны. Палэнэ уг кылё министерствоос но. Кылсярысь, Информатизацияя но связья министерство 2 ар талэсь азьло IT-кадръёсты дасян борды басьтӥськиз. Программаос ялан вошъясько, олокыӵе но технологиос улонэ пото бере, шаерысьтымы 43 школаосын математикалы но физикалы мургес дышето. Таос пӧлысь 29-эз школаос — Ижын. Оглом 7-тӥ-11-тӥ классын дышетскись 1 сюрс 779 пиналлэсь тодон-валанзэс муромыто. Министрлэн воштӥсез Михаил Фоминов верамъя, туэ сыӵе программая дышетскись нырысетӥ пиналъёс школаез йылпумъялозы. Ваньзы соос вузъёсы мынозы. Программированиея УдГУ-ын но ИжГТУ-ын кафедраос усьтэмын. Но та ужез паськытатыны чаклало. Туала технологиосъя ужась компаниослы угось сыӵе специалистъёс нуналысь нуналэ тросгес кулэ луозы. Али 90 студент бакалавриатын дышетске, шуэ Михаил Фоминов.

Глазовысь пединститут дышетӥсьёсты, воспитательёсты, национальной кадръёсты дасяны выре ке, ИжГТУ обороная заводъёслы кулэ луись студентъёсты поттэ. Татысь студентъёс но дышетӥсьёс меӵак ужало «Аксион-холдинг» заводэн, Воткаысь заводэн, Сарапулысь электрогенераторной заводэн. Та вузлэн базаез но узыр: аслаз спортъя комплексэз, больницаез, нылпи садэз, куасэн бызьылон интыез но мукет объектъёсыз вань. Азьланяз обороналы ужась заводъёсты улон-вылонын кутӥськись продукция поттон борды но мыло-кыдогес басьтӥськыны косэмын. Но та ласянь программаос но разработка лэсьтӥсьёс уг тырмо. Соин ик Сарапулысь электрогенераторной заводэн кивалтӥсь Александр Заварзин вазиськиз валче ужан пумысен. Кылсярысь, электрокаръёс лэсьтонъя проект вань. Солы 92 миллиард манет висъяны чакламын.

Кадръёс дасямы, соослы уж ӵектӥмы ке, специалистъёс шаерамы ик кылёзы, шуиз Алексей Прасолов. Та бордын ик ужан сярысь нимысьтыз резолюция кутэмын.

Елена Сараматова
Туспуктэм: istu.ru, udmgossovet.ru

Удмурт Дунне
By Удмурт Дунне Май 29, 2018 14:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<