Кызьы нылпиез кышкытлыклэсь утёно?

Удмурт Дунне
By Удмурт Дунне Апрель 25, 2018 12:48

Шаерамы кутскон сётэмын «Кышкытлыктэм пичи дыр» ужрадлы. Нылпиослэсь правооссэс утёнъя уполномоченной Ольга Авдеева вераз: со пумтэм луоз.

Трос калык люкаськылон интыосын эскеронъёс ортчыло. Ижысь 8 номеро нылпи поликлиникаын кышкытлыклэсь утиськонъя куронъёс тӥямын ӧвӧл.

Огнетушительёссы тунгон улын

Ижысь 8 номеро нылпи поликлиникаын нунал ӵоже ӵаш! вазе. Пичи нылпиосын анай-атайёс эмъясьёс доры вазь ӵукнаысен лыктыны кутско. Черод уг кулэсмы ӝытозь. Нырысетӥ этажысь холлэ радэн пуктылэм коляскаос ветлыны люкето. Поликлиника пуктэмын ай совето вакытъёсы — соку малпан ӧй вал, «нылпи транспорт» тамында луоз шуыса, соин ик солы нимысьтыз интыос чакламтэ. Эмъяськон организация борды юнматэмын Устинов но Первомай ёросъёсысь 17 сюрс пала нылпиос. Эмъясьёс доры нуналлы быдэ ог 650-эз вуэ.

Нош кытын нылпиос трос, отын уката юн чакласьконо кышкытлыклэсь. Кемеровоын кышкыт учыр луэм бере анай-атайёс туж сак луэмын. Чаклаллям ни: та поликлиникаын куд-ог ӧсъёс нуназе шорын но пытсамын, огнетушительёс тунгон улын. Ӝожтӥськонзы вуиз Нылпиослэсь правооссэс утёнъя уполномоченнойлы Ольга Адеевалы.

Эскерисьёс поликлиникае ӝог вуизы. Лыктӥз ачиз Ольга Авдеева, соин ӵош — Ижысь тылпу алонъя валтӥсь инспектор Алексей Комаров. Ортчизы поликлиникаетӥ, кенешизы анай-атайёсын, поликлиникалэн кивалтӥсьёсыныз. Шумпотымон: ӵашетон юнме вылэм. Алексей Комаров вераз: та эмъян учреждение вазен но тылпу кысӥсьёслэн син улазы ӧз шедьылы, кышкытлыклэсь утиськонъя куронъёс татын тыро-пыдо быдэсъясько.

Та нуналэ но запасной ӧсъёс усьтэмын вал.

— Милям соос 4, — вераз поликлиникалэн валтӥсь врачез Ирина Сученкова. — Поликлиника уйлы пытсаськытозь, соосты ум ворсаське. Бен, вань на милям эшшо кӧня ке ӧсъёсмы — лабораториосмылэн, кылсярысь. Валамон, юнме дыръя соосты пась ум возиське, кулэлыкез ӧвӧл.

Огнетушительёс поликлиникаын, зэмзэ но, эркын вылӥллямтэ — нимысьтыз лэсьтэм коробын пытсамын. Но тылпу алонъя валтӥсь инспектор Алексей Комаров та понна валтӥсь врачез ӧз пыкылы.

— Туала вакытэ одӥг эмъян учреждение но огнетушительёсты эркын уг возьы, — шуиз со. — Угось адямиос соосты исатэк уг чидало — тӥяло. Жаляса верано, асьмеос вунэтыны кутским, кызьы астэ возёно трос калык люкаськылон интыосын. Кылсярысь, котькуд нылпи поликлиникаын адӟымон интыын ошылэмын эвакуацияя планъёс. Но соосты кин ке учкись вань-а? Шуг вераны.

Поликлиникалэн валтӥсь врачез Ирина Сученкова верамъя, берло дыре, пе, уката секыт ужаны луиз. Угось быдэ вуымтэос алякъясько, юромо ӵын потто я эшшо маке — сигнализация ужаны кутске. Эвакуациос ӵем луыло. Нош куд-ог анай-атайёслэн талы вожзы потэ…

Гимназия азе кулэ пус

Кузебай Герд нимо гимназия вӧзысь сюрес машинаосын лумбыт сямен тырмемын — кышкыт учыр кылдӥз ке, дышетон организацие спецтехника сюрыны уз быгаты.

Уката трос машинаос тымисько татчы ӵукнаосы — туала анай-атайёс пиналъёссэс дышетскыны пыдын уг лэзё ни. Вылаз ик, гимназиен одӥг липет улын интыяськемын нылпи сад — пичи пиналъёсты город транспортын ки вылын уд вайы.

Но кылдэм югдур, шӧдске, асьсэлы анай-атайёслы ик кельшемысь дугдӥз. Вазиськонэн потӥзы Нылпиослэсь правооссэс утёнъя уполномоченнойлы — сюрес вылэ, пе, машинаен ворттонэз алӥсь пус пуктоно. Югдурен соглаш кариське гимназилэн кивалтӥсез Татьяна Волкова:

— Дышетскыны кутскиськом 8 но ӝыны часын, — шуиз со. — Урокъёс мыныку, школаямы ог 1 сюрс адями луэ, нылпиосты но, дышетӥсьёсты но лыдъяса. Марысь мар ке, зэмзэ но, кышкытлык кылдыны быгатоз.

Нылпиослэсь правооссэс утёнъя уполномоченной Ольга Авдеева гимназие вуылӥз ГИБДД-ысь 1-тӥ отделэн кивалтӥсь Вениамин Вычужанинэн ӵош. Соглаш кариськизы: татысь сюрес вылэ пус пуктоно!

— Малпасько, со пуслэн кужымез луыны кулэ нимысьтыз чаклам дыре, кылсярысь, 9 час ӵукнаысен нуназе берозь — урокъёс мынон вакытэ, — вераз Вениамин Вычужанин. — Дырез пыр-поч чаклалом на гимназилэн администрациеныз.

Алӥсь пус матысь дыре ик кылдыны быгатоз ни. Нялтас вераса, сое кылымтэ-адӟымтэ улсы кариськем понна 500 манет штраф тупатыны луоз.

Ольга Авдеева верамъя, машинаос укыр трос шуыса, ӝожтӥсько мукет дышетон учреждениос но — котькудӥз учыр нимаз эскеремын луоз.

Вазиськонъёс трос

Нылпиослэсь правооссэс утёнъя уполномоченнойлы котьку но вуылӥзы пиналъёсты кышкытлыклэсь утёнэн герӟаськем вазиськонъёс. Но «Кышкытлыктэм пичи дыр» ужрадэз ялэм бере уката трос луизы. Берло ог 2 арня куспын 70 пала ӝожтӥськонъёс люкаськизы ни. Уката тросэз — Ижысь, но вань соос Сарапул, Вотка, Глазов городъёсысь, Дэри, Алнаш ёросъёсысь но.

— Анай-атайёсты уката сюлмаськыто шунась лымы улысь потӥсь канализация люкъёс, соос усьтыса кылемын шуыса, 14 ӝожтӥськон вуиз, — вераз Ольга Авдеева. — Туннэ нуналлы ваньмыз ворсамын. Озьы ик данаксэ кышкато нылпи организациос котырысь сюресъёс — машинаос пумтэм-йылтэм ворттыло, «кыллись полицейской» ӧвӧл, пе. Таосыз вазиськонъёс ыстэмын ГИБДД-е но, муниципалитетъёсы но — ужрадъёс кутӥськозы.

Ольга Авдеева верамъя, 5 ӝожтӥськон вуэм ни, нылпиос люкаськылон интыосын тылпу потонлэсь утиськонъя куронъёс уг быдэсъясько шуыса — эскеронъёс возьматӥзы: 4-яз учырын зэмлыкез вылэм. Кышкытлык кылдыто буш сылӥсь юртъёс но — отын нылпиос шудыны-бызьылыны ярато. Кылсярысь, таӵе юрт вань, пе, Алнаш ёросысь Варзи-Ятчиын. Но Нылпиослэсь правооссэс утёнъя уполномоченнойлэсь куронзэ отын ӝог кылӥзы: куштӥськем юртэз кенеразы ни, гурт кенешын огкылэ вуыны кулэ, мар отӥяз карозы соин.

Жаляса верано, нылпиос кышкыт учыре шедьыны быгато котькытын — спортплощадкаосын, поликлиникаосын, школаосын, нылпи садъёсын. Соин ик Ольга Авдеева вазиськиз калыклы: сыӵе интыосты шараяно, тырмымтэосты палэнтоно. Та понна жингыртыны луоз 8(3412)571-049, 8(3412)571-027 номеро телефонъёсъя яке гожтоно AvdeevaUp@yandex.ru электрон адресэ.

Элина Кумачёва

Удмурт Дунне
By Удмурт Дунне Апрель 25, 2018 12:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<