Паскаез пумитаны — Иерусалиме

Удмурт Дунне
By Удмурт Дунне Апрель 7, 2018 14:33

Та Святой музъем вылэ котькуд оскисьлэн одӥг пол ке но вуылэмез потэ. Уката но трос калык отчы лыктэ Быдӟымнал азьын. Паломник луыса Паскаез Иерусалимын 2 пол пумитаз ини Удмурт кун университетысь дышетӥсь Галина Шушакова но.

Иерусалимысь Троицкой собор.

— Котькуд адямилэн аслаз малпанэз, дыр, марлы со отчы мынэ. Мон черке ветлыны кутски бере, тодонме муромытон понна оскон, Иерусалим, отчы ветлэмъёс сярысь трос книга лыдӟыны ӧдъяй. Озьы усьтӥськиз отчы сюрес, — шуэ Галина Николаевна. — Тодӥськомы, та Святой музъем быдэс дуннеысь тужгес бадӟым религиосты — исламез, христианствоез но иудаизмез — огазея. Соин ик со трос калыкез бордаз кыске. Сое шӧдӥськод отысь музъем вылэ лёгиськем бере ик. Вань-а Инмар шуыса, отын юан чик уг кылды. Со вань! Со отын котькытын: омырын, музъем вылын, калык пӧлын!.. Калык но котькытын: кузь юбкаосын — православнойёс, туала дӥськутэн — католикъёс, озьы ик висъясько кышет шобретэн мусульманкаос, шляпаосын но пейсо йырсиосын иудей воргоронъёс.

Оскисьёс нырысь ик лыктыны тыршо Иисус Христослэн черкез доры, кытын со кортӵогамын вал но кытын кулэмысь улӟыса султӥз — Храм Гроба Господня нимаське. Арысь аре Паска азьын кӧснуналэ ӵапак отын кылдэ сутӥсьтэм, «благодатной» нимаськись тыл.

Татын вамышлы быдэ пумисько Библиын верам инты нимъёс: Голгофа (Иисусэз кортӵогам инты), Камень помазания (Иосиф отын Иисуслэсь мугорзэ ватыны дасяз), Елеон гурезь, Гефсимания. Нош ачиз храм люкемын 6 пӧртэм христиан черкъёсъя: греческой, православной, католической, армянской, сирийской, эфиопской но коптской люкетъёслы. Трос аръёс ӵоже та инты огвыллем улэ, но арлы быдэ марзэ ке тупатъяло, чеберъяло. Россия но революцилэсь азьло Святой музъемлы трос коньдон висъя вылэм: черкъёс, бадӟымесь юртъёс пуктылэм. Соос паломникъёслы кӧланы, сиськыны чакламын вылэм — со сярысь верало отысь вашкала суредъёс. Нош революция бере ваньзэ сое вузаллям. Иерусалимлэн шораз одӥг Троицкой храм гинэ кылем на — ӵапак со луэ православилэн центрез. Россиысь вуэмъёс Паскаез но пумитаны, мукет дыръя но вӧсяськыны отчы лыктыны тыршо.

— Кызьы асьме черкъёсын вӧсясько, отын но службаос озьы ик мыно. Но вань пӧртэмлыкез но, кылсярысь, удмуртарняе луэ Киросэн ветлон. Со понна нырысетӥ араз ми 2 час пала черодын сылӥмы: вераны луонтэм трос калык! Ваньмыз лыкто Киросэн Россиысь, Украинаысь, Эфиопиысь, Европа кунъёсысь… Пӧртэм кылъёсын вӧсяськем, кырӟам-чирдэм кылӥське, Иисус Христослэн Голгофае мынэм сюрестӥз адямиос ӝожомыса, ӧпкельыса, синвуаськыса дыртытэк вамышъяло…

Удмуртарняе ӝытаз но кӧснуналэ дасяськон мынэ «благодатной» тылэз пумитаны — черкын ӝуатӥське сутӥсьтэм, ӟеч мылкыд вайись тыл. Но со черке сюрыны туж ӧжытэз быгатэ, со понна нимысьтыз пропускъёс кулэ, но ми черклы туж матын сылӥмы. Ваньмыз бадӟым шумпотонэн, пальпотонэн тырме, шӧдӥськод кадь огъя калыклэсь мылкыдзэ. Кыӵе ке но валантэм ӟечлык пыре пушке.

Паскаез правосланой оскисьёсын ӵош ми пумитамы, уйин Троицкой соборын вӧсяськыса. Огкылын вераса, та вашкала музъем вылын туж трос тунсыкоез, учкымонэз, сюлэме пыӵасез, вунонтэмез. Отын мылкыд бурдъяське но, ӝожоме но — вераны луонтэм шумпотонэн тырме быдэс йырвизь но лулпуш.

Анастасия Гребина

Удмурт Дунне
By Удмурт Дунне Апрель 7, 2018 14:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<