Илон Масклы Музъем вылын ӟоскыт

Удмурт Дунне
By Удмурт Дунне Май 15, 2018 14:30

Куке но кемалась адямиос улон-вылонын кулэ луись арбериоссэс лэсьто вал излэсь, собере усьтӥзы кортэз. Али адями кутэ ни мукет, трослы умойгес, материалъёсты.

Кортэз но тани пластмасса воштэ ни. Со капчигес, дунтэмгес, солэсь ӝогак пӧрмытыны луэ пӧртэм вылтус. Но «мувӧй даур» но озьы ик чаляк ортчоз. Али машинаосты ичи бензин сиись карыны туртто ни, инкуазез утьыны тыршо, моторъёс, ӧжыт бензин сиыса, омыре кырсез ӧжытгес мед поттозы шуыса. Та сюресэз али лёгэ инженер, изобретатель Илон Маск.

Илон Маск вордӥськиз ЮАР-ысь Претория карын. Али солы 46 арес. Улэ Америкаын, татын ик ужа туж тунсыко проектъёс бордын. Илон уг возьма кинлэсь ке мар ке выльзэ малпамзэ, со кутэ но ваньзэ лэсьтэ ачиз. Ваньмыз, мар кылдыто солэн компаниосыз, Илон пыр потэ. Со быдэс дуннеысь калыкез азьлань валтэ. Солэн потэ вал Интернет пыр уксёен кивалтэмез — кылдытӥз PayPal компания. Со юрттэ Интернет пыр басьяськыны, ог-огедлы уксё лэзьяны. Солэн потӥз ворттылэмез омырез кырсёмытӥсьтэм машинаосын — кылдытӥз Tesla компания. Татын кутскизы лэсьтыны электричество вылын ужась моторъёсын машинаосты. Илонлы акыльтӥзы пробкаос, талы пумит нюръяськон понна усьтӥз тоннельёс гудылӥсь The Boring Company.

Одӥг вакытэ Илонлы ӟоскыт луиз Музъем вылын — малпаськыны кутскиз SpaceX компания кылдытон пумысен. Со ӧдъяз лэсьтыны ракетаос, куке но азьланяз Марсэ но лобано шуыса. Али та частной компания ракетаоссэ космосэ Россимылэсь (кытын куке но улӥзы Юрий Гагарин, Белка но Стрелка, кытын лэсьтэмын вал Музъемлэн нырысетӥ искусственной спутникез!) ӵемгес лэзья. SpaceX компания кемалась ик ӧвӧл космосэ лэзиз тужгес секыт ракетазэ. Сое кылдытыкузы, Илон вазиськиз НАСА-лы но космосэн герӟаськем мукет компаниослы, юрттэтсэ дэмласа: кулэ ӧвӧл-а соослы марзэс ке но космосэ тубтыны. Воргоронлы нокин ӧз оскы. Соин ик Илонлэн тужгес бадӟым ракетаез космосэ ӝутӥз аслэсьтыз ик кылдытэм Tesla Rodster машиназэ. Табере та машина кытын ке Шунды системаямы лоба ни. Со вылын гожтэмын: «Лэсьтэмын Музъем вылысь адямиосын».

Машинаез тубытӥсь ракета бичамын вал 3 люкетлэсь. 2 люкетэз берен Музъеме берытскиз но шонерак пуксиз чаклам интые. Табере соос дась на эшшо кӧня ке пол космосэ лобаны. Таӵе ракета кылдытыны асьме страналы эшшо кӧня ке аръёс кулэ на, огшоры ракетаен ӵошатыса, уксё но солы ог 10 поллы тросгес кошке. Али SpaceX лэзья космосэ пичи спутникъёссэ, кудъёсыз матысь дыре кутскозы ысъяны Музъем вылэ шаплы но дунтэм интернет. Со вуоз сыӵе но интыосы, кытын телефон уг куты.

«Железный человек» киноысь Тони Старк герой сярысь кылӥды ни-а? Со, пе, Илон Маскъя кылдытэмын.

Мон туж шумпотӥсько, Илонэн одӥг вакытэ улӥсько шуыса. Куке пӧртэм странаос куспазы керето, таӵе адямиос быдэс дуннеез азьлань кыско, соослы кулэ ӧвӧл уксё, шулдыръяськонъёс. Мон малпамъя, аслад ужъёсыныд таӵе адямиос дорозь кыстӥськыны кулэ.

Евгений Александров

Удмурт Дунне
By Удмурт Дунне Май 15, 2018 14:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<