Адӟытонын кадь. Скалэз, тракторез исатэк, специалист луод-а?

Удмурт Дунне
By Удмурт Дунне Май 5, 2018 12:49

Шаерысьтымы хозяйствоосын тырше 21 сюрс 502 адями, 30 аресозь егитъёс — 2 сюрс 248 кузя. Мар кароно егит кадръёсты гуртэ кыскон понна?

Можгалась агропромышленной колледжын пудо эмъясьёсты дасяло.

Кинэн кусып юнматоно?

Ужасьёс тырмымтэен, пенсие потэмзы бере но арлыдоос колхозэз ӝутыны кылё. Сыӵеос туннэ 1 сюрс 159 лыдъясько. Ёрос центръёслэсь палэнэ интыяськем хозяйствоосын таос сьӧры сюлворыса ветло, медаз кошке шуыса. Интыязы угось кельтыны нокинэ. Хозяйствоосын тужгес зол уг тырмо агрономъёс, механизаторъёс, пудо эмъясьёс. Со дыре ик техникумъёс, колледжъёс, училищеос 3 сюрс специалистъёсты арлы быдэ потто. Гурт удысъя но сиён-юонъя министерство егитъёсты гуртэ кельтон вылысь висъя подъёмной. Но уксё пинал специалистъёсты уг гочаты ни. Дышетон система но уг тупа — егитъёс куддыр скал доры но кудпалтӥз султыны уг валало, трактор сярысь веранэз ик ӧвӧл. Та сярысь вераськизы, гурт удысъя но сиён-юонъя министр Ольга Абрамова техникумъёслэн, колледжъёслэн кивалтӥсьёсынызы пумиськыку.

Туннэ тросэз гурт удысъя дышетскись пиналъёс дась фермер кариськыны, асьсэлэсь ужзэс усьтыны. Но кызьы ваньзэ сое радъяно, тодон-валанзы уггес тырмы. Куд-огезлэн бадӟым мылкыдыз кунгож сьӧрысь фермеръёсын матэгес тодматскыны, отын практиказэ ортчыны. Азьвыл Ижысь гурт удысъя академия англи кылэз тодӥсь студентъёссэ Америкае ысъя вал. Санкциосын йырин сюрес пытсаськиз. Озьы ик асьмелэсь палэнскизы Англия, Германия. Зэм, Финляндия валче ужаны пумит ӧвӧл, кылзэс тодэмзэс но татын уг учко. Но студентлэн луонлыкез ӧвӧл аслаз коньдонэныз билет басьтыны, сопала кошкыны. Городысь студентъёслэн мылкыдъёссы но луонлыкъёссы вань ик, но таосты кутӥсь ӧвӧл — гуртоослы гинэ программа чакламын.

Кылсярысь, 2000-тӥ аръёсы 200 пала студентъёс кунгож сьӧрын практика ортчизы, миым сыӵе шудоос 100-лэсь ичи вал, таос пӧлысь 20-ез Швейцариын тодон-валан люказы. Али кусыпъёсты юнмато Китаен. Малы сокеме учкылонэз, асьме шаерамы но юнэсь хозяйствоос вань ке? Асьме дорын но азьмынӥсь технологиосты уже куто ук. Зэм, гурт удысъя академиысь кивалтӥсьёс верамъя, академиын сётэм тодон-валан кыдёке азьпала кошке, хозяйствоосысь технологиосын ӵошатыса. Россиын но вань юнэсь предприятиос. Малы отчы мынонтэм? Кылсярысь, артысь Свердловск улосысь хозяйствоос валче ужаны дасесь, шуэ Ольга Абрамова. Татысь хозяйствоос студентлы улон понна но, сюрес вылэ но уксё висъяло, стипендия тыро. Мукет улосъёсысь но юн хозяйствоосын валче ужано, дэмла Ольга Абрамова.

Нялтас вераса, шаерысьтымы егит специалистъёс пӧлын радъяны чакламын аспӧртэм вожвылъяськон. Отын вормисьёсты ик азьмынӥсь хозяйствоосы визь люканы келялозы, отысь улонэн, ужен матысь мед тодматскозы шуыса. Та ик луоз вормемзы понна кузьым.

Дышетон амалэз воштоно

Сьӧлта ёросысь огаз хозяйствое агроном утчазы. Огез студент но ӧз вазиськы. Туала студентлы угось вуз карон удысын ужаны капчигес: эсьма, бусыын кынмонэз, дэри коланэз ӧвӧл.

Ми дась студентъёсты дорамы басьтыны, бадӟым уждун тырыны, практика дыръязы асьсэды умоен мед возьматозы, мед оскомы, ужаны быгатозы шуыса, верало хозяйствоосын кивалтӥсьёс. Но студентъёс ӵемысь практиказэс ньӧмыз понна ортчо.

— Хозяйствоосын валче ужаны секыт луиз, — шуэ Можгалась агропромышленной колледжен кивалтӥсь Наиль Камальтдинов. — Пудо эмъясь луыны дасяськисьёс скалэз уг адӟыло. Азьвыл хозяйствоосын практика ласянь умой ужаськомы вал. Али шуо: тӥляд студентъёсты ветлэм бере скал йӧлзэ ӝутэ.

Туннэ хозяйствоос студентэз вашкала техника сьӧры гинэ пуктыны дӥсьто. Кыӵе механизатор луоз со? Нылпиос асьсэос но кыл кутыны дась ӧвӧл. Зэм, куд-ог училищеослэн асьсэлэн автопарксы вань. Академилэн аслаз базаез юн. Отчы дышетскон вылысь асьсэлэсь техниказэс вутто трактор-комбайн вузась «Интерпартнёр» но мукет фирмаос. Но со выставкалы укша: техника шоры палэнысен гинэ учкыны лэземын, нош котыраз берганы, уката ик запчастьсэ поттаса учкыны воксё алэмын.

Ольга Абрамова пусъемъя, «Интерпартнёр» кадь фирмаосын, хозяйствоосын кенешыны чакламын, таос вуж техниказэс студентъёслы мед сётозы, сое нылъёс-пиос учкыны-бичаны мед быгатозы шуыса. Котькуд практиказэ ортчись студент борды хозяйствоысь нодъясь юнматозы, со егит муртэн быдэс практиказэ валче мед ужалоз, азьланяз но студент сярысь медаз вунэты шуыса. Соку егит специалистлэн аслыз ачиз осконэз будоз, сое хозяйствоын возьмало шуыса адӟоз. Училищеосты йылпумъямъёсты гурт удысъя академия соку ик 2-тӥ-3-тӥ курсэ кутыны мед быгатоз — дырзэс быдтыса, егитъёс 1-тӥ курсын медаз пуке ни. Москва улосысь Балашихаын дышетон воксё но дистанционной амалэн радъямын, трос дырзэс студентъёс фермаын я бусыын ортчыто. Со сяна, чакламын учкыны, кыӵе ужасьёс кытчы матысь дыре кулэ луозы. Соя ик дышетон удысэ но воштонъёс пыртэмын луыны быгатозы.

Елена Сараматова
Туспуктэм: 
ciur.ru

Удмурт Дунне
By Удмурт Дунне Май 5, 2018 12:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<