Алнаш ёросысь «Ошмес син» литогазеяськонэ ветлӥсь пиналъёслэн «Усьтӥськись пучыос» книгазы потӥз

Удмурт Дунне
By Удмурт Дунне Май 11, 2018 17:30

Алнаш ёросысь «Ошмес син» литогазеяськонэ ветлӥсь пиналъёслэн «Усьтӥськись пучыос» книгазы потӥз. Отчы пыризы 26 гожъяськисьёслэн кылбуръёссы, веросъёссы, выжыкылъёссы. Книгаез поттыны юрттӥз Кун Кенешысь депутат, «Удмурт Кенеш» огазеяськонлэн тӧроез Татьяна Ишматова. 

«Усьтӥськись пучыос» бичетэз лисъяса, пумитано пӧртэм нимъёсты: Мария Васильева, Полина Куликова, Анна Шарыпова, Ольга Камашева, Анна Бурдина… Тросэз таос пӧлысь али студентъёс ни, куд-огез векчи книгаоссэ но поттӥз ни. Нош литературае сюрессэс соос мытӥзы «Ошмес син» литогазеяськонын. Солэсь ужзэ 5 арзэ ни радъя Ашальчи Окилэн музей-юртысьтыз Мария Петрова.

— Литогазеяськонэ 3 толэзьлы огпол люкаськы-лӥськом, — вера Мария Петрова. — Татчы тужгес но трос ветло Тыло, Ӟатча, Усо, Азамат, Вуж Шудья, Байтэрек, Улын Котныр, Туймыл, Выль Утчан, Удмурт Гондыр школаосын дышетскисьёс. Ог 25 мында пиналъёс дышетӥсьёсынызы ӵош вуо. Огазеяськонамы Ижысь кылбурчиосты, писательёсты, журналистъёсты ӧт-чалляськом. Соос дышетскисьёслы мастер-классъёс ортчытъяло, творчествоенызы тодмато. Пиналъёслы та пумиськонъёс туж кельшо, гожъяськон мылкыдзы уката пуроме.

Бичетэз поттыны юрт-тӥз кылбурчи Лидия Нянькина, со редактор чотын вал.

— Пинал авторъёс пӧртэм темаос борды басьтӥсько. Бадӟымгес классын дышетскисьёс улон шоры философлэн синмыныз учкыны тыршо ини, покчиосызгес чуръёссэс анайзылы, песянайзылы, вын-сузэръёссылы, ньыль пыдо эшъёссылы, спортлы, инкуазьлэн пӧртэм вакытъёсызлы сӥзё. Котькудӥз пуш дуннезэ ачиз сямен усьтыны тырше, — книга пумысен гожтэ Лидия Нянькина.

Мария Иванова

Алнашысь «Ошмес син» литобъединение ветлӥсь пиналъёслэн чуръёссы (кивалтӥсьсы М. Петрова)

Нянь колды. Выжыкыл

Карина Кочанова. Чем-Куюк

Ӝужыт тӧдьы коркан улӥллям но вылӥллям одӥг кузпалъёс. Исьток ужбергатӥсь вылэм, нош кышноез, Насьток, нокытын ужамтэ.

Огпол Исьток Насьтоксэ нянь колды пыжыны курем: лавкаысез акыльтӥз ни, пе. Соиз интыяз пумем кадь луэм: ноку нянь пыжемез вылымтэ угось, озьы ке но шуэм:

— Я, али ик уж борды кутско!

Кытысь ке сиён пӧзьтонъёсын валэктон книга шедьтэм. Ярам коть, отын нянь пыжон сярысь но гожъямын вылэм.

Тани Насьток нянь колдызэ пыжем. Кузпалыз, колдыез газ плиталэн духовкаысьтыз поттыса, вентилятор доры сӥятыны пуктэм. Укно усьтэмын вылэм. Нянь Колды вентиляторлэсь кынмыны кутскем но пась укноетӥ вож гуждор вылэ тэтчем, собере асфальт вылэ питырскем.

Ваньмыз солы тумошо, пе: машинаос но, маке ӝужда коркаос но, кытчы ке дыртӥсь адямиос но… Тани Нянь Колды пиосмуртэз синйылтэм. Солэн пал кияз гозы кутэмын, гозылэн огпал пумыз пунылэн чыртыяз думылэмын, пе.

Нянь Колдыез синйылтыса, пурысь гоно пуны шуэм:

— О, ням-ням! Кыӵе сием потэ вал ни… — аслаз дыльдыез шы-ыр-р! гинэ вия, пе.

Нянь Колды, пунылы кылзэ возьматыса, пегӟем. Таиз сьӧраз ыргетыса уйиськыны турттэ вылэм но, кузёез сое нокытчы лэзьымтэ, вылаз ик, тышкаськем на.

Тазьы ветлыкуз, Нянь Колды мукет пуныен пумиськем: таиз но, азьлоез кадь ик, пурысь гоно, йылсо пелё, таиз но кузёез сьӧры гозы йылын ветлэ, пе.

Нянь Колды пуныез исаны кутскем.

— Тани пуро! — вожез потэм пунылэн.

Солэн кылъёсызлэсь Нянь Колды чик кышкамтэ, но марысь-мар — палэнтӥськем. Со куспын синъёсыз огназ калтыртӥсь пуны вылэ усиллям. Начар, кузь чыртыё, сьӧд синмо, нош мугорыз кузь гонэн шобырскемын, пе.

— Ӟечбур, — Нянь Колдыен ӟечъяськем пуны.

— ӟечбур… — кышкаменыз сэрен Нянь Колдылэн кылыз ик быгыльмем кадь луэм. Пуны Нянь Колдылэсь курдамзэ валам но сое ӝоггес буйгатэм:

— Эн кышка, мон тыныд алама уг кары. Мынам нимы Лусьтро, нош тынад?

— Нянь Колды! Лусьтро, нош малы тынад кузёед ӧвӧл? Ышид-а, мар-а? — шаплыгес кариськем со.

— Мынам кузёе вань, но со йӧнтэм. Янгышен но тусьтыям сиён уз поны. Нискетыны кутскисько ке, соку ик жуге. Ӧй чида — пегӟи, — Лусьтролэн синкылиосыз асфальт вылэ шапыр гинэ усьылыны кутскиллям.

— Я, я, Лусьтро, эн куректы. Шумпоты, сыӵе изьверлэсь пегӟид шуыса. Азьланяз со тонэ, оло, виысал но ай, — эшсэ буйгатэм Нянь Колды.

— Я, тырмоз мон сярысь. Нош тон кытысь? — буйгамез бере тунсыкъяськем Лусьтро.

Нянь Колды солы ваньзэ лад-лад радызъя верам.

Тӥни озьы Нянь Колды но Лусьтро матысь эшъёс луиллям. Нош Исьток но Насьток, нянь пыжо ке, табере укнооссэс котьку ворсало, пе.

 

Бака

Марина Кузьмина. Туймыйыл

Шур кузя мон ветлӥсько,

Тулкымъёссэ лыдъясько.

Ярдурын пуке бака,

Вазьылэ мыным:

«Ква! Ква!»

Шудэмез, дыр, туж потэ,

Куное, луоз, ӧте.

Шудысал мон, бакае,

Но возьма, дыр, анае.

Тон вуын ук улӥськод,

Шур пыдсытӥ уяськод.

Шудысал мон, бакае,

Но уг лу на уяме.

Помидор

Бакча шорын помидор —

Горд бамо бадӟым Педор.

Кызьы со сыӵе будэм?

Шундыен, дыр, эшъяськем.

Пыласькиз, дыр, зор улын,

Вераськиз музъем кылын.

Ма, соин, дыр, удалтэм,

Инкуазь сое яратэм.

Буд на, буд на, помидор —

Зӧк кӧто бадӟым Педор.

Анастасия Фомина. ӟатча

Вӧлак усьтэм ыбесъёссэ

Сюлэмылэсь ворсай.

Ӟукыр вазись ӟирыоссэ

Кылъёсыныд вӧяй.

Лулы жадиз пӧямедлэсь,

Льӧль пияла тэшказ.

Кезьыт учкись синъёсыдлэсь

Сюлмы мынам кынмаз.

Шуныт малпанъёсын гинэ

Гурме эстылӥсько.

Сюлэм пушкам улон пӧзе,

Юнме йыгаськиськод.

Уг усьты, уг тыныд ӧсме —

Ӧвӧл ни интыез.

Улон пӧзе но быректэ,

Нош тон отын — мултэс.

* * *

Сюрес урдсын сылэ писпу

Огназ.

Пушкыз сисьмем ни.

Кемалась —

Лултэм.

Ӧвӧл уго лӥятӥсез

Вӧзаз.

Вӧсез уг шӧд ни мугорыз —

Кулэм.

Кырӟа на тӧл веттан

гурзэ

Шыпыт.

Лымы биня тӧдьы бӧзэн,

Ватэ.

Зорлэн синвуосыз укыр

Курыт.

Толэзь гинэ ялан оске,

Оске.

Ватэм кужым

Марина Христофорова. Усо

Куке но дугдоз зоремысь,

Шумпото — пото эктыны.

Тон утча монэ котькытысь,

Я туртты монэ шедьтыны.

Кошко, тапырто палэнын —

О, кыӵе эркын улонэ!

Пегӟо сяськаё интые,

Тани со — ыштэм узьмаге!

Куке но дугдоз зоремысь,

Адскоз инбамын вуюись.

Музъемын луоз югытак —

Уродэз кошкоз сюлэмысь.

Одно ик потоз ай шунды,

Шунтоз ӵуж небыт шобырен.

Эн дугды гинэ эктэмысь —

Тынад со ватэм кужымед.

Удмурт Дунне
By Удмурт Дунне Май 11, 2018 17:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<