Алнаш ёросысь Сям-Какся: Школазы но, колхоззы но одӥг

Удмурт Дунне
By Удмурт Дунне 29 мая, 2018 13:35
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Сям-Какся школалэн директорез В. Семёнов.

Сям-Какся гурт кылдэмын 1929-тӥ арын. Та дыр ӵоже со ялан вошъялляз районзэ: я Можгалэн, я Алнашлэн лыдъяськылӥз. 1964-тӥ арысен Алнаш ёросысь Туймыйыл гурт поселение пыре.

Сюрес дурын шудон

Федерал трасса вылын, дораз ӧтьыса кадь, Сям-Какся гуртэ возьматӥсь пус шуккемын. Кожем бере сюрес нырысь-валысь вольыт. Пыдлогес пырыны кутскиськод но, урам сюбега, ог-огзы пумитэ лыктӥсь машинаос ваче уг тэро. Сыӵе дыръя кожон интыез мурт капка азе сяна ӧвӧл — сюреслэн кыкнапалаз канава. Тулыс уката секыт луэ. Эшшо ке — нӧд. Куддыр татчы бадӟым машинаосын сяна пырыны-потыны уг быгато. Но со понна котькуд корка газ пыртэмын. Кирпичлэсь ӝутэм юртъеръёс пӧлын зэмос дворецлы укшасьёсыз но вань. Соос радын ик воксё куашкасьёсыз, куштэмъёсыз пильылэм укноосын сыло. Быгатӥсез юртсэ вуза ик — 300-400 сюрс манетэн. Но басьтӥсез уггес сюры.

— Гуртамы 20 ар талэсь азьло 48 корка лыдъяськиз. Соку ик 10-20 мурт аслыз корка ӝутӥз. Али пуктӥськисез чик ӧвӧл. Пуктӥськыны секыт луиз. Котырысьтымы из но луо поттонъя каръеръёс пытсаськизы, — шуэ гуртысь дышетӥсь Виталий Рябин.

Егит семьяос ӧвӧл шуыны уг луы. Шудон площадкаоссы ӧвӧлысь корка азязы кисьтэм, гуждорен шобырскем луоын пичиос кыштыр гинэ шудо. Куазь шулдыр дыръя соос татысь уг ик бырыло.

— Гуртамы ӟечыранмы мед луысал, — шуэ пичи нылаш Ксюша Пчеловодова, луоен саптаськем киоссэ курткыса. — Стёпикен милемлы шудон инты ӧвӧл. Площадка луысал ке, мама гуртэ ужен пукыны ӧй косысал, дыр. Со монэ школаын дышетэ, эшшо ке дорын но урок лэсьтытэ.

Урам дурын шудӥсь нылпиос.

Туннэ нылпиос сюрес дурын ик тэтчало-бызьыло, тазьы шуге-леке но вуыны кема ӧвӧл. Зэм, гурт поселениын та пумысен мар вераны ӟудо.

Данъяськонзы — школа

Туннэ гуртын 139 мурт прописать каремын. Уло 98-эз, таос пӧлысь 24-ез — пенсионеръёс. Сиён-юон басьтыны, эмъяськыны, концерт учкыны, тодон-валан люканы сям-каксяос вамышто шур сьӧрысь ог 2 иськемлы палэнэ пуксем Кузьыли гуртэ. Сям-Каксялан угось одӥг но соцобъектсы ӧвӧл. Ас вакытаз Сям-Каксялан колхоззы но, фермаоссы но вал. Туннэ гидъёссылэн бервылзы но уг адӟиськы. Зэм, школа Сям-Какся гуртлэсь нимзэ нуллэ. Но зэмос адресэз: Кузьыли гуртысь Полевой урам, 8-тӥ юрт.

кузьылиын выль школа усьтӥськиз 4 ар талэсь азьвыл.

— 1939-тӥ арын Сям-Какся гуртэ начальной школа ӝутӥзы, — валэктэ школалэн директорез — Сям-Какся гуртын улӥсь Валерий Семёнов. — Со школаен ик гурт дано вал. Татын дышетскизы писатель Анатолий Уваров, военной переводчик, кылбурчи Яков Майков, Россиысь дано артист, маскарчи Анатолий Ушаков, Кун Кенешлэн азьвыл тӧроез Игорь Семёнов но мукетъёсыз. Но юрт пумен вужмиз. Соин ик 1964-тӥ арын Кузьыли гуртэ основной школа пуктоно кариськизы. Озьы ке но нимзэ Сям-Какся ик кельтӥзы. Нош таиз но вужмем бере, 2014-тӥ арын, Кузьыли гуртэ выль школа ӝутӥзы. Озьы ке но нимзэ нош ик Сям-Какся ик кельтӥзы.

Школаын али 46 пинал дышетске. Таос пӧлысь 13-ез — Сям-Каксяысь. 1-тӥ сентябре 2 пиналлэсь трос лыктӥсез уз луы, дыр, шуэ Валерий Семёнов. Гуртазы вордӥськемъёс арен-арен я трос, я ӧжыт люкасько. Туэ ӵапак кулэс вакытыз. Кайта 5 кузя луозы, пе. Школаен одӥг липет улэ пыртэм нылпи садэ али 28 пинал ветлэ, нош пуктэмын со, 24 муртлы чакласа. Тэрытӥсько — нокинэ ӝож уг каро.

9-тӥ классэз йылпумъямзы бере тросэз пиналъёс Можгалась педколледже я медучилищее дышетскыны кошко.

— Аслам нылы Ижысь Кузебай Герд нимо гимназиын дышетске, — веранзэ азьланьтэ директор. — Огез нылпимы Туймыйыл гуртысь шор ёзо школае ветлэ. Артысь Шубино гуртысь пиналъёсты нуон-ваён сяменыз автобус милесьтымзэ но кутэ. Алнаш шор ёзо школаын со ласянь дышетскыны секытгес: котькудӥз анай-атай пиналзэ черкогуртэ ачиз нуыны кулэ.

Сям-Какся школаын 10 дышетӥсь. Таос пӧлысь 5-ез — Сям-Каксялась. Шоро-куспо арлыдзы 46 арес. Али англи кылэн дышетӥсьлы ёрмо.

Кужым — валче улонын

Азьвыл Кузьылиын но Сям-Каксяын колхозъёссы нимаз вал. Сям-каксяос Можга ёросысь Ягул гуртысь лыктэмын, музъемъёссы тырмымтэен, Сям шур дуре пуксемын. «Какся» — со воршудлы кутскон сётӥсь кышномуртлэн нимыз, со сяна, «цапля» шуэмез возьматэ. Нош кузьылиос потэмын Можга ёросысь Куашкам гуртысь, кузьыли муӵъёс трос луэмысь, гуртсэс Кузьыли нималлям. Табере 2 гуртъёсты огазеяло школа но «Родина» хозяйство. Хозяйство пуктӥськыны мылкыд карисезлы техникаен юрттэ, гуртъёсысь ульчаосыз сузяса возе. Колхоз председатель Вячеслав Максимов Сям-Каксяез но, Кузьылиез но чакласа возе. Али тани ву гумыос но хозяйстволы оскемын. Кузьылие выль ферма ӝутон борды басьтӥськизы. Огзэ 2016-тӥ арын гинэ усьтӥзы вал ай.

— Тани али клублэсь липетсэ воштыны туртто, солы калык шумпотэ, — шуэ Валерий Семёнов. — Шумпотӥськом спортзаллы. Пиналъёс отчы мыло-кыдо ветло. Пиналъёс пыртэмын куасэн бызьылонъя но, капчи атлетикая но ёрос командаосы. Шахматэн, шашкиен вормылӥськом. Одӥг гурт кадь улыса, ми кужмогес луиськом.

Елена Сараматова
Туспуктӥз автор

Удмурт Дунне
By Удмурт Дунне 29 мая, 2018 13:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<