Владимир Векшин: Мон ӧй валалля шудме…

Удмурт Дунне
By Удмурт Дунне Апрель 23, 2018 15:36

Владимир Векшин.

Владимир Векшин — Удмуртиысь дышетон удысын ужасьёслэн профсоюзэнызы кивалтӥсь, химия наукаосъя кандидат, доцент, тодмо удмурт кылбурчилэн Ашальчи Окилэн, ӵыжы-выжыез. Мае тодаз вае со Акилина Векшина апаез сярысь но кызьы аслаз улонэз радъяськиз?

— Владимир Васильевич, Ашальчи Оки тӥ понна — кин?

— Мынам анаелэн атаезлэн (Николайлэн) сузэрез. Пичи дыръям но, школаын дышетскыкум но, мон ӧй тодылы со бадӟым кылбурчи шуыса. Мон понна со кыкетӥ ӵужанай интыын вал, улонам трос визь-кенеш сётӥз.

Анаелэн атаез (Николай Григорьевич Векшин — А. Окилэн агаез — авт.) гурт улонэз туж валась пиосмурт вал, колхоз тӧро. Но Быдӟым война вакытэ сютэм улӥсь нылкышноосты, нылпиосты жаляса, урожайлэсь оглюкетсэ со гуртоослы люкылоно кариськем. Та сярысь чагиськись сюрем, ӵужмуртме пытсэт сьӧры келязы. Сарапулысь тюрьмаын ик со кулӥз. Семья сярысь сюлмаськон усиз ӵужанае вылэ. Солэн одӥгез нылыз — мынам анае — биологияя но географияя дышетӥсь вал. Война дыръя Алнаш ёросысь Ӟатча гуртысь школаын ужаз. Ӟатчалась госпитале келяллязы ожын сӧсырмемъёсты. Тӥни одӥгеныз сыӵе сӧсыр кылем воргоронэн анае тодматскем. Ог-огзылы синмаськиллям, ӵош улыны кутскиллям. 1948-тӥ арын вордӥськиз Люда апае, собере — мон. Но атаймылэн палэнын аслаз семьяез, нылпиосыз вал, 2 семьялы висъяськыса улыны со ӧз быгаты ни, кошкиз. Мыным соку арес но ӧй вал ай, соин ик атайме син азям пуктыны уг быгатӥськы.

Анае милемын малы ке ӟуч сямен вераськиз. Трос дырзэ висъялляз школаын нылпиосты дышетонлы, общественной ужен выриз, весь калык пӧлын вал. Соин ик милемлы сузэреным Ӟунняшур гуртысь Марьяпай нимо нылкышноез вайизы. Со бордамы ик улӥз, чылк-чылк удмурт вал, ӟуч сямен ӧз тоды. Милемлы ог-огмес кызьы ке валаны кулэ вал ук — удмурт сямен вераськыны дышим. Та понна али но тау шуисько.

Аслам ӵужанае (А. Окилэн агаезлэн кышноез — авт.) доры Грак ёросысь Кузебай (Полом) гуртэ ветлылӥмы. Отчы милемыз гужемлы келляллязы. Кыӵе шулдыр интыын со улӥз! Бакча берын ик пичи шур, 3-4 бадӟым льӧмпу, сьӧд мунчо, борыен тырмем бамал, нюлэс. Льӧмпуос вылысь ӧм ик васькалэ, маке мында льӧм бичаськом но вузаны Граке нуиськом вал. Ӵужанае визьмалляз: базаре вузаськыны мынон азьын кидэс умой-умой миське. 1-2 стакан льӧммес вузаськом но, сыӵе шумпотӥськом ни, поттэм копейкаенымы ческын морс басьтӥськом. Ӵужанае пичи гинэ 100 арозь ӧз улы, берло воксё синтэм кылиз…

Пичи Вова анаеныз (паллянысез) но Люда апаеныз.

— Солэн улэм коркаез — со А. Окилэн выжы юртэз луэ, озьы-а? Ӵапак со интыын али кылбурчилы сӥзем сквер но синпелет усьтэмын.

— Озьы. Но соку мон та сярысь уг тодӥськы вал. Ӵужанае доры бертылӥ но тӥни. Бадӟым будэме бере гинэ тодӥ: та юртын Лина апае, агайёсыз будӥллям. Ваньзы яна потӥллям, юртэз возисе Николай (мынам песятае) кылем. Татысен ик сое тюрьмае нуиллям. Лина апаймы улэ вал Алнашын, ми — Ӟатчалан. Дораз ӵем гинэ вуылӥм. Лина апаймы но солэн кузпалыз Иван Иванович Карачёв мукет семьяослэсь висъяськизы зэмос интеллигентъёс луэменызы. Соос вожмаськыса лыдӟиськизы, Лина апае яратэ вал С. Есенинэз, А. Чеховез. Со туж юн сямо кышномурт вал, вань улон со котырын бергаз, тросэз соя лэсьтӥськиз. Но, мукет ласянь, со туж лякыт, жалясь но валась вал. Бӧрысь ини, книгаоссэ, кылбуръёссэ лыдӟыса, валай: пинал дыръяз со воксё мукет вылэм. Сямыз туж зол воштӥськем репрессиос улэ шедьылэмез, тюрьмаын пукемез, Быдӟым ож пыр потэмез бере.

Иван Иванович Алнаш ёросысь гурт хозяйствоя управлениын валтӥсь агроном луыса ужаз. Сое туж гажало вал. Но кытчы ке лыктэ ке, «Ой, Векшиналэн картэз лыктӥз» шуылӥзы, талы туж йырыз кур луылӥз. Лина Григорьевна малы ке бызьыса но фамилизэ воштымтэ. Но кузпалзэ со гажалляз, туж ӵем «Иван — большая голова» шуылӥз. Иван Иванович дораз барометр возиз, нош лапас пала потон интыын термометрез ошемын вал. Котькуд ӵукна куазез гожъялляз. Со дасо аръёсын гожъямъёсыз олокӧня зӧк тетрадь мында люкаськемын вал.

Анае но Лина Григорьевна эшъяськизы. Пумисько ке, куспазы удмурт сямен шыпыр-шыпыр верасько ни. Туж тодӥсько на анаелэсь но Лина апайлэсь Айво Иви сярысь вераськемзэс. (Айво Иви — А. Окилэн выныз, кылбурчи, писатель. Репрессиос улэ шедьылыса, тюрьмаын воземын — авт.). Лина Григорьевна анаелы ӝожтӥськиз, Ивиез, пе, больницаысь дорам басьтыны турттӥсько, но Иван Иванович пумит, Айво Иви туберкулёзлэн усьтэм формаеныз висе, эмъяны, пе, уг ни быгато, ваньзылы со секыт висён паласькоз… Айво Ивиез басьтымтэез понна Лина апае ассэ янгышен лыдъялляз, выныз 1963-тӥ арын больницаын ик кулӥз. Лина Григорьевна сое ватыны Чуре мыныны потӥз, но куазь уродэн, йӧвалеген ӝыны сюресэз сяна ортчыны ӧз быгаты… Ватӥськыны ветлӥллям тодмо писатель А. Клабуков но эшшо кӧня ке мурт. Айво Ивилэн одӥг гинэ Эмма нылыз кылиз, Лина апайлэн верамезъя, со Майкопе кошкемын вал. Но солэн пытьыосыз ышизы…

Пионер дыръяз котьку Данъян пул вылын вал.

— Нош ку тодӥды, Лина апайды — со нырысетӥ удмурт нылкышно кылбурчи шуыса?

— Пичи дыръям учкисько вал Лина Григорьевналэн борддорысь часэз шоры. Сое эшъёсыз кузьмаллям. Час вылын гожтэмын «Акилиналы…» Огпол юай: малы тонэ Акилина шуыса гожтӥзы, тон Лина ук? Со маке валэктӥз аслаз нимыз сярысь, собере вераз ашальчи турын-сяська сярысь, туж ик син азе уг йӧты, пе, но чебер… Та валэктэмъёссэ мон соку пелям ӧй но поны. Иван Ивановичлэн но Лина Григорьевналэн вал пичигес гинэ коробказы, отын 3-4 орден кыллиз, трос медальёс. Мон яратылӥ со коробкаын бугыръяськыны. Огпол ваньзэ гадям бырттылӥ: огпалаз — Иван Ивановичлэсь медальёссэ, орденъёссэ, мукет палаз — Лина Григорьевналэсь. Пайми: малы Лина апаймылэн медальёсыз ӧжытгес, со вань война пыр ортчиз, фронтын хирург вал ке но, нош Иван Ивановичлэн — тросгес, войнае ӧз ке но ветлы. Та сярысь апаелэсь аслэсьтыз юай, со киыныз гинэ шонтӥз. Али валасько: репрессиос улэ шедьылэмзэ, пытсэт сьӧрын пукемзэ тодыса ик, сое данъямлэсь возиськизы, фронтын со туж трос адямиез кулонлэсь утиз, зэмос герой вал ке но.

Тодам вайисько на: Лина апае но Иван Иванович туж эшъяськизы Геннадий Красильников писательлэн семьяеныз. Красильниковез со «удмурт Шолохов» шуылӥз. Нош аслаз кылбурчи луэмез пумысен мон тодӥ ни студент дыръям. Тодӥ ке но, мон понна Ашальчи Оки кылбурчи но Лина апае 2 воксё пӧртэм адямиос кадь потылӥзы.

Али малпасько, со монэ но, сузэрме но эскерылӥз ук, гожъяськыны быгатонлыкмы вань-а, ӧвӧл-а шуыса. Милемыз серем пыр гожтэт гожъятэ вал. Сузэрелэн ӟеч пӧрмылӥз, мынам — ӧзгес. Со понна мон ӟеч шудӥ шахматэн, таизлы монэ Иван Иванович дышетӥз.

8-тӥ классэз йылпумъяме бере Лина апае мыным кузьым лэсьтӥз — Быдӟым ожысь ваем трофейзэ, Zeis бинокльзэ, кузьмаз. Мон сыӵе шудо вал! Та кузьымме ялан сьӧрам нуллӥ. Нош огпол классэнымы велопоходэ Елабугае потӥмы. Кузебай гурт дорысь возь вылэ шутэтскыны интыяським. Бинокль отчы ик кылиз. Кӧня мон куректӥ сое ыштэме пумысь, та сярысь Лина апайлы вераны ӧй дӥсьтылы.

— Тросэз тодо: А. Окилэн Быдӟым ожысь ваем мукет трофеез но вал — синъёсты эскерыны диоптрийной линзаосын набор. Соосты, пе, утьыса возем соин ӵош Алнаш больницаын ужам медсестра.

— Озьы. Та линзаос али А. Окилэн музей-юртаз утисько. Нош со медсестралэн нимыз Наталья Фадеева, Наташа апай. Со Лина Григорьевналэн бур киыз но туж матысь эшез вал. Солэн 3 пиналъёсыз будӥзы, ваньзы визьмоесь, спортэз гажасесь. Шоразы учкыса, Лина Григорьевна ӵемысь шуылӥз: «Вот, Вова, адӟем кар».

Мынам пичи дырысеным синъёсы лябесь вылӥллям, но мон та сярысь ӧй тодылы. Школаын покчи классын нырысетӥ парта сьӧрын пуки бере, соку но ӧй вала, лэся. Нош огпол шудон сяменым ныр йылам анаелэсь очкизэ понӥ. Дунне выль сямен усьтӥськиз ук! Укно улын будӥсь писпуос вылысь мон адӟи куаръёсты, гуждор вылысь — векчи сяськаосты! Та бӧрсьы мон анаелэсь очкизэ лушкем тырыны ӧдъяй. Нош собере Лина апае синъёсме чаклаз но шуиз: «Вова, тон инвалид. Тон тод та сярысь но синъёстэ утьыса возь, спортэн зол эн выры, синтэм кыльыны быгатод…» Но кызьы спортэн уд выры ай? Мон ӧй чидалля, спорт шудонъёсы пыриськылӥ.

— Тӥ бырйиды гуртын будэм пияш понна чылкак витёнтэм удысэз — химиез. Малы?

— Школаез медален йылпумъяй. География туж кельшылӥз, карта кузя лыдӟыса-эскерыса пыдесъяськыса ветлылӥ. Ветлӥ на химияя кружоке. Но малпалляй география удысэ мыныны. Тодӥськоды на-а, Ленин шуиз: «Коммунизм — это советская власть плюс электрификация всей страны», нош Хрущёв сое тупатӥз: «Коммунизм — есть советская власть плюс электрификация всей страны, плюс химизация народного хозяйства». Ӵапак со «химизация народного хозяйства» ӧтён улсын быдэс кунысь егитъёс химия удысэ кыстӥськизы. Мон но. Москваысь кун университетын химияя факультетэ пырон понна 1 интые 75 адями нюръяськиз. Пӧлысьтызы медалистъёс гинэ — 150. Конкурслэн бадӟым луэмез герӟаськемын на вал соин но: школазэс йылпумъязы, азьвылэн ӵошатыса, 2 поллы тросгес нылпиос (школа 11 класс дышетсконысь выжиз 10 класс дышетсконэ. Озьы одӥг арын 2 выпуск вал).

Мозамбикысь университетын студентъёсты химилы дышетӥз.

Азьланяз дышетсконэ пумысь анае быдэсак оскиськиз Лина апаелэн дэмланъёсыз вылэ. Лина Григорьевна шуиз: «Дан поттыса уд ветлы ни, тани тыныд Удмурт пединститут, отысь химияя факультетэ мынод но тӥни». Мынӥ, конкурс пыр потӥ. Нырысетӥ курсме туж ӟеч йылпумъяй, Лина Григорьевна шумпотӥз, кунсьӧр кылъёсын словарь кузьмаз. Та кыллюкам шоры мон пичиысен туж вожъяськыса учкылӥ, Лина апае тае шӧдыса улэм.

— А. Окилэн одӥг гинэ пиез — Валерий Иванович. Тӥ соин пумиськылӥды-а?

— Вань улытозям — ог 5 пол гинэ. Валерий Иванович Лина апайлэн быдэсмымтэ чагыр малпанэз кадь вал. Солэн туж потэ вал, пиез наукае мед мыноз шуыса. Бӧрысь Лина апай серемпыр мыным но шуылӥз: «Учёным можешь ты не быть, но кандидатом быть обязан…» Валера йылпумъяз Казаньысь университетэз, гидрогеофизик луиз. Распределениея сое келязы туж кыдёке — Дальний Востоке. Отын со научно-исследовательской институтын ужаз, диссертацизэ но дасяз, но утьыса ӧз вутты. Валерий Иванович быдэс дуннеысь зарезьёстӥ, океанъёстӥ наукая эскеронъёсын вырись корабльын уяз, зарезь пыдэсэз эскериз. Атаез кадь ик, со бадӟым мугоро вал, туж тунсыко мадьылӥз пӧртэм кунъёсы вуылэмзэ — Индия, Австралия… Лина апае но, Иван Иванович но туж мӧзмылӥзы пизылэсь, гожтэтъёссэ возьмаллязы, огкутскемен кӧня ке пол лыдӟылӥзы. Пиезлэсь мӧзмеменыз ик, дыр, Лина апаймы сюлэм шунытсэ мыным но Люда апаелы сётэ вал.

Школаын дышетскыкум, ми туж начар улӥмы, атаймы-юрттӥсьмы ӧй вал, дӥськутэ — кышъет вылын кышъет. Пионер галстукам гинэ но азяз ик пась, туж возьдаськылӥ. Анае Валерий Ивановичез ёртылӥз: мурт кунъёсысь кыӵе ке салам коть вай… Вайиз кешыр выллем нап-ӵуж свитер. Мон сое сыӵе кема нуллӥ — школаын гинэ ӧвӧл, студент дыръям но ай. Валерий Ивановичлэн одӥг гинэ нылыз — Лариса. Сое мынам воксё адӟеме ӧвӧл, но кылылӥ, Владивостокысь журфаке дышетскыны пырылӥз шуыса…

 

— А. Оки улонысь кошкиз 1973-тӥ арын. Сое ватэмзэс тодӥськоды на-а?

— Лина Григорьевна кылле ни вал. Мон Москвае аспирантурае кошки. 2 нунал ортчыса, со кулэм. Но мыным номыр ӧз ивортэ, экзаменъёсме мед сётом шуизы, лэся. Тодэме бере туж лекъяськи, озьы Лина апайме берпуметӥ сюрес вылаз келятэк кыли.

Лина Григорьевна туж трос тамак кыскылӥз. Фронтын кыскыны дышем но нокызьы та урод сямлэсь куштӥськыны ӧз быгаты. Соос Иван Ивановичен ӵош доразы ик кыско вал. Куштӥськыны ӵошен ик выризы, ог-огзэс чакласа улӥзы, но ӧз пӧрмытэ. Улытозям мынам соослэсь гинэ сомында сигаретсэс адӟеме вань: вылысь ӝажыын блокъёсын-блокъёсын «Беломор» кыллиз. Но кулон азяз Лина Григорьевна сокем лябӟиз, кыскыны воксё ӧз ни лэзе. Туж курадӟиз.

Лина апаймы кулэм бере Иван Иванович воштӥськиз, табере со «Иван — большая голова» ӧй вал ни, востэммиз, понназгес луиз, кузпалыз сярысь тодэ ваёнъёссэ «Алнаш колхозник» газетэ арнялы быдэ сямен гожъяз.

— Тӥ Лина апайдылэсь осконъёссэ быдэстӥды кадь-а?

— Шуг вераны… 1977-тӥ арын мон Москваын аспирантураез йылпумъяй, эшшо ар ортчыса, диссертациме ути, химия наукаосъя кандидат луи. Туж потылӥз Москвае ик кылеме, отын наукаен вырыны луонлыкъёс тросгес вал. Но Ижын — кузпалы, пичи пие. Удмурт кун университетын ужаны кутски. Кузпалы — Владимир улосысь, Удмуртие распределениея вуэмын — 41 номеро школаын тыршиз. Али но отын ик ужа.

Аспирантураын.

1982-тӥ арын Венгриысь Дебрецен карысь университетэ стажировкае шеди. Отын ар ӵоже ужай. Химиен вырем сяна, венгеръёсты ӟуч кыллы дышетӥ. Отысен ик тодматски кылэз но литератураез эскерись венгер тодосчиосын. Макем пайми, соос А. Оки кылбурчиез тодо шуыса! Венгер кылбурчи Шандор Каняди мыным Окилы сӥзем поэмазэ лыдӟиз. Тодматским Будапешт университетысь тодосчиен Петер Домокошен но, со удмурт литературалы сӥзем бадӟым книга дасяз. Мон А. Окилэн ӵыжы-выжыез шуыса тодэмез бере туж шумпотӥз. Озьы кунгож сьӧрын, дыр, мон нырысьсэ валай, макем бадӟым адями вал Лина апаймы. Макем ми, солэн ӵыжы-выжыосыз, шудо луыны кулэ, сое тодӥм, со вӧзын улӥм шуыса. Шаерамы бертэме бере но та мылкыды бугыръямысь ӧз дугды: выжыме мургес эскероно кариськи, но… нош ик нуналмысь уж — лекциос, занятиос, стройотрядъёсын вырон, общественной уж. Архивъёсын пуконэз берлолы кельтоно луиз.

Студент дырысеным мон общественник вал, комсомолысь активист, стройотрядъёсын потан стаже гинэ 10 ар люкаськиз! Африкаын улыкум гинэ но, мон отысь партячейкамылэн секретарезлэн воштӥсез вал.

— Африка? Ма тӥледыз сокеме вуттӥзы?

— Интыям пукыны чидасьтэм мылкыды, географиен тунсыкъяськеме. Москваысь университетэ вуылыкум, кельтӥ резюмеме, кыӵе ке кунэ мынэме, кыӵе ке кунсьӧр кылэз мургес дышетэме потэ шуыса. Португалие ӧтизы. Ӝыны ар ӵоже отын португал кылэз дышетэммы бере группамес кыклы люкизы: огъёсыз, пе, Анголае мынозы, мукетъёсыз — Мозамбике. Отын но татын но кун кылзы — португал кыл. Мон быдэс семьяеным Мозамбике кошки. Отын 3 ар ӵоже улӥм, Мапуту городысь университетын студентъёсты химилы дышетӥ, посольствоысь пиналъёсын ӵошатсконъёс радъяллям, волейбол, теннис… Тунсыко но туж шудо вакыт вал. Россие бертӥмы 1990-тӥ арын.

— О-о, со вал, дыр, инмысь музъем вылэ усем кадь, со вакытэ Россиын туж секыт вакытъёс кутскизы…

— Озьы. Африкае кошкыкум, ваньзы серекъязы: ну, узырмыса бертод ин. Бен, шуисько, ужало, коньдон потто. Нош бертӥ но… мынам дышетэм комсомолецъёсы ужбергатӥсьёс луиллям ни, нош милям 3 ар ӵоже ужаса поттэм уксёмы одӥгаз банке кугӟаз. 2 ар ӵоже собере со коньдонэз поттыны выри. Ужаны нош ик УдГУ-ысь химияя кафедраын кутски.

— Нош профсоюзэ кыӵе тӧлъёс вуттӥзы?

— Африкаысь бертэме берегес ик шеди университетысь профсоюзлэн кенешаз. Шӧдтэк шорысь монэ профкоме дэмлазы, нош 1991-тӥ арын УдГУ-ысь профкомен кивалтӥсе бырйизы. 1990-тӥ аръёсы ужась адямиез гажамысь дугдӥзы, правооссэ отын но татын но тӥяло. Мон та шоры учкыса улыны ӧй чидалля. Соин но, дыр, республикаысьтымы дышетон удысын ужасьёслэн профсоюзазы дэмлазы. 2005-тӥ арысен ни та огазеяськонэн кивалтӥсько. Али тужгес бадӟым сюлэмшуге: вылӥ школаын ужасьёслэн уждунъёссы туж пичиесь. Озьы асьмеос наукаез ум ӝутэ. Профсоюзъёслэн кужымзы вань ик, кин ке властьлы вераны, возьматыны кулэ ук дышетон удысын ужасьёслэсь сюлмаськонъёссэс. Тани, шуом, дышетӥсьёслэсь уждунзэс будэтӥзы. Кин ке шуоз, мар отын профсоюзлэн ужез? Но ӵапак ми — профсоюз — та ужпумез ӝутӥмы ук.

— Нош химиен яке географиен выриськоды на-а?

— Уг. Но ужме пие азинтэ, со геофизик, «Роснефть» огазеяськонлэн Москваысь валтӥсь офисаз ужа. Нылы но Москваын ик улэ, кузпалыныз ӵош пичи огазеяськон кылдытӥзы, пӧртэм ужрадъёс ортчытъяло. Бадӟымез внуке студент ини, покчиезлы 2 арес ай. Соос тодо, кин со сыӵе Лина апай, одӥгез внуке али Москваысь школаын А. Оки сярысь сочинение гожъяз, ваньзы паймизы. Нош ачим мон туж жалясько, ас вакытаз ӧй валалля ас шудме, сыӵе бадӟым адями вӧзын улэмме. Тодысал ке, тросгес юалляськысал, вераськысал, дыр.

— Лина апайдылэн кыӵе кылбурез тужгес но сюлэмдыя?

— Та бадӟым городын

Югытэсь уйёсын

Оломарлы уг лу

Ӝыт умме усеме…

(«Та бадӟым городын»)

Быдэс улонме пӧртэм городъёсын ортчытӥ ке но, пушкам шыпыт инкуазьлэсь мӧзмонэ улэ, лэся.

Елена МИННИГАРАЕВА

Удмурт Дунне
By Удмурт Дунне Апрель 23, 2018 15:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<