Одӥг карын, вылбам улын. Кызьы Ижкарысь егитъёс туала литератураез азинто

Удмурт Дунне
By Удмурт Дунне Апрель 17, 2018 16:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

23-тӥ южтолэзе «ЛИФТ»-ын ортчиз «ПоэтUP» альманахлэн (18+) презентациез. Маин висъяське та книга? Одӥг вылбам улэ тэризы Удмуртиысь туала ӟуч но удмурт кылбурчиослэн ужъёссы. Мон малпамъя, лыдӟисьёс но, гожъяськисьёс но понна та бадӟым вамыш.

«ПоэтUP» альманахлэн презентациез дыръя. / Туспуктӥз Александр Шкляев.

2016-тӥ арын куартолэзе Ижын кылдӥз выль огин — Les Partisans театрысь егит артистъёс люкаськизы но «ПоэтUp» кылбурет штаб кылдытӥзы. Герман Суслов — штаблэн огез кылдытӥсез — верамъя, уж мытэмын вал Ижкарысь кылбуретэз калык пӧлы вӧлмытон, поэзилы тунсыксэ кенжытон понна. Ижын кылбурчиос вань, но кылбурет улон начаргес ик. Поэтъёс люкасько ке, ӵемысь асьсэдыз гинэ возьматэмзы потэ. Соин штаб кылбурчиосын пумиськонъёс, кылбур ӝытъёс радъялляны кутскиз. Со сяна, лекциос, кылбур ужпумъёсты сэрттон-пертчонъёс радъямын вал. Нырысь-валысь, Москваысь тодмооссылэсь адӟем карыса, ӝытъёсты баръёсын ортчытъязы, кылбуръёслы крезьгур инъет дасяллязы. Бӧрысь выжизы «Арт-резиденцие». Вотэсын вӧлмем ямсыз текстъёслы но графоманилы пумит султыса, «ПоэтUp» возьматыны тырше, туала вакытэ зэмос поэзия но вань шуыса.

Малпанзы кылдӥз: Ижысь туала гожъясьёслэн ужъёсынызы журнал поттыны кулэ. Кылбуретэз вотэсын вӧлмытон — умой, но, кызьы пусъе альманахлэн редколлегиезлэн ёзчиез Андрей Гоголев, туала вакытэ асьмелы уг тырмы гань-гань лыдӟиськон: тросэз али, телефонъёсазы книгаос кыскыса, лыдӟисько, нош со люкетэ текстэз мур валаны. Соин валче ик тросэзлы вотэс поэзия гинэ тодмо — нош со пушкын трос жуг-жаг. Онлайн дуннеысь кылбуръёсты поттоно — ӟечъёссэ бырйыса-печатласа лыдӟись доры вуттоно.

Озьыен, малпанзэс быдэстӥзы. Ваньзэ ас кужыменызы лэсьтӥзы (редактураез но, вёрсткаез но, корректураез но), ужазы дунтэк, нош книгаез печатланы коньдон люказы краудфандинг (веме) амалэн. Кылбуръёсты бырйиз юри кылдытэм редколлегия — «ПоэтUp»-лэн ёзчиосыз, филологъёс, кылбурчиос, критикъёс: Андрей Гоголев, Анастасия Максимова, Герман Суслов, Ксения Суслова, Татьяна Черкасова, Тимофей Спиркин. Ӝынызэ текстъёсты ӵектӥзы асьсэос кылбурчиос. Книгае пыризы Удмуртиысь 10 кылбурчиослэн ужъёссы — соос пӧлын 3 удмуртъёс: Богдан Анфиногенов, Анастасия Шумилова но Дарья Нестерова. Дарья удмурт кылын уг гожъяськы, но солэн кылбуръёсаз шӧдӥське удмурт выжыез:

Смотришь в себя, —

они без конца воюют.

Спорят за место,

под солнце хотят попасть.

Только один удмурт

без конца тоскует.

Молчит и тоскует.

Затем, что есть ему,

что сказать.

Богдан Анфиногенов, мон малпамъя, туала кылбурет жильыысь удмурт но ӟуч люкетъёссэ герӟась луэ. Солэсь кылбуръёссэ ӟучъёслы но лыдӟыны-кылзыны тунсыко — удмурт кылъёсты валатэк но, лыдӟись быгатэ огъя суредэз йылозяз-пумозяз вуттыны. Солэн кылбуретаз Ижысь 2 кылъёслэн валче улэмзы возьматэмын. Богдан Анфиногенов «ПоэтUp»-лэн кылдэмезлы туж шумпотэ. Кылбурчи пусъе: та огин пыр со тодматскиз туала выль ӟуч поэзиен:

— Мон уг быгатӥськы вераны, Ижысь ӟуч кылбурчиосын туж зол герӟаськемын шуыса. Но, мукет ласянь, мон пичияк-пичияк тодматскисько соослэн кылбуръёсынызы, али соос пӧлысь мыным золгес кельше Катька Растягаева, озьы ик СНОП8 кылбур группа туж кельшымон. Одно ик вераме потэ: мыным та туала кылбур ӧр туж кельше, мынам потэ соосын эшъяськеме, ужрадъёсы пыриськеме.

Кылпумысь, Богдан гинэ кылъёсты уг сура, шуом, Егор Завгородний ӟуч кылбурчилэн текстъёсаз но удмурт кыллы инты сюре:

Я вернулся в свой город,

знакомый до слёз.

Вот такие иворъёс.

Альманах луонлык сётэ умойгес валаны асьмемыз котыртӥсь дуннеез. Кылбур ачиз коже улыны быгатэ на ке, кылбуретлы кулэ омыр, герӟет. Кылбурчиос шокало интыен но возьмато сое кылбуръёсазы. Озьы кылдэ интылэн аслаз мифологиез, ымнырыз. Инты шоры творчество пыр ӧд ке учкы, со пурысь луэ, мукет интыослэсь номырин уг висъяськы. Соин но та альманахлэн потэмезлы шумпотоно — отын оглом Ижкарлэн тусыз чильпыра. Куд-огез кылбурчиос али мукет каръёсын уло ке но, кыдёкысен учкыса, вордскем палъёссылэсь мӧзмыса, соос кылдыто солэсь аспӧртэм туссэ. Кызьы пусъе редколлегия, «вераськон адямиез удмурт, Ижкарын улӥсь, Музъем вылын улӥсь каре. Нош кылбурет со вераськонэз радъя но узырмытэ».

Мон малпамъя, «ПоэтUp» эшшо одӥг туж бадӟым но туж кулэ ужез быдэстӥз: со герӟаз туала удмурт но ӟуч кылбуретъёсты, озьыен, кылдытӥз огъя пространство, кытын 2 кыллы ик инты вань, кытын соос уг нюръясько, тупаса уло:

Здесь всё так же — Кузебай,

Карлы Марксы

и трамвай…

(Егор Завгородний)

Мон ачим, «ПоэтUp»-лэн ужрадъёсаз ветлыса, мургес валай, маин улэ туала ӟуч поэзия, Ижкарысь ӟуч кылбурчиосын тодматски, огез яратоноез поэтэ али Марат Багаутдинов. Нош асме ӟуч кылбурчиосын оградын пуктэмзылы верантэм шумпотӥ. Альманахын кылбуръёсы удмурт но ӟуч кылъёсын, удмуртъёсыз чурен-чурен (подстрочный) берыктыса но чеберлыко (художественной) переводэн печатламын.

«ПоэтUp» ужзэ азинтыны малпа: ялӥзы ини, выль альманах потоз шуыса. Герман Суслов верамъя, тросэз лыдӟисьёс ӝожтӥськизы, нырысетӥ книгае соослэн яратоно кылбурчиоссы ӧз пыре шуыса. Кызьы пусъе Андрей Гоголев, «ПоэтUp», театрысь потэменыз, огъя команда кылдытыны быгатӥз. Соин оскиськом, ужзы азинскоз но Ижысь, Удмуртиысь кылбурет вӧлмоз, озьы ик удмурт но ӟуч литератураос куспын герӟет эшшо но юнгес луоз.

Анастасия Шумилова

Удмурт Дунне
By Удмурт Дунне Апрель 17, 2018 16:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<