Алнаш ёросысь Ӟунняшурысь Ольга Заитовалэн улонэз киноын кадь

Удмурт Дунне
By Удмурт Дунне 14 мая, 2018 11:35

Алнаш ёросысь ӟунняшурысь Ольга Заитова.

Туэ август толэзе анае Ольга Романовна Заитова 83 арессэ пусйыны дасяське. Аслаз гумыраз, секыт война аръёс пыр потыса, мае но ӧз чида со. Но ассэ шудоен лыдъя.

Коркаез куроен шунтон

Ольга Романовна Заитовалэн пичи дырыз ортчиз Алнаш ёросысь Ӟунняшур (Юмьяшур) гурт вӧзысь Чияпочинкаын. Али со починка ӧвӧл ни. Ӟунняшурысь Чияе улыны мынӥллям 1937-тӥ арын. Анайлы соку 2 арес вылэм, Вася нимо вынызлы — 1 арес. Олёша выныз Чияын вордӥськем ини. Анайлэсь 8 ареслы бадӟым Граня апаез вылэм на. Ӵужанае 12 пинал вордэм, соос пӧлысь та 4-езлы гинэ улыны кылдэм.

Быдӟым ож кутскыку ик, Ольга Романовналэсь атайзэ фронтэ келяллям, анаелы соку 6 арес гинэ тырмоно вылэм.

— Анайлэсь туж-туж бӧрдэмзэ гинэ ӧжыт тодӥсько на, — тодаз вае со вакытэз анае. — Марлы анай бӧрдэ шуыса, туж пайми. Отчыозь бӧрдэмзэ адӟеме ӧй вал. 3 пичи пиналэн кыльыса, анайлы секыт йӧтӥз, дыр. 14 арессэ тырмытэмез бере апайме нюлэс дасяны келязы. Соку но анай бӧрдӥз. Туала улонын 14 аресъемъёс пичи нылпи чот ай. Нош апайме олокытчы но ужаны лэзьязы: Дэри ёросысь Постолэ, Якшур-Бӧдья ёросысь Кекоранэ, Ува ёросысь Подмой но Каркалай гуртъёсы. Одӥг пол эшъёсыныз ужан дорысь пегӟыса кошкиллям. Нылыд пегӟем шуыса, дорысь поттыса, анаймес но нуизы. Ми, 3 кузя пичи пиналъёс, тол куазен асьме понна кылимы. 3 толэзь ужаса ветлӥз анай Постолын. Милям скалмы но вал. Нукапай Надяпаен чаклало вал кадь милемыз. Сифаратмы (сепаратор) вал, соос соин ужаллязы. Милемлы быдэн чаркаен йӧл сёто но кошко. Гур эстэм бервылмес но соос ик чаклаллям, дыр. Толъёс туж кезьытэсь вал. Оло, дӥсь ӧвӧлысь но озьы йӧтылӥз. Кык полэс укноос но ӧй вал.

Весь-весь паймисько: арес но ӝыны быдӟа нуныез кезьыт йӧлэн сектаса (Олёша сыӵе пичи вал ай, анаез келякузы), бӧрдыса-бӧрдыса изиськом вал. Мон бадӟым мурт интые кылемын. Кинлэн ӵыныз потэ, гурт кузя ведраен тылӝу утчаны мынӥсько. Одӥг арлы пичи Вася выныным сюлтыр гинэ ӟег культо пыртаськомы гур эстыны, пелляса-пелляса кенжытӥсько вал. Корт гурез но озьы ик эстӥмы. Культодэс зол керттыны турттэлэ, кемагес мед ӝуалоз, шуэ вал анай. Пумы ӧй вал, куроен корка шуналоз-а ма? Инмар чаклам, дыр, соку милемды — тылпу ӧм поттэ.

Война бере гурт калыклы трос курадӟоно луиз. Атай вӧзын нянь сиыса будонэз туж ӧжытэз адӟиз. Каргам война ваньзэ ӵушказ. Анаелэсь атайзэ но со быдтӥз.

Скрипка гурен буйган

Анае 3 классэз 5 ар дышетскыны дауртӥз. Дӥсь ӧвӧл. Огполаз визь люканы мынэ, мукетъят уж тросэн — уг. Ӵукна пичи дӧдьыен дораз пу вайыса кельтыны кулэ вал угось.

— Тулыс ке вуэ, барангы (картошка) крахмал сюрыкуз бичаськом вал, — шуэ анай. — Туж-туж секытэн будӥмы. 12 аресын ӟазег пастухамы. 100-200 грамм пужнымтэ сезьы пызь сётылӥзы. Со шыдэ поныны но ӧз кыльылы — бертыкум ик быдтӥсько вал. 14 аресын парсь пастухамы. Со пастухам аръёсы нокытчы но пыремын ӧвӧл — архивысь утчаса ӧй шедьты. Будэме бере парсь гидын кема ужай, рядовойын но ветлӥ. 1958-тӥ арын Ӟунняшуре бызи. Мужике соку гинэ армиысь бертэмын вал. Картэ скрипкаен шудыны туж быгатылӥз. Армиын но шудэм. Командирез синмаськем. Бертыкуд одно ик скрипка кузьмало шуыса кыл сётэм. Картэ дораз берытскон вакытэ командирез отпуске кошкем, но бӧрысь посылкаен скрипка лэзиз ик. Картэ кыӵе шумпотӥз! Азьло гуртын куно ӵем пыртано вал, куноос понна одно ик скрипказэ шудылӥз.

Быземез бере но анай весь парсь сюдӥз, скал кыскиз. 5 нылпи вордыса, нылпиен дорын пуконэз ӧз адӟылы. 5-тӥ нылпиез вордӥськем бере гуртысь медпунктын санитаркаын, пенсие потытозяз, ужаз.

— Туала нылпиос милесьтым адӟонмес медаз адӟелэ, сием потонэз медаз тодэлэ. Туннэ нуналын Инмарлэн бурд улаз улӥськомы ке но, сое туала калык малы ке но дунъяны уг быгаты, весь уксёзы уг тырмы. Милемлы кӧня пенсия сёто, соизлэсь медаз люке шуисько ини. Мон туж бай песянай, Инмарлы тау, 12 внукъёсы, 14 кузя правнукъёсы будо ини, — данъяськыса вералля Ольга Романовна.

Анаелэсь верамзэ кылзыса, кино учкисько кадь потэ. Веранзэ бӧрдыса вера, пичи пиналъёс, тол куазен асьсэ коже кыльыса, кызьы меда улӥськеммы, малы нокин начальникъёс но адӟиллямтэ шуыса бӧрдэ. Бордаз мон но итӥськисько. Кузпалыныз артэ кема улыны ӧз кылды анайлы, 45 аресказ огназ 5 нылпиен кылиз. Атае, сюлэмыз висьыса, кулӥз, солы но 45 арес вал. Нылпиосыз паръямын ӧй вал на, али ваньзы асьсэ семьяосынызы уло, ӵем гинэ пумиськылӥськом. Нош улэ Ольга Романовна пиеныз но кенэныз артэ Ӟунняшурын. Соослэсь куинь нылпиоссэс будэтыны юрттӥз, соос но табере асьсэ семьяосынызы уло ини. Быдӟым Вормон Нуналэн ӟечкыласа, тазалык но шудбур сӥзиськомы анаймылы, эшшо Вормон Нуналъёсты пумитаны мед быгатоз на.

Валентина Никифорова,
Алнаш ёросысь Чумали гурт

Удмурт Дунне
By Удмурт Дунне 14 мая, 2018 11:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<