«П. Чайковскийлэн дор палъёсаз» фестивальын — дирижёр Владимир Спиваков «Виртуозы Москвы» оркестреныз

Удмурт Дунне
By Удмурт Дунне 18 апреля, 2018 15:55
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«П. Чайковскийлэн дор палъёсаз» 61-тӥ фестиваль усьтӥськиз «Виртуозы Москвы» оркестрлэн концертэныз, соин кивалтэ но валтӥсь дирижёр луэ СССР-ысь калык артист Владимир Спиваков.

«П. Чайковскийлэн дор палъёсаз» 61-тӥ фестивалез усьтӥзы «Виртуозы Москвы» оркестр но А. Стычкина.

— Ӟечкыласько тӥледыз праздникен! Умой, «П. Чайковскийлэн дор палъёсаз» арысь аре вылӥегес но вылӥегес ӝутӥське шуыса, — концерт кутскыку, калыклы вазиськиз Удмуртилэн Тӧроез Александр Бречалов. — Шумпотымон, та фестивалез Владимир Спиваков кадь бадӟым адями но солэн быгатӥсь оркестрез усьто шуыса.

Концерт кутскиз В. Моцартлэн крезьгурез бордысен. Владимир Теодоровичлэн дирижёрской бодыез ӝутскиз но, быдэс зал тыр вӧлмиз дирижёрлэн мылкыдыз но оркестрлэн кужмыз. Уго Владимир Спиваков дирижировать каре… пыдчиньыйылъёсыныз гинэ но.

— Огпол концерт шудэмез бере дирижёр Евгений Светланов мыным шуэ, мон, пе, шӧдӥсько, пушкам Сергей Рахманинов композиторлэн лулыз улэ шуыса. Соку мон малпай: та шузимем-а, мар-а, — журналистъёсын пумиськылыкуз, шуиз Владимир Спиваков. — Собере мон валай: озьы ик вань, крезьгур тон пушкын улэ ке, озьы луэ.

— Нош тӥ пушкын кинлэн ке лулыз пуке-а? — юатэк уг чидаськы.

— Кинлэсь крезьгурзэ шудӥсько, солэн ик, дыр.

Концертлэн программаез туж тунсыко но со дыре ик малпаськытӥсь вал. Нырысетӥ отделенияз чузъяськиз В. Моцартлэн крезьгурез. Та быдӟым крезьгурчилэсь концертсэ шудэмез, пе, потӥз егит пианисткалэн Александра Стычкиналэн. Нырысетӥ отделенияз ӵапак со солистка вал. Александра — В. Спиваковлэн фондэзлэн стипендиантэз. Сыӵе егит арлыдаз кыӵе быгатыса шудэ! Сцена вылын ик пукизы солэн асъёзъёсыз — Удмуртиысь искусствоосъя школаосын дышетскись пиналъёс — егит пианисткалэн, оркестрлэн но дирижёрлэн шудэмзы шоры учкыса, мылкыдзы эшшо но бурдъяське. Кызьы вера Удмурт филармонилэн кивалтӥсез Алексей Фомин, жаляса верано, тросэз семьяос уг быгато та выллем дуно концертъёсы билетъёс басьтыны, соин ик арысь аре пиналъёс, вуоно музыкантъёс, тодмо коллективъёсын ӵош одӥг сцена вылын пуко.

— Мон ноку тазьы сцена вылын ӧй пукылы. Мыным удалтӥз: мон вань егит дыръям ветлылӥ Евгений Мравинскийлэн концертъёсаз но репетициосаз, — пичи дырзэ тодаз вае Владимир Спиваков. — Мынам пель сьӧрам али но оркестрезлэн куараез чузъяське на, сое уг луы вунэтыны.

Нош 12 аресказ Владимир Теодорович нырысьсэ кылэм П. Чайковскийлэсь «Евгений Онегин» операзэ. Тодӥськом, дыр ортчемъя одӥг гожтэм гурез ик пӧртэм манеръя шудыны луэ. Соин ик та операысь гуръёсты маэстро выльысен гожтэм, озьы, кызьы шудэ вал соосты ачиз П. Чайковский — матысь дыре диск потоз.

— Мон шедьтӥ П. Чайковскийлэсь ас киыныз гожъям нотаоссэ, отын гожтэмын, кызьы быдэстоно созэ яке тазэ интыез, — шуэ маэстро. — Тани учком одӥг интызэ, али сое шудо ӝутскем мылкыдын, нош П. Чайковский сое драма кадь шудоно шуэм вылэм.

«Виртуозы Москвы» оркестрлэн репертуараз кылдӥзы берло дыре Австриысь Йозеф Гайдн крезьгурчилэн ужъёсыз. Солэн «Люкиськон (прощальной) симфониеныз» ик йылпумъяськиз концерт. Шудэмъя музыкантъёс оген-оген сцена вылысь кошко, тылъёс кысо, сцена вылэ кыле на огназ дирижёр — Владимир Спиваков. Но крезьгур уг чалмы. Скрипкаен табере шудэ ачиз маэстро. Кызьы ачиз берло шуиз, та инструментэз со берло дыре туж шер кияз кутылэ ни. Озьыен, Удмуртиысь учкисьёслы та аспӧртэм кузьым луиз.

Симфония йылпумъяськиз, сцена вылын тём-тём луиз. Кызьы вера дано дирижёр, улон ӵоже ми ялан кинэн ке люкиськиськом, анай-атайёсмес вӧсь кариськом. Нош соос кошко ке… Концерт нуналэ, 17-тӥ оштолэзе, ӵапак кулэмъёсты буре ваён нунал вал.

Но эн малпалэ, концерт «Люкиськон симфониен» — мӧзмыт нотаен — йылпумъяськиз шуыса. Симфония йылпумъяськем бере калык кема дыр ӵоже оркестрез сцена вылысь ӧз лэзьы на. Озьы Москваысь куноос тодмо крезьгурчиослэсь кӧня ке вакчи ужъёссэс быдэстӥзы на.

Мария Векшина
Туспуктӥз Наталия Сметанина

Удмурт Дунне
By Удмурт Дунне 18 апреля, 2018 15:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<