Кызьы утёно «Дружбаез»?

Удмурт Дунне
By Удмурт Дунне Апрель 27, 2018 17:30

Ижысь «Дружба» кинотеатр ворсаськоз, юртаз офисной центр усьтӥськоз шуыса ивор тросэзлы гудыртэм кадь луиз, дыр. Мар луоз вашкала юртэн но кытчы пыроз «Ижысь киноклуб»?

Удмуртиысь суредасьлэн Т. Михайловалэн «Кинотеатр «Дружба» суредэз.

«Дружба» кинотеатр ворсаськоз шуыса, мон нырысь ик тодӥ «Ижысь киноклубен» кивалтӥсьлэсь Андрей Смирновлэсь.

— «Ижысь киноклублэн» ышоз коркаез. Мон али уг тодӥськы, кыӵе кинотеатрлы тунсыко со, мае ми возьматъяськом. Бен, ми быгатомы, дыр, мукет азьын но улыны. Но макем вӧсь учкыны, кызьы тӥяло тынэсьтыд коркадэ, нош тон номыр лэсьтыны уд быгатӥськы, — «ВКонтакте» бамаз гожтэ Андрей Смирнов. — Соин ик оштолэзь-куартолэзь-инвожо толэзьёсы ми «берпуметӥ» кырӟанъёсмес кырӟалом. «Дружбалэн» берпуметӥ улон нуналъёсаз мынам возьматэме потэ Элем Климовлэсь «Прощание» кинозэ. Кызьы, ГЭС лэсьтыку, музъем вылысь ышыны кулэ, песянайлы сяна, нокинлы кулэтэм гурт. Песянай — со мон…

«Дружба» кинотеатр шуиськод ке, соку ик син азе пуксе сталинской ампир — архитекторъёс шуэмъя, неоклассицизм — амалэн лэсьтэм юрт. Со ӝутэмын 1955-тӥ арын азьвыл кинотеатр интые. Зэмзэ ке, солэн историез 19-тӥ дауре кошке. Ӵапак соку Ижысь баӵко Николай Александрович Воробьёв усьтэ электротеатр, нима сое «Одеон». Пулэсь лэсьтэм юрт ӝыны даур сылэ. Туала «Дружба» кинотеатр — Ижын тужгес вашкалаез. Солэн вӧлдэтъёсыз улын али но ошисько на 3 вашкала люстраос, отын али но утисько на аппаратъёс, кудъёсыз возьмато плёнка вылэ пуктэм киноосты, кылемын кино возьматон будкаос. Кӧня ке гинэ вань на асьсэос катушкаос. Но, жаляса верано, Удмуртиысь фильмографилэн бадӟым фондэз али тус-тас луэмын ни. Матысь дыре ышыны быгатозы «Дружба» кинотеатрысь вашкала аппаратъёс но.

Юртэз утьыны вань одӥг амал: пыртыны сое историлы дуно луись архитектурной юртъёс пӧлы, соку отын котьмар мед интыяськоз, нош пушсэ (планировказэ) воштыны уз яра ни.

— Мыным туж кельшиз суредасьлэн Энвиль Касимовлэн малпанэз, — шуэ Удмуртиысь Культурая синпелетъёсты утёнъя агентстволэн кивалтӥсез Юрий Перевозчиков. — Со вера, история, пе, 20-30 ар ортчыса, берытске. Озьыен, плёнкае пуктэм киноосты выльысен учкылыны кутскозы.

Таӵе малпанэн улысалзы ке «Дружба» кинотеатрлэн кивалтӥсьёсыз но, оло, юрт выль сямен улӟысал но бордаз эшшо но тросгес адямиосты кыскысал. Нош али капчигес сое офисъёс улэ вузаны.

Тунсыко кадь пӧрме: таӵе юртъёсты, одӥг ласянь, утьыны кулэ кадь ачиз агентство, но со уг быгаты вазиськонэн потыны, юртэз нимаз реестре пыртоно шуыса. Тае, пе, кулэ лэсьтыны ачиз калык яке пӧртэм огазеяськонъёс. Но Юрий Александрович соку ик пусъе: бичано луоз уно документъёс, нош соосты огшоры калыклы люканы вормонтэм.

Озьы ке но «Дружба» кинотеатрлэн югдурез калыкез бугыртэ. Агентствое но куд-ог вазиськонъёс вуылӥзы ни. Вуттозы-а гужемозь та юртэз нимысьтыз утиськись коркаос пӧлы пыртыны?

— Вуттом, — шуэ Юрий Перевозчиков. — Ми доры вань документъёсын вазиськизы ке, кутскозы ни эскеронъёс но мукет ужъёс — соку юртлэсь пушсэ исаны уз яра ни. «Дружба» кинотеатрен югдур туж ик секыт ӧвӧл. Со интыяськемын сталинской ампир, неоклассицизм амалэн лэсьтэм мукет юртъёс котырын — нош таос реестре пыртэмын ни, озьыен, кинотеатр пумысен но ужпум капчиенгес вырӟоз.

Мария Векшина

Удмурт Дунне
By Удмурт Дунне Апрель 27, 2018 17:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<