«Удмурт Кенеш»: Ашальчи Оки нимо премиен пусъемын Анна Евсеева но Галина Шушакова

Удмурт Дунне
By Удмурт Дунне Апрель 16, 2018 16:00

1994-тӥ арысен кутскыса, «Удмурт Кенеш» огазеяськон йӧно, визьмо, адӟем карымон, удмурт кылэз но культураез азинтӥсь, общественной уже пыриськись нылкышноосты арлы быдэ Ашальчи Оки нимо премиен пусъе. Тодмо луизы 2017-тӥ ар понна лауреатъёслэн нимъёссы. Соосты данъялозы Ашальчи лыдӟонъёсын 4-тӥ апреле.

Кинлы сётоно премиез, эскере «Удмурт Кенеш» огазеяськонлэн йӧскалык премиосъя нимысьтыз комиссиез. Ашальчи Оки нимо премилы туэ 5 куриськонъёс вуизы. Ваньзэ рос-прос учкемзы бере дунъясьёс огкылэ вуизы: кылем ар понна премиез сётоно Анна Яковлевна Евсеевалы но Галина Николаевна Шушаковалы. Соос кыкназы но, сюлэмзэс поныса, быдэсто ас ужзэс, тыршо удмуртлыкез азинтон бордын.

Анна ЕВСЕЕВА — Удмуртиысь культура удысысь дано ужась, Россиысь Журналистъёслэн огазеяськонзылэн ёзчиез.

Анна Яковлевна йылпумъяз Удмурт пединститутэз. Тыршиз шаерысьтымы школаосын, Удмурт радиоын диктор вал. Кема аръёс ӵоже культпросвет-училищеын дышетӥз.

1993-тӥ арын Анна Яковлевна Удмурт театре выже, отын театр улонлэсь пуштроссэ зол узырмытэ. Ужаны кутске театрлэн репертуарез бордын, люка кулэ луись литература, герӟаське писательёсын, удмурт драматургъёсын, кусып юнматэ творческой огазеяськонъёсын. Театрлэсь историзэ со кадь умой нокин уг тоды, дыр: Анна Яковлевна люказ уно туспуктэмъёс, театрын ужасьёслэсь тодэ ваёнъёссэс… А. Евсеева дасяз но поттӥз книгаос: «Память сердца», «С любовью к театру», «Из сокровищницы души». Солэн тыршеменыз, театрлэн фойеяз усьяськизы пӧртэм адӟытонъёс. Анна Яковлевна, пенсиын ни ке но, али но гожъяське журналъёсы но газетъёсы, вераськылэ радиоын но телевидениын. Со сайкыт визьмо, сэзь, капчи мылкыдо, котькуд ужзэ пумозяз вуттыны тыршись кышномурт.

А. Евсеева пусъемын «Ужысь ветеран» нимын, УАССР-ысь Верховной Советлэн Президиумезлэн, Удмуртиысь Кун Кенешлэн, Удмурт театрлэн Данъян грамотаосынызы но мукет данъетъёсын.

Галина ШУШАКОВА — филология наукаосъя кандидат, доцент.

Удмурт кун университетысь филология факультетэз йылпумъямез бере Галина Николаевна удмурт литературая кафедраын ассистент луыса ужаны кутске. Бӧрысь Москваысь Ломоносов нимо кун университетысь аспирантураез йылпумъя, удмурт выжыкылъёсъя кандидат ужзэ уте.

1992-тӥ арын Г. Шушакова Удмурт кун университетысь удмурт кылосбуръя факультетлэн нырысетӥ деканэз луэ. Со кивалтон вакытэ факультетын 2 выль кафедраос кылдытэмын вал.

Галина Николаевна — фольклорист. Солэн эскеронъёсыз сӥземын удмурт калык прозалы, выжыкылъёслы, мифологилы. Удмурт кун университетысь удмурт литературая но Россиысь калыкъёслэн литератураоссыя кафедраысь доцент дышетон удысын 30 арлэсь кема тырше ини, трос дышетӥсьёсты будэтӥз.

Озьы ик трос аръёс ӵоже мыло-кыдо пыриське национальной движение, пӧртэм проектъёсын выре.

Галина Николаевна бырйылэмын «Удмурт нылкышно кенеше», 2000-тӥ-2004-тӥ аръёсы «Удмурт Кенешлэн» вице-президентэз вал, кивалтӥз огазеяськонлэн лекторской группаеныз, гуртъёсын тунсыко лекциос радъялляз.

Галина Николаевна калыкез бордаз кыскыны быгатэ, со висъяське мур малпаськись, котьку юрттыны дась луэменыз, визь-кенешез котьку иназ.

Алёна Михайлова

Удмурт Дунне
By Удмурт Дунне Апрель 16, 2018 16:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<