Ас гидазы пудо вордӥсьёслы юрттэт висъяськоз

Удмурт Дунне
By Удмурт Дунне Май 29, 2018 10:18

Кун Кенешлэн Тӧроезлэн воштӥсез В. Невоструев: азбаразы пудо вордӥсьёслы юрттэт луоз.

Та сярысь вераз Кун Кенешлэн Тӧроезлэн нырысетӥ воштӥсез Владимир Невоструев.

Азьвыл Удмуртия США-е, Европае вузалля вал казеин — йӧллэсь лэсьтэм сурет. Малы та удысэз азинтонтэм? Со сяна, сӥль, йӧл, курегпуз но мукет продукциез вӧлмытонъя программа дасяло Кун Кенешын. Зэм, али йӧл дун усемен, хозяйствоос ыштон адӟо. Соин ик гурт удыслы бюджетысь трос коньдон висъяське. Туэ солэн быдӟалаез 3 миллиард манет котыр. Йӧл кыскон удысэз ӝутон вылысь 300 миллион манет субсидия висъямын.

— Нуналмысь ужано переработчикъёсын, — шуэ Владимир Невоструев. — Туж тросэз уго потэ заводъёс бордысь. Пермь улосысь Нытваысь йӧл завод шаерысьтымы 1 литр йӧлэз 22-24 манетэн басьтэ, нош асьме заводъёс со йӧлэз ик 18 манетэн дунъяло. Кинлы кӧня барыш кыле лыдъяны дыр вуэмын. Со бордысь ик потоз, кӧняен заводъёс хозяйствоослэсь йӧлзэс басьтозы. Сое огкылъёсын юнматоно.

Гурт удысъя но сиён-юонъя министерство ляб хозяйствоосты юнъёсыныз огазеяны медэ, озьы, пе, кылдэм югдурысь потыны быгатомы.

— Сиён-юон бордын гинэ ужпум ӧвӧл — калыкез утёно, — шуэ Владимир Петрович. Соин ик котькуд гуртын луыны кулэ ферма, отын уждунэз ичигес, ужазинлыксы кулэсгес ке но. Хозяйствоосты кужмысь огазеяны уг яра. Огзэ фермаез бушатыса, пудоез мукет азе поттӥм ке, со пудоен ӵош ик калык но кошкоз, но воксё мукет азе — райцентре я городэ.

Гуртъёсты утён вылысь ик Кун Кенешын ӧдъяло личной подсобной хозяйство возисьёслы юрттэт сётыны. Туннэ скал, парсь вордӥсьёс нуналмысь кулэсмо. Азбарын курег но ӟазег сяна ӧвӧл ни. Со умой ӧвӧл, дыр. Владимир Невоструев верамъя, ас вакытаз гуртоослэсь сӥльзэс но, йӧлзэс но кун басьялляз, трос скал вордӥсь частникъёслы субсидия тырылӥз. Выльысь та борды берытскыны дыр вуэмын. Кин тодэ, оло, выт тыронъя льготаос но пудо вордӥсьёслы кутыны кулэ, пусъе Владимир Петрович. Соку гинэ гурт выль сямен улӟоз, гидъёс пудоен пачылалозы, калык кошкемысь дугдоз. Чакламын гуртъёсысь сюресъёсты тупатыны, газ кыскыны. Кун Кенешлэн бурд улаз ужась Егитъёслэн парламентсы ӵектонэн потӥз вал: анай капиталэз газ пыртыны кутыны мед лэзёзы шуыса. Та ӵектонэз Кун Кенешысь депутатъёс умоен лыдъязы. Табере соин Кун Думае вазиськыны медо.

Елена Сараматова
Туспуктэм: udmgossovet.ru

Удмурт Дунне
By Удмурт Дунне Май 29, 2018 10:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<