Алексей Трубачев. Чечы отпуск. Юмок учыр

Удмурт Дунне
By Удмурт Дунне Май 15, 2018 17:10

Алексей Трубачев. Чечы отпуск. Юмок учыр

Та учыр кылем гужем вал.

— Васьлей, нылпиослэн чечы сиемзы потэ, — шуэ кышно.

Малпай Чечы Санко доры бызьылыны. Солэн чечыез ноку уг бырылы. Нош ачим мон та сиёнэз пичи дырысеным уг гажаськы. Уго котькуд гужем монэ мемее чечы кыскыны косылӥз. Муш лекамысь но ӧз жаля. Нош мынам кыкез но синъёсы макмырам японецлэн кадь луылӥзы. Синъёсме чиньыосын усьтылоно вал, ма, коть чаг пуктылы.  Соин мушъёс адӟемпотостэмесь луизы.

Нош нылпиос куро бере, кызьы уд сюды. Куинь литръем пластик посуда кутыса, Чечы Санко доры вамыштӥ.

— Толон гинэ чечы кыски, — шуэ Санко. — Нырыд шӧдӥз, луоз, Васьлей. Аслым но тырмоз, вузаны но шедёз. Эскериськыса ну посудадэ, калыз векчигес кадь.

Киысьтым киям вошъяса, нуисько. Куазь туж пӧсь кариськиз. Чечылэсь зынзэ оло шайзэ шӧдыса, котырам пӧртэм кибыос бызгетыны ӧдъязы. Кӧня ке улыса, йыр вадьсам дуринчи вуиз.

О, таӵе шиё кибылэсь мон пичи дыръям синтэм-пельтэм пегӟысал ни. Али пал киыным шонаськыны кутски. Вамышъёсы кузьгес луизы. Корка дорозям трос ик ӧз кыльы ни. Бызьыны умой ӧвӧл. Ма, та Васьлей, урам кузя тэтча шуозы, кӧтыз йырызлэсь вылэ вуэ.

Со куспын посудаелэн калыз чигиз ук! Чечые вылам но кисьтӥськиз, сюрес вылэ но вияз. Олокытысь лыдтэм вуизы лобасьёс. Уд но вала — оло муш, оло дуринчи. Мон визьтэмми. Киосыным шонаськыны кутски. Пель дурам сальк! гинэ лекась луиз, собере синмам сётӥз. Йыры поромиз. Чечыен дӥсьлэсь мозмытскыны выронъям сюрес дурысь льӧмпу улэ кожи. Дэремме но, штанме но кыли ни, кытӥ ке ӧвӧл кӧтам сач! вуиз. Вӧсь луэмелы чидатэк, йырсазьме ик ыштӥ, кулыса уси.

Кӧня кылли — уг тодскы. Йыр вӧзам пыд куара кылӥськиз.

— Васьлей, малы сомында юоно вал. Дорозяд мыныны кынарыд ӧз тырмы шат? — тодмай бускель Сандра Аннапайлэсь куаразэ. — Малпад, ӵуказе уз ни шедьы? Нош дӥсед кытын? Султы но дорад вамышты. Коркаед дорозь киыныд сузёд.

— Мушъёс но дуринчиос вылам омырскизы, — тӧрнам кылме мырдэм быгылляса, шуисько. — Сюрес дурысь чечыен посудаме нылпиосылы вутты вал, Аннапай.

* * *

Ай та вакытэ дорысьтым уг потаськы. Вылтыр тӧрнамын, огез пельы пӧйшурась пунылэн кадь ошиськемын, палыз синмы пытсаськемын. Шонерскеме но уг луы — кышно серекъя, кӧтад лекам интые, берпалад, пе, мед сачкетысалзы. Ато арня ӵоже телевизор дорысь кошкыны уд ӵыдӥськы. Вот кыӵе чечы отпуск аслыд лэсьтӥд!

Алексей Трубачев

Удмурт Дунне
By Удмурт Дунне Май 15, 2018 17:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<