Тӧр шорын: Военный Евгений Галасеев Чернобыльысь атомной станцилэсь пуштэм бервылзэ утялтыны ветлӥз

Удмурт Дунне
By Удмурт Дунне Апрель 28, 2018 14:30

Евгений Леонидович Галасеев — отставкаысь полковник, Удмуртиысь военной комиссарлэн ветеранъёсын ужанъя воштӥсез. Удмурт воргорон 33 ар военной вал. Чернобыльысь атомной станцилэсь пуштэм бервылзэ утялтонэ вуылӥз, со понна Мужество орденэн пусъемын. Танкъёслы пумит ракетаосты эскеронэ пыриськемез «За боевые заслуги» медален данъямын, оборона удысын кема аръёс ӵоже ужамез пусъемын «За трудовую доблесть» медален. Гадь тыраз кисьтасько 1-тӥ, 2-тӥ, 3-тӥ степенё «За безупречную службу», «За добрые помыслы и дела» но трос мукет гадьпусъёс.

Евгений Леонидович Галасеев 33 ар военной вал.

Улонзэ воштӥз учыр

— Вордӥськи мон огшоры крестьян семьяын, мыным арес пала вал — Якшур-Бӧдья ёросысь Мукши гуртысь лыктӥмы улыны артысь Шаркан ёросысь Суронэ (Урдогуртэ), — шуэ Евгений Леонидович. — Анае быдэс улонзэ скал кыскись луыса ужаз. Атайме уг тодӥськы, монэ сюратае будэтӥз. Зэм, со мынам атае ӧвӧл шуыса, тодӥ 8-тӥ класс бере гинэ, аттестатам атай нимме Алексеевич интые Леонидович пуктэмзы бере. Сюратае колхозын тракторист вал. Мон семьяямы бадӟымез пинал (мон бӧрсьы эшшо 2 пи но 2 ныл вордӥськизы на), соин пичиысен гурт котырысь ужлы дыши, сузэр-вынъёсты возьман но мон вылэ усиз. Анаелы фермае юрттыны тубасько вал, со ик луиз скал кыскыны дышеме. 3-тӥ классысен скал возьманы ветлӥ, нош 5-тӥ классысен бадӟымъёсын артэ колхоз бусыын тырши. Огпол гуртысь пияшъёс вал борды думон корт мажесэз котыртӥллям, кызьы сое тупатоно шуыса, йырзэс тӥяло. Мон адӟисько, одӥг интызэ гинэ думыны кулэ — сварщикмы доры нуи. Колхозысь председатель паймиз, тӥяськем мае ке тупатыны быгатӥмы шуыса, со монэ пияшъёс пӧлын старшой кариз.

Суронын 8 классъем школамы вал. Покчи классъёсын дышетскыкум ай, манту пуктӥзы, волейболэн шудэм берам со олома быдӟа пыктӥз. Монэ санаторие келязы. Чылкак таза муртэ толэзь но ӝыны возизы, сомында укол пуктылӥзы. Ӵапак отын умой-умой уяны кутски, городкиен, шахматэн, шашкиен шудыны дыши. Бӧрысь шахматэн тодматӥ гуртысь эшъёсме но. Суронын куспамы турниръёс ортчытъяськомы вал, ми доры дышетскыны вуылӥзы матысь гуртъёсысь пиналъёс но. Сурон школаез туж шунытэн тодам вайисько, милемды дышетӥзы Быдӟым ож пыр ортчем воргоронъёс — директор Николай Николаевич Олин, завуч Тит Семёнович Перевозчиков. Гужемлы быдэ мон школа котырын ужалляй, вуж коркаосты сэрттыса, интернат пуктӥмы. Одӥг гужемзэ толэзь куспын нырысьсэ 80 манет уждун сётӥзы. Анае нырысь ӧз оскы, ворай кожаз. Туж гажасько вал математикаен дышетӥсьмес Анна Алексеевна Перевозчиковаез. Солэн сомында тунсыко книгаосыз вал, мыным но сётъялляз. Быгатӥсько вал капчиен 2х2=5 примерез яке чибиньлэн но слонлэн быдӟалазы одӥг кадь шуыса задачаосты лэсьтыны, ӵош дышетскись эшъёсылэн синъёссы ик котырес луылӥзы.

Бадӟым классъёсын артысь гуртысь, Сосновкаысь, школаын дышетски. Со вакытэ семьяе Воткинск ёросысь Талицае улыны кошкиз, со Сосновкалэсь 55 иськемын. Арсентий Никандрович Пермяков, физикаен дышетӥсе, шуиз: Удмурт пединститутэ физик-математике мынод. Озьы ик луысал, дыр. Но огпол Талицае мумы-бубые доры бертыны потӥ Шаркан пыр. Нӧд, остановкаын автобус витьыса пукисько, нош со уг вуы. Дорам мотоциклэн пиосмурт дугдӥз, кытысь-марысь, кин луисько шуыса юанъёсын согиз. Пуксьы, шуэ, мон, пе, военной комиссар Ильиных, сьӧрам мынод. Военкоматэ вуттӥз. Азям «Красная звезда» газетлэсь подшивказэ понӥз, бырйы, пе, кыӵе военной училищее дышетскыны мынод. Тынэсьтыд, пе, танкист яке лётчик умой пӧрмысалзы. Ачиз ик ӵектӥз Челябинскысь танковой училищеез.

Физикаен дышетӥсе Арсентий Никандрович танкистэ дышетскыны мыно шуыса тодэмез бере лекомиз. Со монэ аслыз кивоштӥсь луо кожалляз ук. Мон тыныд физикаен «2» пукто, гуртын кыед поттыны кылёд, шуиз. Экзамен дыръя билет кутӥ гинэ, Арсентий Никандрович дасяськыны ӧз лэзьы, соку ик вераны косӥз. Вылысьтыз вылаз юанъёс сётъя, шокчыны но дыр ӧвӧл. Комиссиысь адямиос жаляны ӧдъязы ни монэ, адӟо ук, оценкаосы умоесь, али но уг ыштӥськиськы. Озьы ке но «4» пуктӥзы.

 

Котьку азьпалан

— Челябинскысь вылӥ танковой училищеын нырысетӥ аръёссэ секыт вал ке но, умой дышетски. Школаын спортэз яратӥсько вал бере, татын со мыным зол юрттӥз. Эшъёсы 50 иськем бызьыло, нош монэ командирмы нарядэ кельтэ. Угось со тодэ вал, иськемъёс монэ уг кышкато: школаын дышетскыкум, велосипедэн, пыдын, куас вылын 55 иськем анай-атае доры бертылӥ. Огпол курсантъёс куспын ӵошатсконъёс ортчизы — 10 иськем бызёно вал. Эшъёсы матысь гуртэ кожиллям, отын сюан вылэм, соосты секталлям, мон огнам финишозь вуи.

Училищеын самбоен нюръяськоно луи. Ӵошатсконъёслэсь азьвыл та спорт амал сярысь веразы, приёмъёсты возьматӥзы. Мынэсьтым секытгес муртъёс пӧлын нюръяськоно вал. Секталае мед тупалоз шуыса, ӵошатскон азьын бутылка ву юи. Тушмонэ — мастере кандидат, трос пол чемпион. Со монэ, гуртын будэм пияшез, погыртэ, но возьыны уг быгаты вал.

Москваысь бронетанковой академиын дышетскыкум но, спортлэсь ӧй куштӥськылы. Огпол курсъёс куспын ӵошатсконъёс ортчизы. Ӵуказеяз куас вылэ султоно ни, нош мыным со сярысь туннэ гинэ веразы. 4 мурт быдэн 10 иськем бызимы, мон — берпуметӥ этапын. Эше 3-тӥ вуиз, ну, малпасько, интыме возёно. Бызисько, одӥгзэ кельтӥ, финиш азьынгес ик эшшо одӥгзэ азьпалтӥ. Командамы нырысетӥ вуиз. Мукет курсъёс, палэнысь муртэз кутӥды шуыса, кесяськыны ӧдъязы. 300 мурт азьын возьматоно луи, куасэн бызьылыны быгатӥсько шуыса. Дышетски но умой — Москваысь академиез горд дипломен йылпумъяй.

Будон сюрес

— Челябинскын дышетскеме бере монэ Чехословакие келязы. Отын 2 ар танковой взводлэн командирез вал, эшшо 3 ар ротаен кивалтӥ. Бурд улам 19 удмуртъёс шедизы. Мукет командиръёс, кытысь луэмзэс тодыса, соосты меӵак мон доры келяллям. Удмуртъёсын капчи вал, соос приказъёсты мыло-кыдо быдэсъяло. Зэм, землякъёсын кема ӵош улыны ӧз кылды. Москваысь эскерисьёслы тодмо луиз, одӥг ротаын сомында удмуртъёс люкамын шуыса. Национальной рота кылдытӥськод шуыса, котырме зол лайизы соку, удмуртъёсме пӧртэм интыосы келязы.

Роталэн командирез (Чебаркульын).

Чехословакиысь Чебаркуле вуи, отын роталэн командирез но танковой батальонлэн штабезлэн кивалтӥсез вал. Выль техникаез эскеримы — танкъёслы пумит ракетаосты (ПТУР). Та понна «За боевые заслуги» медаль сётӥзы.

Бӧрысь службае Киевысь военной округын ортчиз, отын полкен кивалтӥ ини. 1980-тӥ аръёсы, али дыръя кадь ик, танковой биатлонъёс ортчылӥзы. Мынам ротае округамы тужгес устоез вал. Соку куронъёс трослы чурытэсьгес вал, ыбыны кӧня ке секунд гинэ сётӥськиз, ыбылӥмы «ветлӥсь» мишеньёсы. Али ортчылӥсь ӵошатсконъёсты учкыны кӧты уг веська, командаос урод дасямын, куд-ог дыръя вырӟылӥсьтэм мишене но уг йӧтто. Монэ алигес таӵе ӵошатсконлы экипажъёсты дасяны ӧтё вал, но пумит кариськи, арлыды бадӟым ни, командировка но толэзьлэсь кема шуыса.

Армия сямме кыдатӥз, татын янгышлэсь, сётэм кыллэсь дунзэ валай. Ачид понна сяна, солдатъёс понна но кыл кутоно угось. Армия ик дышетӥз ӝог но шонер малпаськыны. Одӥг пол документъёс бордын ужасько вал, дорам куалектэм майор пыриз, чиньыеныз укно шоры возьматэ. Армян но азербайджан солдатъёс ваче вуиллям. Соку Нагорный Карабахын пуромем ожмаськонлэн бервылыз шӧдӥське на вал. Быдэн 70 солдатъёс мыжгасько. Омыре ыбыса гинэ, толыкез уз луы, малпай. Ыби музъем шоры, пуляе изъёсы йӧтыса, тылгизьыос ик потӥзы. Урмем пиос буйгазы, со куспын караул вуиз.

Чернобыль

— Чернобыльысь атомной станция пуштӥз шуыса, тодӥмы телеграмма пыр ӵуказеяз гинэ. Соку мон Киевской военной округысь Гончаровск город котырын службаме нуи. 1986-тӥ арын 28-тӥ апреле мон Чернобыльын вал ини. Вертолётэн Припять городысь гостиница доры вуттӥзы, атомной станция солэсь 2 иськемын гинэ вал. Котыр БТР-ёс жур-р гинэ ортчыло, нош пыдын ветлӥсьёс ӧвӧл. Вертолётын лётчикен пукиськом, кызьы дӥсяськыса потыны ум валаське. Противогазъёсмы но респираторъёсмы вань ке но, тодӥськомы, соос тузонлэсь гинэ юрттозы, нош омыр кышкыт суретъёсын тырмемын. Я, тани гостиницаысь адямиос потӥзы: огшоры дӥсен, тыбыр сьӧразы противогазъёс ошиськемын. Соку ми но вертолётысь потӥмы.

Чернобыле ветлэмъёсты буре ваён.

Гостиницалэн липет йылаз командной пункт усьтӥмы. Мынам командае вертолётъёсын кивалтӥз. Бадӟым машинаос ӝуась интыез сюен, свинецлэсь 60-80 килограммъем изъёсын ӵоксаллязы. Нырысетӥ нуналъёсы солдатъёслэн кӧттыронзы колбаса, огреч но ӝыны стакан аракы вал, бӧрысь пӧсь сиён сётъяны ӧдъязы.

Реактор пуштэм бере городысь но 30 иськем котыр гуртъёсысь калыкез поттӥзы. Ми, гуртъёсын адямиос медаз кыле шуыса, инмысен чакламы. Соку ӵапак мерттӥськон вакыт вал. Вылӥысен адӟиськомы: калык картошка, кубиста мерттэ. Милесьтым пуксеммес адӟыса, кин кытчы пазьгиськылӥзы, тӥрлыксэс ик куштыса кельтылӥзы. Коркаоссы пытсаллямын, улӥсез ик вань уд шуы, гидъёссы, кеносъёссы бушесь. Одӥг гуысь 3 муртэ шедьтӥмы — шымырскыса пуко. Кошкемзы уг поты, пыкисько, мырдэм сьӧрамы нуимы. Кошкеммы бере адямиос ватӥськем интыосысьтызы выльысь бакчаосазы поталлязы. Соос ӧз валаллялэ, макем кышкыт югдур котыразы кылдӥз.

Припятез но БТР-ен дырын-дырын котыръяллям. Сюл кадь кузь ульчаос, котыр одӥг лул но ӧвӧл, кут но уг бызгеты кадь, зэм, коӵыш яке пуны пумитамы шедьылӥзы ик. Шӧдске, адямиос дыртыса кошкылӥллям: укнооссы, ӧсъёссы пытсатэк кылемын. Быдэс вылтыр юзыр-кезьыр луылӥз, пельтӥсь тӧллэсь ӧсъёс ӟикыр-р-р, ӟукыр-р-р ваземысь, нылпи площадкаысь њечыретъёс лэйканы ӧдъямысь.

Но Чернобыльын кема ӧй улы, выльысь частям берыктӥськыны куризы.

Погон сётон

Германия

— 1989-тӥ арын Германие полкен кивалтыны ыстӥзы. Соку татын огыр-бугыр вал: ФРГ но ГДР огазеяськон вакыт. Полкмы Мейсен город дорын сылӥз. Отын ми окопъёс гудылӥмы, ыбылӥськон башняос ӝутъямы. Огпол мон доры куронэн лыктӥз Мейсен городлэн бургомистрез. Пызьзы 2 нуналлы гинэ кылем, нош юрттэт, 5 нунал ортчыса гинэ, вуоз, пе. Милемлы городысь калыкен кусып возьыны уг яра вал ке но, кызьы та учыре уд юртты. Ми соослы 7 нуналлы окмымон пызь сётӥм. Озьы немецъёсты сютэм улонлэсь утимы, шуыны луоз, быдэс арня соос асьме пызенымы нянь пыжизы. Бӧрысь ваньзэ берыктӥзы. Кӧня ке ортчыса, мэриысь эшшо жингыртӥзы на. Милям, пе, 12 тонна куштыны дасям канфетмы вань, кулэ ӧвӧл-а? Офицеръёсты учкыны келяй. Огшоры канфет вылэм, кӧня ке гинэ нелькиськемын. Шумпотыса частямы вайимы. Бӧрысь эшшо вуттӥзы на 12 тонна чечы но 2 бадӟым машина банан. Немецъёслэн сиён-юонлы куронъёссы туж вылӥын, бананлэн, кылсярысь, 1-2 сьӧд виштыез кылдӥз ке, куштоно ни. Нош со понна милемлы кыӵе удалтӥз. Солдатъёсмес нуналаз 2 пол быдэн 2 бананэн сюдӥм.

Дор палъёсын

— Тырмоз ни пӧртэм интыостӥ кыстаськыны шуыса, Германия бере куриськи дор палъёсам. Ижысь Индустриальной ёрослэн военной комиссарез луыса 10 ар ужай. Та вакыт куспын ичизэ 15 пияшез кышнояськытӥ (серекъя). Вуоно солдатъёс дорам, отсрочка курыса, лыктылӥзы, яратоно нылаше нылпи возьма шуыса. Нош эскериськод но, браксы ӧвӧл. Озьы загсэ мыноно луылӥзы. Кӧня нылашъёс тау карыса вазиськылӥзы бӧрысь!

Эшшо одӥг учырез тодам вайисько. Одӥг пияш армилэсь пегӟон понна 4 ар ӵоже ялан кыӵе ке мугъёс шедьтылӥз. Ну, малпасько, табере мон тонэ кырмо, сурон сапег дӥсялод ни. Нош со мон доры вуэ: кышнояськи, пе, 82 аресъем кышномуртэн, армие мыныны уг быгатӥськы — кышноелы утялтӥсь кулэ.

Ижын Танкистлэсь нуналзэ пусъён ужрадын.

Мон кичӧлтонэн потӥ армие келянэ баӵкоосты ӧтчалляны. Призывной пунктын али часовня нерге но усьтэмын. Табере отын пияшъёслэн вӧсяськыны, пылатӥськыны луонлыксы вань. Ог 10 ар кивалтӥ Военно-мемориальной компанилэн Удмуртиысь филиалэныз. Атыкай музъемез утисьёслы, ожмаськонэ пыриськемъёслы синпелетъёс пуктылӥмы. 2010-тӥ арын Удмуртиын Россиысь армилэн ветеранъёсызлэсь ёззэ кылдытӥ, та дырозь соин кивалтӥсько. Пӧсь интыосы ветлэм адямиосты, оборона удысысь ветеранъёсты ум вунэтӥське, соос понна пӧртэм ужрадъёс ортчытъяськом, санаторийёсын тазалыксэс тупатыны луонлык сётӥськом. Ветеранъёсын ужаммес вылӥ дунъяло, 2015-тӥ арын милям ёзмы Россиын 3-тӥ инты басьтӥз. Нош монэ Россилэн обороная министрез С. Шойгу «За трудовую доблесть» медален данъяз.

Ужея пӧртэм улосъёсы потасько. Котькуд городын одӥг ке но тодмо муртэз пумиталод — армия быдэс Россиысь эшъёс шедьтыны юрттӥз.

Кузпалыным Челябинскын тодматскимы. Тодӥськем, кинэ бырйыны (серекъя) — со мынам пӧраськись. Гажанэ котьку монэ тыро ӝӧк вылэн пумиталляз. Тау Серафима Сергеевнаелы, со котьку монэн артэ вал — пӧртэм гарнизонъёстӥ, частьёстӥ кӧня кыстаським. Таиз улон интымы 17-тӥез луиз ни. Нырысетӥ нылпимы Прагаын вордӥськиз, кыкетӥез — Чебаркульын. Пимы аслам пытьыетӥм ик вамыштӥз — военной, али запасысь полковник ини. Нылмы юристлы дышетскиз, та удысъя ик ужа. Пиналъёсмы Ижын ик уло, табере соослэн нылпиоссы милемыз шумпотто ини.

Ангелина Снигирёва
Туспуктэмъёсыз геройлэн

Удмурт Дунне
By Удмурт Дунне Апрель 28, 2018 14:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<