Шаерамы усьтӥськиз Можга ёросысь литературалы сӥзем арез

Удмурт Дунне
By Удмурт Дунне Апрель 5, 2018 11:30

Можга пал литератураен тодматскон.

Удмуртилэн литературая шоркарез туэ луиз Можга ёрос. Талы сӥзем сӥё-дано ужрад ортчиз 30-тӥ южтолэзе Ижысь Эшъяськон юртын.

Ёросъёслэн литератураоссы сӥзем нуналъёсты ортчытъян борды басьтӥськиз Йӧскалык библиотека, Культурая но туризмъя министерство, «Удмурт Кенеш» огазеяськон, муниципал кылдытэтъёслэн администрациоссы юрттэмен. 2017-тӥ ар сӥземын вал Алнаш ёрос литературалы. Можгаослы сӥзем арез усьтыса, Йӧскалык библиотекаен кивалтӥсь Татьяна Тенсина пусйиз, кылем арын ужрадъёсы 15 сюрс пала адями пыриськиз. Шаерысьтымы пӧртэм библиотекаосын ортчытэмын 500-лэсь ятыр пумиськонъёс.

Удмурт Элькунысь Общественной палатаен кивалтӥсь, Можга пи Павел Вершинин верамъя, ас культурадэ, кылдэ вунэтон лябӟытэ. Муниципал кылдытэтъёсын валче радъям та проект юрттоз вордскем музъемдэ тодыны но дунъяны. Можга ёросысь Депутатъёслэн Кенешсылэн тӧроез Галина Королькова шуиз: кидыс луиз ке, пушъетъёс но ӟечесь луозы, нош можгаос выль нимъёсын шумпотто ни.

Кызьпу туйлэсь книга дасяз Можга ёросысь землячество, кивалтӥсез — «Ижторгметалл» огазеяськонлэн валтӥсь директорез Олег Журавлёв.

Филология наукаосъя кандидат, Дышетон удысысь йӧскалык ужпумъёсты эскеронъя институтысь наукая валтӥсь ужась Вера Пантелеева люкаськемъёсты тодматӥз Можга ёросысь писательёсын, пусйиз соослэсь аспӧртэмлыко .луэмзэс. Пӧлазы Трофим Архипов, Михаил Коновалов, Михаил Покчи-Петров, Игнатий Гаврилов, Александр Белоногов, Даниил Яшин, Анатолий Григорьев, Юлия Байсарова, Татьяна Чернова, Владимир Михайлов но трос мукетъёсыз. Можга озьы ик данъяське Т. Борисов нимо педагогикая колледжен, шаерысьтымы тросэзлы писательёслы со литература удысэ вамыштон бурдъёс кузьмаз. Туэ та колледжлы тырме 100 ар. Юбилееныз валче ӝытын данъязы на Владимир Владыкинэз, Удмуртлэсь дано гражданинзэ, Можгаын вордӥськем тодосчиез но кылбурчиез.

Ӝытын чузъяськизы кылбуръёс но кырӟанъёс, возьматэмын видеосюжетъёс. Лыктэм калыклэсь мылкыдзэ бурдъяз ёросысь «Вить Сергейёс» ансамбль. Люкаськемъёсты возьмазы писательёслы сӥзем адӟытон, Можгаысь чеберлыко киужъёсъя центрысь кибашлыослэн ужъёссы.

Ар ӵоже ортчозы пӧртэм ужрадъёс, писательёсын пумиськонъёс, конкурсъёс. Ёросъёсысь литератураослы сӥзем проектлэн киысь кие вошъяськись пусэз — пулэсь вӧлэм визьнодо песятай. Солэн кияз кызьпу туйлэсь книга. Таӵе кузьым проектэз радъясьёслы дасяз Можга ёросысь землячество, кивалтӥсез — «Ижторгметалл» огазеяськонлэн валтӥсь директорез Олег Журавлёв.

Лия МАЛЫХ

Туспуктэмъёс: Йӧсклаык библиотека

Удмурт Дунне
By Удмурт Дунне Апрель 5, 2018 11:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<